موسم الامطار جانا مـن يبلغنـا البشـاره
يمكن العساس ينبي عن مقابيلـن مطيـره
وا عسا الخمسين ليله يضرب البارق شراره
والمزون السود توضي بالسما مثل السعيره
كالعقارب يستنير الكون في قاصـي قفـاره
تزبر المنشا الركايم والربـاب بكـل ديـره
يرتوي راس العدانه والبرد فـوق الزبـاره
تختفي روس النثايـل والمقابيـل الغزيـره
والجلاميد الصميده ترتخي فـي كـل قـاره
والمراهيش الهميله بالحصى توحي خريره
من تماخيض السحايب ينخفس طين الخفاره
يستزيد القاع بالما بالسحق ينسـاح سيـره
والجذيب يزود سيله جارفن بـاول نهـاره
لين فوق القاع الاقصى يبدا بالمجرى هديره
تمسي الوديان كالانهار من فـوق السمـاره
والنفود يصير قاسي والهوا ينسـم عبيـره
يسقي البيدا البعيده والخلا يذهـب غبـاره
من بلاد عمان لين قيال في غرب الحفيـره
والبذاير تنتشر باقصى المشاريف انتثـاره
يرتوي زملوق نـوار المشاجيـر الكثيـره
والبختري والنفل والشيح بالجـو انتشـاره
فوحت القيصوم تسري بالهوا ريحه عطيره
تبصر الخبيز نابت بالخـلا وابقـاع حـاره
والزبيدي بالصحاري والبلاد يـزود خيـره
يستطيب الكيف برا يشعـل النجـاع نـاره
والمعاميل السفيعه والوجوه اللـي سفيـره
شوفة المرباع زينـه مـا توفيهـا العبـاره
حتى لزهور الفيافي نظرتن واجوال طيـره
بالمسا والشمس حيه ما بعد بيّـن صفـاره
فوق رمث الروض تنهال العصافير الصغيره
تقترب من جلسة النجاع ما فيهـا استـذاره
وام سالم بالضحى والقايله توحي صفيـره
تجتمع فيه الحبايب والنزيل يـزور جـاره
والشواوي ترعى بالادباش واتجاور غديره
21-10-2009, 12:04 AM
العرض الشجري