غرتك نفسك

[ليتني عجميه]

مالصوتى يالمشاريه حيل ولا عزوم
وان تعديتي عتب خاطري لا ترحلي
هوّدي عن ثورة الشك واقبال الهموم
لين يجنب تايه الفكر ولا يشملي
سامح الله جرح الأحباب يوم وكل يوم
جرح تبريه الليالي وجرح يعتلي
وأنت ياللي كل ما أمسيت جابتك الحلوم
مرني طيفك وفزيت يوم أقبل علي
ماغدت عنك المساري ولا بالنوم نوم
السهر عيت دروبه وعيّا ينجلي
اسالك بالله وأمانه وغيره مايدوم
وش علامك يومك أرخصتنى ماقلت لي
مانويتك نية الغدر وانكار السلوم
الغدر ماهو بسلمي ولا سلم اهلي
هد طيشك لايجي منك تجريحن ولوم
الله اللى عز قدري وثبّت منزلي
غرتك نفسك وغررت بالقلب الرحوم
لين حلت أقصى طموحي على باب اجهلي
وانت لو تمشى دروب الغلا مع كل قوم
ما أحدن مقفي بقلبك ولا أحدن مقبلي
والله انى قد وسمتك بكفّيني وسوم
ماتركت منك المياسم ولا ضلعن خلي
كم سنه مرت وأنا أشرى بخفاقك وأسوم
والطعون اللي بصدرك تغيض وتمتلي
قلت لي لا تجرحين الشعور بلا لزوم
قلت لك : مايونس الجرح غير المبتلي
ايه أحبك ايه أحبك ولا فالحب لوم
والله ان لامااك شفّي وصدك مقتلي
وان تباطيت الليالي وعديت النجوم
أنت خابر وش رضايه وتدري بزعلي
رح وأنا ياصاحبي منك لو عشت محروم
والله اني حبك اللي بقى والاوّلي