أعزائي القراء هذه القصيدتين عباره عن صوت وصدى بين علي ال مشرف وبين الشاعر المرحوم/ عبيد آل ذيبان
ياراكب الي مانعته المملكه حسـب النظـام "=" ومنبهـه كـل المنافـذ لجـل ماتستقبـلـه
جمس من آخر ماورد وصفه كما بدر التمام "=" الى ظهر غطا على كـل النجـوم بمقبلـه
ساعة تشوفه تحسب انه بارق بعرض الغمام "=" في ليلة يجذب نظر ابروقهـا مـن خيّلـه
ولي قربته تحسب انه بنت يزهاهـا اللثـام "=" ولي قفيته تحسب ان الارض جتها زلزلـه
صمم نتيجة تجربه دامت على ستيـن عـام "=" من البحوث الشامله ومن الجهـود المبذلـه
مكينته استنسخت بالصنف من صاروخ سام "=" ومحركات من طراز الميق حطت باسفلـه
توايره لاداست الارض انحنت له احتـرام "=" وكنها تقول من الفرح (لبيه يالعـز وهلـه)
والبدي لونه كلما شفتـه طرالـي بالتمـام "=" (شفة غرير(ن) شارب شربيت زينه يخجله)
وكن تحت كبوته ليالي انس واشعار وغرام "=" تبـدا اماسيهـا لمـا دق السويـك وشغلـه
تسمع قزوزه يسحب الدندان ودموعه زحام "=" وتسمع بلوفه تبكـي لدندانتـه وتـرد لـه
وتسمع تروسه تشتكي انا العليـل المستهـام "=" وتسمع بليتينه يردد (آنا دنيـا مـن الولـه)
يالعنبوهم كيف اتموا وصفه عيـال الحـرام "=" المعجزات السبع كنها فـي غيـاه مسلسلـه
عليه لي كلا خلا بالي يـوده فـي المنـام "=" قم يانديبي واكتب كتاب السهيـر ووصلـه
نصّه لدار العز ديرة لابتـي صبيـان يـام "=" دار لها في مهجتي قـدر ومكـان ومنزلـه
ماكر بني عمّي هل العوجا رفيعين المقـام "=" ريف الضعيف بساعة كـلا خويـه همّلـه
لاجيتها قل ياسلام الله .. سلام الله .. سلام "=" يادار داعينـا ودعوتنـا ونبـع المرجلـه
ياعزنا من عاش بارضك والله انه مايضـام "=" يافخرنـا ياتالـي المجـد العضيـم واولـه
وانهج لابن ذيبان عطه الي نقيته من كـلام "=" واستعجله بالرد تكفا لي وصلـت استعجلـه
ياعبيد ماكل الكـلام يمـر مـرور الكـرام "=" بعض الكلام تقول سحر بمفرداته واجزلـه
يبقا على مر الزمن نقش على صفوة رخام"="لامر جيـل ينقلـه الجيـل الآخـر ينقلـه
والخوه الي مع سواتك بالجواهـر ماتسـام"="هي مكسبي وان حزتها ماهم قـومٍ بكملـه
علي بن مشرف
وهذه هي قصيدة الرد من الشاعر المرحوم / عبيد آل ذيبان
يقول ابن ذيبان ما وده يجي قوله ملام"=" ونبع المعاني بالجواهر قام يزفج منهله
يفيض بة واد(ن) تصافق فوقه ابكار الطوام"=" يروى معه بعض الشجر وبعض الشجر يستنقله
ينقش كلامه بالحجر ويخط به ريش النعام "="يضوي كما نور القمر بين السطر والبسمله
اطيب من اوراق الزهر وازكى من اعواد البشام "="يصبح به اليابس خضر في غرسة(ن) متخبله
يبقى على طول الدهر ويعيش عام(ن) بعد عام "="مثل الذهب غالي السعر طول الزمن ما قلله
مفتاح زينات المعاني طوع ما جا بقتحام "="اجمَل المعنى على كيفي وازيد ادللة
باب الرضا والا الزعل والاالفرح والا الهيام "="اغوص في بحر الحروف وكن عيني بوصله
فيا مرحباواعداد من قد حج بيت الله الحرام "="ابخط من حرك شعور(ن) وسط صدري واحفله
واعداد ما تلمع نجوم اليل في جنح الظلام "="رمز لغلا الشاعر علي في رد قاف(ن) ما اجمله
في ديرتن غنى لها التاريخ واهداها وسام "="محفوضة وخصها الله منه باعلى منزله
دار النقاء نجران واهل النايلة يام الحلام "="يرعون ابلهم كل وادي وفي حماهم تدهله
ترسي كما ترسي الجبال ان جا بها امورن اعظام "=" من دونها قومن تبيع الروح يوم الزلزله
لا زارها العايل غدوا شعث النواصي له ا شغام "=" يملا القهر صدره وظنه بالملاقى يخذله
من عقب ذا قم يا نديبي في شبح ها..والهمام "="سبعين لترن كل خزان(ن) سرت ومدبله
مصيونة(ن) ما سرحوها السوق والا للدوام "=" ما تظهر الا في لزوم و بالكراج مطربله
لما مشت كنها الصقر لما كفت يبغى الحمام "=" والا الفهد لما انطلق يبغى غزال(ن) اعزله
فزاتها كنها الحنش لما زرق مثل السهام "=" في جرة الثاني لها نقز(ن) وكن فيها أزعله
تسرح من الجفجف عليها من تضرا بالمهام"="تنصاك من نجران جاتك بالهدايا محمله
سواقها لمن زهمته بان لك منه اهتمام "=" دربه قطوع وكنه رسم المسطره والمنقله
يمشي على شفك كما سيف(ن) وضربه بالعظام "="وفيما يطيَب خاطرك بامرك يحل المسأله
وينقل معه رسالة(ن) تشرح معزة واحترام"="فلك واجب(ن)تستاهلة حنا لمثلك نفعله
واختامها صلوا على طه عدد وبل الغمام"="واعداد ما هب النسيم وهز غصن(ن) ميله
المرحوم عبيد الذيبان
18-02-2005, 02:46 PM
العرض الشجري