يابنت كفـّي دموع العين كفـّيها
خلاص هذا القدر يابنت الاجوادي
ماهي على الكيف دنيانا وامشـّيها
لوهي على الكيف كان انتي هي البادي
حسّي بدنياي عقبك كيف بقضيها
والجوف ياكيف عقبك يقبـل الــزادي
غير العيون السهيره من يواسيها
في طيفك اللي حرمني لـّذة ارقـادي
فرقاك صعبه عليّ ماني بقاويها
حاولت حاولت بس الحـظ مـــاجـادي
ياشبه خشف ٍ تغنـّج في مفاليها
ياما على القرب ضحـّينا ولا فـادي
روحي بفالك وحذرا لاتعوديها
طلباتك اللي عليها الجرح يزدادي
واسرارنا بالمحبه لاتبوحيها
كنّي المواضيع خلّي وضعنا عادي
الناس بالهرج ماترحم حكاويها
ولاتضحكي ناب حسّـادك وحسّـادي
لاكن حسايف على الفرقى وطاريها
البعد غصب ٍ عليّ وآسف على بعادي
وآسف على دمعة ٍ فيني تهـّليها
وآسف بحب ٍ تـهـدّم عـقـب مـاشـادي
ياليت روحي قبل بعدك ينحـّيها
ماتت قبل ماتفارق قـبـلـة (الـوادي)
ياحيـلة الله على فرقى للياليها
يالله دخيلك لهيـب الجوف وقـّادي
وجروح قلبي دمت يامن يداويها
مامن دكاتر ولا من يرشد ارشادي
مالي جدا كــود ذكر اللي مجافيها
واشكي واسامر بعدها نجمي الغادي
الشــــــاعر / ســـــــعود رتيبان آل جويرّ
العرض الشجري