10 / 1 / 1426 هـ

[ماجد المهنا]

السلام عليكم ورحمة الله وبركاته ..


أخواني ..

اسمحولي على الانقطاع الأيام ذي لظروفٍ عند الله علمها ..

يشرفني وضع هذه الأبيات المتواضعه .. كتبتها بعد وفاة جدي وابوي ( حمد ابن عبدالله المهنا ) .. الله يرحمه ويجعل مثواه جنة الفردوس الآعلى .. وموتانا وموتا المسمين ..

والأبيات تعبر عن نفسها ..


صلو عـ النبي ..

يالله المعبود رب العالمين = كافل الأرزاق جلاي الهموم
ترحم اللي مات وانّا ميتين = قابضن نفس الشجاع اللي تصوم
مات في عشره وحنا طالبين = ترحمه يالله يالرب الرحوم
منطفت ضو الرجال الغانمين = وماتموت وعلمك يطول النجوم
( يبه حمد) ياسعد خفاق الحزين = فزعة الضرغام يا سم الرخوم
ماتمد الا الثمينه والسمين = وفزعتك ماهيب سجات وحلوم
(الكرم) و(الطيب) و(الدنيا) و(دين) = و(المراجل) و(الشهامه) و(السلوم)
و(الحميه) و(الشجاعه) و(الفطين) = (أنت تلبسها مثل لبس الهدوم)
ابكيك يادرع الرجال الطيبين = (الموت) يرد في مدامعنا سهوم
والجسم ما عاد يتحمل عبيرتين = وشلت الخفاق مايقدر يقوم
لو مت يالشغموم حنا عايشين = مايرث الشجعان يا كود القروم
سنة الدنيا كذا يا عارفين = والرجال تبين في وقت اللزوم
(الموت) حق وكلبونا خابرين = الآدمي لو عاش مايمكن يدوم
نرضا بحكم الله وحنا مؤمنين = والنفس ماتجزع وحاديها سموم
جعل عظماتك بجنة فايزين = برد وسلام وطيب فالٍ كل يوم
في جنة الفردوس ظمن الصالحين = خالدٍ فيها وتهنا دون نوم
وصلاة ربي عون كل الصابرين = على النبي اعداد ماتمطر غيوم

وسلامة روسكم ..



*الله يرحم موتانا وموتا المسلمين ..
ولو اكتب طول عمري وبكل لغات العالم ..
مستحيل اظهر اللي في خاطري صوب ابوي حمد جعله بالجنه ..


ماجد المهنا