صف رابع

[محمود هويج ال مخلص]

السلام عليكم

هذه قصيدتي السابعه في منتداكم الراقي وفي انتظار تقييمكم

انا عليك أشفق من أمك معَ ابوك=وان لك اقرب من تلامس لصابع

اطرح كفوفي لاجل مايلمسك شوك=يلي فؤادي لك هجوس ومرابع

اشريك لامن اقرب الناس باعوك=واذوق حبك بس ماني بشابع

لاسمعت اذني طاري اسمك ونادوك=يبيني في وجهي خيالك واتابع

أستلهمك فكره من الشعر محبوك=عليك جزلات القصايد ترابع

ايدي بجيبي دايمٍ تظهر البوك=لك صورةٍ في داخله صف رابع

وليا سمعت انهم على شيء بكوك=ارضيك واجيبه ودمعي تتابع

يومك صغيّر سن ماكان ينهوك=براءة الاطفال والود طابع

واليوم طال البعد وان جيت خبّوك=ماعاد اشوفك صار ذا الحول سابع

في حضرتك مالك ولي غبت مملوك=زلزال حبك صايرٍ له توابع

اينع خضار القلب والقلب متروك=ثارت عليه العاصفه والزوابع

كثير بعدي مايلامون حبوك=يلي غلاك من المعاليق نابع

باب الوصل من بينّا صار مصكوك=ياليتنا نرجع صفوف الروابع