اخلوا وشوفوها

[الجويّر]

هذي قصيده للشاعر عبدالله حزام آل صقهان 0 سمعني القصيده وكان مسنـّدها على اخوه الصغير منصور ومنصور الله يطول في عمره وعمر من يقرا كان عمره 4 سنوات وقال عبدالله

منصور منصور ليتك داري ٍ فيني = انا هوايا من العربان مزيونه

والله لو شفت ماقد شافته عيني = ان تسمح امن الهوا والحب وفنونه

له مدة ٍ غايب ٍ عنّي وجافيني = ليته يجي لو يجي حتى على هونه

الحب حبه ولا فكرت باثنيني = حبه سلب عقلي وسموني مجنونه

حبيت شخص ٍ وفي قلبه يداريني = ابغيه لاكنّ رجلي قاصره دونه

خده كما بارق ٍ بالليل يعميني = يازين شعره اللي حطه على امتونه

وعيونه اللي تقول عيون شاهيني = شيهانة ٍ مطلبه بالصيد مفتونه

رويان عوده مثل غصن الرياحيني = لاهبّ نسناس مالت منذه اغصونه

وآخر كلامي سلامي للمحبيني = اللي طريق الهوا والحب ياوونه


__وسلامتكم__

ورديت عليه وقلت 00




ياللي تسنـّد على ناس ٍ صغيريني = سنـّد على اللي عرف مالا يعرفونه

منصور توّه على درب المحبيني = ولا تربـّع بقلبه حب مزيونه

رد النظر لي تجاوب عينك ابعيني = عطني وبعطيك مظهوره ومدفونه

قولك بشعرك يدلّ ان وضعكم زيني = ودرب المحبّه بممشاكم تصونونه

هنيّكم بالهوا والحب ساليني = عسا الولي مايفرّقكم وتشكونه

عسا يعدّيكم اللي شافته عيني = ياشفت شي ٍ عساكم ماتشوفونه

شفت احمر الموت قاصدني وناويني = والروح لاجتّ تسلّمله قصر دونه

الموت سبّة هموم ٍ دوم تاتيني = مع هجعة الليل لاروّح على هونه

والليل معروف ذكرا للمحبيني = اللي جداهم على نجم ٍ يعدونه

لي قصة ٍ منـّها تبكي البزاريني = قصة غرام ٍ تبيّن للحزن لونه

ماريّة الحزن بعيوني عناويني = ولاّ المواضيع وسط الجوف مكنونه

بفراق نوره توسّطت العذابيني = وهموم قلبي عن السلوى يردونه

مدري صغت للعواذل والشياطيني = او حب غيري ملكها يالله العونه

حسبي عليها بعدها ضاعت اسنيني = عقب الوفا همّـلت عهد ٍ وجب صونه

والله غميضه بعد كنـّا قريبيني = صرنا بعيدين عقب الحب وفنونه

وآخر كلامي غريد الورق يبكيني = مع غيبة الشمس لاغرّد على غصونه