السلام عليكم
ياسعود دن الجيب والعفش هاته=جيبن عذابن للوعر والشناظير
أبيض تواير مصنعه شايلاته=شيكه تعدى شيك بيض الغنادير
توه جديدن كاملن في زتاته=وسواقه اللي ضاري بالمشاوير
وترى حلات الشي دايم طراته=جهز ترانا سارحين على خير
مع اشقرن كن العديم انفلاته=حل الهداد وحان وقت المظاهير
حرن يشوقك نقلته والتفاته=يازين والله لاكفخ تله السير
افجح عوج منقار هذي صفاته=جثل المقفى ريش صدره مغاتير
لافرعوبه ماتسوى سواته=يهوي على جو الخلا كنه الزير
وخوة ارجالن ما أدور غناته=خطلان الايدي مرخصين الدنانير
الكل منهم راس ماله عباته=ابسوق المراجل ماتهاب المخاسير
وعشو بروض زاهي في نباته=متخالطن به زاهره والنواوير
والنار شبت والحطب من غضاته=في خايع يرتاح به راعي الطير
ودلال صفرن مايها من فلاته=سيل جديد من قنوفن مزابير
ودارت سوالفهم براحت وجاته=سوالف ارجال قروم مناعير
مافيهم اللي قال هرج الشماته=على النقا مافتشوا غرة الغير
وهذي طرات الروح واحلى امنياته=من قبل نصب احيودها والمحافير
وســــــــــــــــــــــــلامتكم
الشاعر سالم محمد الدوسري
11-05-2005, 04:17 AM
العرض الشجري