السلام عليكم
هذي قصيدتين من منصور بن منيخر وبطي بن منصور ترثي محمد بن منصور الله يرحمهم جميع
وقصيدة منصور تقول
مرجان قم هات الحطب ووقد النار=عـيـون عـمـك نـومـهـن حـاربـنـه
قـنـد لـي الـدلــه بـهــيــلٍ ومـسـمـار=اكـَمـد بها جروحن في كبدي مكنه
الـقـلب مني كـنـه يـجـذب بـشـنـكـار=واجــــر وناتٍ ضـمـيـري فـرنــــه
كـم خيرن قبلي شـرب مـر الامـرار=مكـاوي الاقـدار مــثــلــي كــــونه
اقـنـب مـثـل ذيبٍ تهـايق على الـدار=والـدار خـالـي شـدو الـبـدو مـنـــه
يـاونـتـي ونـة خـلـوجـيـنـن واضـوار =تـجـاذبـن بـصـوت ثـــــم رودعــنــه
عـلـى ولـدهـن ذابـحـيـنـه لـخـطــار = واذا عـــطــوهـن بـوهن مـا بـغـنـه
سـاجـن ولاجـن بـيـن وارد وصـدار = ثـم عـودن مـن حـيـثـهـن فـاخـتـنــه
عـلـيـك يـالي مابـعـد حـس لـي جار=ولا قـريـبـي قـد شــكـى الـحـال مـنه
صـحـيـب للشيبان وصـغـار وكـبـار =وطـيـبـه وعـقـله سابـقـن صغر سنه
طـبـعـه كـريـمٍ صـافـيٍ واصـلٍ بـــار =والـي عـطـن الايــــــام مـنـي خـذنـه
تـخـطـفـَـنـه مـنـي صـدوف الاقـــدار =وخـذنـه الايـام مــــــــــــا مــهلــنـــه
وجـهـه جـلـوبـتـنـا لا غلَين الاسعار = وخــيــالـــنـا لا لــقــمـوهـن الاعـنـه
الـيـا اقـبـلوا ذولا وذولاك دبـــــــــار =حـرد الايـادي واهـلهــن يــعــرفــنــه
عسى على بـوميركـه وبـل الامـطار = حـيـث ان فـي ضـلـعـه لـقـلبـي مضنه
ينبت على قبره مـن الوسمي الزهار =وعسى جـزا وصـلـه مـن الله جــنـــه
يـالـيـتـنـي ويـاه حـطـيـت فـي غــــار = لـو كـان قـبر ثـنـيـن مـاهـــوب سـنــه
وصــلاة ربـي عـد عـيـدان الاشـجـار = على نـبـيٍ سـنـتـه خــيــر ســــنـــــــه
اما قصيدة بطي بن منصور ايضا في محمد اخيه هي الي تقول
يـــــالله يـالـي خـالـقٍ كـل الاكــوان = ابـرج لـعيـنٍ مـاتـضـم الـدمـوعي
كـنـه يرَكز داخـل الـعـيـن عــيــدان = واهـات صــدري مـزعنه مزوعي
البـارح سـهــرت واسهرت مرجان = من واهـجـن لاع المعاليق لوعي
اقنب كما يقنب مع الصبح سرحان = اقـنـب حزن والسبع حاديه جوعي
يا والله الا شـان وقـتـي و لا زان = فـعـول الليالي ذقت منها الفجوعي
سـمـعـت صيحة موضيٍ يابن فتنان =وبـغـت من الـعـبره تـحطم ضلوعي
عـلـيك يـاريـف الـجمـاعه وضيفان =صـحـيـب للـشـيـبان ذرب الطبوعي
ما يـوم شـفـتـه شاين الـبال زعلان =وإلا ومـرتـه قـال لـبـيـك طـوعـي
وجـهـه جـلـويـتـنـا لا غلين الاثمان =وخـيـالـنـا لا زبـرن الـجـمـوعـي
لاجـاء نـهارن فيه زوغات الاذهان = نـطـيـح للـي يـلـبسـون الـدروعـي
عسى لـه الفردوس منزل ومسكان = بـجـاه ربٍ لـه عـبـيـده اركـوعـي
يالله صـبـر ايـوب تـوحـيـد وايـمان =مـقـسـوم ربـي خـاشعٍ لـه خشوعي
وتحياتي لكم
وانشاء الله وفقت في الاختيار
واعذروني على الاخطاء ان وجدت
20-06-2005, 01:45 AM
العرض الشجري