البـــارحه كني توطيت حيه..

[هادي القحطاني]

السلام عليكم ورحمة الله وبركاته

مساكم شعر


ومنكم العذر

البارحه كنـي توطيـت حيـه
اوكني اللي قابل النـار والغـار

تضحك بي القمرا وعيني نديه
تبرق وترعد.. مادرى طافي النار

الدمع نعمه.. للعيـون الشقيـه
وانـا شقيـن بالمحبـه وصبـار


يالليل هونها.. وشيـل الاسيـه
لاتفضح العبره وخابرك ستـار

ياوجد حال اللي غدربه خويـه
او وجد راعي هقوتن عند بوار

اخسي خسيتي ياالنفوس الرديـه
وأخس خلق الله طويلين الاعمار

ليت المحبه شخص.. يرفع قضيه
يحكم بها القاضي علي كل جبار

ياشمس لاتبدين وبقي خفيه
ابغى اسامر طيف خلي علي النار