لـعـيـون بررااق الـنـحـر لـشـاعـر/ احمد العكشان ال هادي العجمي

[المنفرد]

ينومسني من التاريخ صفحة ماضي الجدان
هالابل والصحاري قفر والرسلان والضيفه

معالمهم بيوت امن الشعر والصبر والشجعان
زمانن راح وايامه عليهم كانت امخيفه

ولا خافو ولا هابو ولا قلو مداد احسان
هذاك الوقت مامنهم حدِ يحسب تكاليفه

هذاك الوقت قوة قلب حدة شور صدق لسان
كبير القوم له رايه وله وزنه وتصريفه

يحبون المعارك والغنايم مكسب الفرسان
ياعون الله كأن القوم كلن يغزي ابكيفه

قبايل مارضت تخضع لحكم الفرس والرومان
ماغيرالله يحكمهم ولاهانوبتشريفه

ينومسني تواريخ البدو واذكر رفيع الشان
ياحي ذالعين لاقالو ترا هذي محاريفه

قصيدن يبهر الاذهان طبق الفعل والعنوان
ماهيب اقوال شاعر وقتنا الحالي وتأليفه

قصايد شيشت راسي قصايد شيخنا راكان
فرق لعيون براق النحر جمعين من سيفه

اقوله وانتخيبه كل ماشح الزمان وشان
وانا سيفي من اقواله سيوف اجدادي ارهيفه

ولاهانت قبايلنا نسل عدنان او قحطان
انا من ربعي العجمان اخذت العلم واضيفه

ترا ودك يرد العلم نسل احصان ابن حصان
مهي لحية قصايد واحدن كثرت سواليفه

يدربيها على كيفه كأنه طير ابن برمان
نشب فاحلوق خلق الله ولا صابت تعاريفه

يحسب ان القبيله تفتخر بالكذب والبهتان
يألف له قصص ياكثر تأليفه وتزييفه

ماعاذ الله من جنسه يكون الشاهد البرهان
مدام ان الشعر تحيا من اجدادي محاريفه