لا عاد تنشد ترا حالي وصل حده . . !

[محمد الخييلات]

السلام عليكم و رحمة الله و بركاته


صـبـآحكـم أمــل

لا عاد تنشد ترا حالي وصل حده=يا كثر ما قيل لي يا صاح وش قومي ؟
اللي خذا النوم من عيني و لا رده=ليته يرجع لعيني شي من نومي
القلب وده على لاماه من مده=ذا العام ثامن و انا منه على صومي
يا قو باسي على غيره و يا شده=بس الغضي لا ذكرته ضاعت علومي !!
يا ليت لي هدهد سليمان و آهده=ياخذ علومي و يعطيها لمريومي
أمسي فدا أمسه و غدي فدا غدّه=لكّن ليته يجيني في ضحى يومي
بحب عينه و كفي من تحت خده=حتى الدمع لا إنهمل تلمه كمومي
أثر الهوى يهدم الرجال و يهده=متني عجز عقبها من شيلة هدومي
الوقت شدت مزوحه و اقبل بجِده=يا شين جِده كواني و اخلف عزومي
شدت و شد الحيا صده بأثر صده=يا ديم دومي عليها بالحيا دومي

و سـلامـتـكـم . .

اخوكم \ محمد بن سلمان الخييلات