يــــاعـــلـــي ... خـــل العيــد لــ أم الدنـــاديــش

[الضاوي]

يـــاعـــلي خـــل العيـــد لام الدنــاديـش
اللي تنظـــف كــل يــوم ٍ جســـدهـــــا

تبغـــي تمــاري نـاقضـات العكـاريــش
في كــل ملفـــاح ٍ تنقــض جعدهـــــــا

العيــد .. عيــد الله ولـو فــات حتيــــش
من حسبـــة أيــام ٍ يمــرك عددهـــــــا

نبــي نعلمـــك المســـاري على الجيش
تمشـــي ذلولــك .. ليـن يفتـر جهدهـــا

خــابــرك مانت بضــاري ٍ للمطاريــــش
نبيـــك تونــس حلوهـــا من نكــدهــــا

ليــله على مســـرى .. وليـلهٍ مغـابيـش
وليــله نخــلي نـومهــا .. لمـن رقدهـا

وليــله على تمـره .. وليــلـه على عيش
وليلــــه نوكلـــك الشحــم صيـــد يدهـا

ياعــلي لاجيـت العرب .. لاتجـي ديـــش
خبــل ٍ ليـا جــاب السـوالف سردهـــــا

إحفـظ لسـانك .. لايجـي فيـه تبطيــــش
تصبــح عيـــونــك كــايدات ٍ رمــدهــا

يجيـــك من ينشـدك .. نشدة تقتيــــــش
يبــي يسنــــع هـــرجـــة ٍ يعتمدهــــا

خلـه يقـــوم مفلــت ٍ في يده ريـــــــش
يــروح منـــك وحــاجتــــه .. ماوجدهـا

تــــرى دعــابيـل الخبــول الفـوانيـــش
تبــدي بمــا فيهــا ولاحـد ٍ نشدهـــــا

يجيـــك واحـدهــم .. يورّش تــــــوّريـش
عجــاجتـــه يسبــق مطـرهـا .. رعــدها

ولا لعمقـــات الســوالـف منــاقيـــــــش
قــرايـــة الكلمــه .. على أول عددهــا

تجـــي ســـوالفهـــم بضحــك وتبهيـش
وقلــوبهــم مــحـد ٍ يفــكــكـ عقدهـــا

============================



وســـــــــلامتـــــكم ..


لـــ صقـــــــر النصـــــافي ( رحمه الله )