قـصـة غــرام ٍ بـداويـّه حـضـاريـّه

[الجويّر]

الصبح ماشي معا نور الفجر لابان = والليل ماتنفع العاشق مساريّه

اان قاله الله ..شمالي قبلة الصمان = الوجهه اللي عليها مطلب النيّه

بطرش مدام البطيني ماوعا رقدان = والدرب مع طلعة العشـّار بريّه!!

على عذاب الفيافي وارد( اليابان) = والنوع نيسان. واللوحه كويتيّه

جيب ٍ جديد ٍ . يزود الشوق للعشقان = رفيق درب00العشاشيق الهواويّه

عليه في شاية الله واصل الخلان = واغنم واكحـّـل نظر عين ٍ شقاويّه

بشوف ترف ٍ تقود بزينها الغزلان = اللي عليها قلوب الخلق مشويّه

قادت من اشكال وانواع الهوا . واللوان = تقود ريم ومها00 واتقود عفريّه

مدري من الطين مخلوقه كما الانسان! = ولا ملاك ٍ نزل لاهل السعوديّه

سبحان من ساقهالي بدّت العربان = وانا بدار الصباح.. وساقها ليّه

جتني وانا جيتها واللي مقــّدر كان = قصة غرام ٍ بداويّه حضاريّه

ولزم ٍ عليّ آتعنـّا لاجل غصن البان = شفق ٍ عليها رغم ماتصعب الجيّه

صحيح وضعي خطير ٍ يورد لطوفان = خطير وضعي لو الدعوا عوافيّه

من بيني وبينها حدب ٍ شطير. وزان = لو يزرق الطير جابه من علاويّه ؟؟؟؟

وعن وصلها لو يطـّوق دارها الشجعان = واصل وعيب الولد ترجع خطاويّه

ماهي هياط ٍ ! ولاكن دافع الوجدان = يدفع لو (النار) توطاها مواطيّه

ولو بان خلّي جماله وابصر العربان = مالامني لايمي وامسا على غيّه

لو بان شعر ٍ يحوش بطوله السيقان = مع غرّة ٍ كنـّـها شمس الضحاويّه

والموت لابيـّـنت مع رسمة الحجان = عين ٍ يكافي مغير عيون بحريّه

والخد زبدهولمسه يشفي المرضان = أمـّا الشفايا ! عسل صافي وورديّه

والعنق طايل ولبـّات النحر ميدان = ميدان؟ متخصص ٍ لاهل الفروسيّه

والزند ماهو هزيل امربرب ومليان = وكفوفها كنها السندس وسحريه

وسرجوفها ضامر ٍ. في عودها الرويان = وش زين اقادير؟ ولاّ زين..هنديّه؟

والردف ضيّق عليها وسعة الفستان = عز الله انه على المحبوب ماريّه

والورك. جنب القحه! متقوّس وحليان = خيال بأوصافها ماهي طبيعيّه

بنت المناعير.ماهي بنت راع الضان = وراس القبيله مقادم سربة الهيّه

وانا مدام ان ربوعي لابة (العجمان) = استاهل الفوز في حب السنافيّه

وانا هواي/ الشعر / والبيض / والذيدان = واجنـّـب الحب دام ٍ فيه شاويّه

نفسي عيوفه .تشوم وشومها عجلان = ماتقبل الحوس تقبل بس منقيّه

وقد قيل ماكلّ شي ٍ يدركه لانسان = وانا مرادي عسا يجمع لي شويّه00

وضح ٍ بها الزين 0 موقف 0 والفحل شرهان = ماجابها العود في نيّه تجاريّه

ترعى القفر قدم عيني 0 وابدع القيفان = وتكمل مدام ان على يمناي نشميّه

لاشك دنيا تجيب الصح للغلطان = شتـّانت الجمع0 دود الدوم عكسيّه

وانا معا الصبح واصل ديرة الخلان = بروي ظما الشوق بقصور ٍ شماليّه

حيث ان الاشواق مظما العاشق الولهان = اليا ظما في نظر ماشاق مسقيّه

ياما على الشوق غنـّا شاعر ٍ مشحان = وغنت على شوقها 0 قلبي العطاويّه


وسلامتكم



الشاعر / سعود رتيبان الجويّر

حبيت افسر لكم بعض الاشياء الغير معروفه للبعض من الاعزاء المشاهدين



اول شي معنا الشطر اللي يقول/ والدرب مع طلعة العشّار بريّه 0

طلعة العشار اسم لمكان في الوادي تتوجه معه الدروب الا الصمان والدروب الا الصمان واجد



والشي الثاني عن العطاويّه / العطاويّه هي عجوز شاعره جزله وكنا نسمع قصائدها وحنا بزارين
وكانت في بالي دايم شطر بيت لقصيده من قصائدها يقول/ (الشوق عرّس وخلاني)

والشوق اللي هو زوجها يوم تزوج وهي كانت تعبانه في المستشفى