وصية الوالد

[فيصل الخالد]

وصـيــة الـوالــد

هـذه القصيده اوصي ولدي فيها على العلوم الطيبه

وأحذره من رفاق السوء اثناء دراسته في الخارج

ـــــــــــــــــــــــــــــــــ

العود يسهر قل جهده وحيله = والشيب في راسه من الهم قد لاح
والعمر راح ولا بقى الا قليله = الناس بافراح وانا بداخلي اجراح
تلعب بي الحسرات في كل ميله = خلت قفص صدري غدى ديرة اشباح
كآبة في وسط قلبي دخيله = يامن يدحرجها عن القلب يرتاح
سبة رفيقن ماندور بديله = يوم الرجال تشح في بيع لارواح
سافر وخلاني وحيدن اخيله = العلم بيدين الرجل نور مصباح
ودي اجيله كيف ما اقدراجيله = لاصار مابه وسط مخباي مسراح
وقفت له وقفة خليل لخليله = من عيوني الثنتين ماني بشحاح
ثنيت من دونه اشيله اشيله = حتى يجيب العلم وتعم لافراح
وصيتي والنفس لاجلك عليله = ترى البواخر للغرق دون ملاح
احذر تضيع كل يومك وليله = ترى الشهاده ماتجي بيد سواح
واحذر تخاوي كاسبين الفشيله = بياعة الذمه على كل مشواح
واحذر تبيع وتشتري في الهزيله = واعلم ترى السمعه كما خيط مسباح
واحذر تنومس كان قالوا حليله = تنقال للجاهل من لسان مزاح
مهرتك عندي سيف ملعب اصيله = فهمت والا اعيد خابرك لماح
ياحبني لاهل العلوم الجميله = عطرن يعطرني على الدوم فواح
شفي صبين نادرن بين جيله = سهمن تعلا يوم توزيع لارباح

ــــــــــــــــــــــــــــــــــ