يانجوم الليل لاهنتي طلب = الطلب واحد وتعبيره كثير
وصلي لي ظرف مليان ٍ عتب = للحبيب اللي على بعده كسير
ارسليها جمرة ٍ له تلتهب = وارصخيها في معاليقه سعير
حسسيه بنار بعده والتعب = والعنا والهم والحزن المغير
قولي ارحم من على بعدك حسب = كل نجمه في دجا ليله تنير
وقولي ارحم من على شوفك شرب = سقمة اللهفات والشوق المثير
ارحمه من سكة ٍ فيها نشب = وابعدتبه في عنا الهم المرير
وثاير الاشواق لاعب به لعب = بين شرق وغرب لقفا يستدير
مابقا مرقاب مافوقه رقب = في رجا علم ٍ لشوفك يستعير
ومن كثر صبره تملل واغترب =وبلّ جيبه مدمع العين الغزير
لو تشوفه لاغشا ليل العرب = لاطفت لانواربالعتمه سهير
حاير ٍ بين الشوارع في غلب = عايش الدنيا بلا شور ومشير
وان لجا للي مضا زاد اللهب = وان شكا للناس قالوا ياخطير
والمحبه بيتها عقب الطرب = مسكن الاشباح واصوات الصفير
راح بيت الحب لله العجب = وجنة اشجاره غدت فوقه حصير
وانت لاجله دمع عينك ماسكب = ماطرالك فوق وجناتك يسير
وماطرالك من شهر تالي رجب = تسقي الظامي بمبسمّك الصغير
ياوسيع العين ياعكف الهدب = شوفتك تسوا معه شي ٍ كثير
عودله ياغايته باللي رغب = لايموت سعود مجهول المصير
وسلامتــــــــكم
الشاعر / سعود ارتيبان الجويّر
العرض الشجري