الاخوان جميع اسعد الله مساكم بالخير اشارككم بقصيده تتطلع لمعانقة احاسيسكم واعتذر عن احد الكلمات الموجوده في عجز احد الابيات لثقلها وعدم تناغمها مع القافيه ولكنها آبت الا ان تكون في القصيده وانتظر رايكم ...
انا يا بنت لي طبع وتقاليد وقيم واسلوم = اسوج اعتا الدروب ولا رقيت ارقا على القمه
ونا يا بنت لي عزوه ونخوه وانتمي لقروم = ولا احني هامتي وابقا بطبعي عالي الهمه
واذا صار الهوى كلمة خضوع وكبرياء ولوم = خلاص انسي محبتنا ولا اسمع من فمك كلمه
واذا كان الهوى عندك مشاعر صادقه وتدوم = تعالي واشربي قلبي غلا لو كان من دمه
احبك قبل ماعرفك وصرتي في الخيال حلوم = يجيني طيفك العابر بصدر الليل واضمه
هلا يا ماس يا لولو هلا يا جوهر(ن) منظوم = هلا بك يا شبيه البدر لامن بان في الغمه
(انا ون جيت ابا اعشق ما عشقت الا خيار القوم = وانا ون جيت ابا اكره ما كرهت الا هل الزمه)
واحب بكل ما تعنيه كلمة حب من مفهوم = واجافي من جفاني واتركه وانساه واغمه
يصحيني سنا البارق ونا غافي بعز النوم = بليل(ن) يحضن العاشق كما طفل(ن) بحضن امه
اسافر في سما حلمي مع برق ومطر وغيوم = وخلف الغيم يجذبني سنا نجمه ورا نجمه
ترى حظي شحيح وعارف(ن) حظي متاه يقوم = اكيد يقوم يا عمري متى ما صرتي بيمه
فقير الحظ يا عمري من احساس البشر محروم = يصير الحزن ابيه ويصبح الهوجاس ابن عمه
بقايا حلمنا والليل والذكرى وذاك اليوم = نهار(ن) كنت انا وياك فيه اقلوب ملتمه
قبل ما الناس تدري عن غلانا والغلا مكتوم = زمان(ن) ما دروا عنا هل الغيبات والنمه
زمان(ن) كنت انا وانتي يسامرنا قمر ونجوم = زمان(ن) نارد العد القديم ونرتوي جمه
وكان العشق حلم(ن) في سما ذاك الغلا مرسوم = نقشته في صخور الوقت واسمي كان فوق اسمه
اجيه بشوق ويجيني بعشق(ن) يا ورااااااه اعلوم = يجيني في هجوع الليل راكد ما حد(ن) همه
على الذكرى تلاقينا وفرقنا زمان الشووووم = زمان بث فيه الحقد بقلوب الغلا سمه
نويت ارحل عن ادروبك مدام ان الوفا معدوم = نويت اغيب عن دربك مدامك غير مهتمه
علي السكران
07-01-2007, 09:53 PM
العرض الشجري