,’,’, خســارة فيــك الشنـــب والعمــامه ,’,’,

[مشاعر حالمه]

السلام عليكم ورحمة الله وبركاته ..

قصيدة كتبتها منذ زمن ..وهي في زوج صديقتي السابق ..( لأنه لايستحقها كزوجه فهو جااااااااحد ونذل )

لاتستغربون لأنها صديقة عمري من أيام المتوسطه ^____^

لو ينبت براسك نخل والله ماآجيك =انا عزيزة نفس وعندي كرامه

اذلف عسى الله لايردك ويبليك =بلوى كبيره ماوراها سلامه

كل الخطا اللي صار من تحت اياديك =خسارةٍ فيك الشنب والعمامه

عزالله ان اللاش واحد يساويك=ياواحدٍ فيك البخل والرخامه

جعل العمى ياخاين العهد يعميك =وتقضي حياتك دايمٍ في ندامه

ماتستحق اللي يحبك ويغليك =ولاتستحق اللي غمرك بغرامه

آخر دعاي الله من العقل ينسيك =وتعيش في دنياك دون ابتسامه

هذا غضب مظلومةٍ من تعاليك =راحت ضحية للجهل والزعامه

ملاحظه / أهديها لكل زوجه مظلومة من زوجها ..

معلومه بسيطه /

في أحد المنتديات المجاوره ...شاركت بهالقصيده ..

ورد عليها شاعر كبير ( سناً وشعراً ) وقال يامحامية صديقتج احنا امام القاضي

وكتب هالأبيات وكأن الطرف الآخر هو اللي قايلها ..

غلطان انا يومي خطبتك من اهليك =احسبك ورده او غزال وحمامه
واثرك كما العقرب خطيره محاريك=ياسرع لسعاتك بصحو ومنامه
انكرتي العشره ومن كان يغليك =والخاتمه اتهم واشيل الملامه

قال يالله يامحامية وش راح تقولين للقاضي ..

( عاد انا أخذتني العزة وقلت والله لاأرد عليه ) <<=== مصدقه عمري محاميه

وقلت هالأبيات

والله ماحدن ضاربك فوق اياديك=يامخطيٍ في حق زرقا اليمامه
انته تدور لك مره تعتني فيك=وانا بغيتك شخص فيه استقامه
اثرك ثعل تلوي ( بذيلك ) تبي ذيك=طلعت شخصٍ مختلف في كلامه

قال الشاعر

هالحين يبي يرد عليك القاضي:

هاذيك تحضر لاجل تسمع دعاويك= يمكن بريئه والبلى بالنمامه

حضرت المذكوره وقالت :

ياشيخ هذي واهمه كيف تغويك= واللي تقوله غيرةٍ لا شهامه
رجله شكى لي كان هالأمر يعنيك= مراته نكد في الصحو والا المنامه
وكلمتها للصلح ياجعلي افديك = ولا لي نظر في زوج مرخي حزامه
ولوني رجل ياشيخ ماظني اخفيك= انحاش عنها قبل ليل العتامه

ويرد الشيخ

الشيخ قرر بعد كشف الدهاويك= الرجل ومراته يودوا المنامه
ومنها على امريكا بلا اي تشكيك= في بعثةٍ تجلي ليالي الظلامه

انا رديت عليه

يالشيخ شف قبل لاتحكم ..

اصبر عسى ربي يعينك ويهديك=ارفق قبل تعرف حلال وحرامه
صديقتي الثانيه بعد هاذيك =لكن الأولى كان فيها هيامه

رد من صديقتي وفيها الختاميه ( بناء على وجود ادله عند المحاميه احم احم )

في ذمتي مخدوعةٍ من معاليك =خذيتني قهر وعناد وغشامه
لو كان عندي علم والله ماالفيك =تهينني واقول انا وش علامه
بالله ماتدري بظلمي وش يجيك=عذاب من ربي يزيدك ندامه
يالله عسى ربي بدنياك يشقيك =مطلقة صارت حياتي هدامه

وسلاااااامتــكم ...

صديقتي هذي دعيتها لاحد المنتديات ولكثرة انشغالها ماصارت تدخل الله يعينها

واذا قدرت تدخل راح أعزمها على منتدى العجمان الشامخ ..

واتمنى انها تحوووز على رضاكم جميعكم ..والسموحه من الله ثم منكم ..

أختكم / مشاعر حالمه _ عزوة ابوها