انا ماني نبي ولارسولٍ يهدي المرتاب

[عايض البقمي]

انا باطرح قضية والنقاش يبين الأسباب=نبى جلسة تبين ماطرحت وتعلن أسبابه
رفيقك وأبن عمك مسندك لابانت الأنياب=لكن المشكلة بالوقت هذا يجرحك نابه
يزور فالكلام ويبهتك بالكذب وأنت غياب=وعهدٍ فات لاغاب الرجل محشوم لغيابه
يسره لو يشوف الضيق فالرجال والأتعاب=ويحزن لو يشوف إنه سعيد وزالت اتعابه
ويفرح لو حداك الدين وصكوا من وراك الباب=هذا شأن الردي عسى الولي يصك له بابه
لاشافك مجلسٍ للطيب قام يفتل الأشناب=حسود ونيته سوداء عساه تنتف أشنابه
تراه بديرته فالليل بومة والنهار غراب=يجمع ماسمع فالليل لأجل الصبح يسعا به
يطيب الرجل راع الطيب يبقى والردي ماطاب=تمر سنين عمره بالردى عايش ويشقا به
وجينا للصداقة والصديق اقرب من الأقراب=صديقك صار ابن عمك رفيقك وأنت تدرابه
لكن اشوف شيء من المصالح صار فالأصحاب=تراك بوقت يارجال لارفقه ولا لابه
ترى حل القضية دين ربي وضحه في كتاب=ومرسل سيد الأمة وعهده حافظ كتابه
أنا ماني بعالم بس ودي نعرف الأسباب=تراها واضحة لايتعب الباحث عن أسبابه
ألا ياللي تكبر وأنت بالأمس القريب تراب=تراباً منه ربك خالقك وتعود لترابه
الا ياسعد من صلى وزكى ثم حج وتاب=يعيش ايام عمره في نعيم وتكثر أصحابه
مصيرك موتٍ محتم ثواب يجيك ولا عقاب=يثاب المسلم الخيّر وغيره ياخذ عقابه
ويفتح باب قبرك يابراد يجيك ولاشهاب=هذا حقك ومن ربك بتومن به وترضا به
هذا شيئاً موكد فيه يومٍ للعبيد حساب=يحاسب ربي عباده وكلآً عارف حسابه
ليا منك دخلت القبر ماتنفع ترى الأنساب=تروح عظام هيكل والعمل مرفوع تجزا به
ترى ربك محذر من عذابه ياذو الألباب=يضاعف لك عملك الزين كثّر منه تكفا به
بتبعث بعد موتك وأنت عريانٍ بدون ثياب=وتحشر والعرق حسب العمل يرقى وترقا به
بيفرح من عمل صالح وياكل من مالذ وطاب=ويسكن في جنان الخلد والله موعد أحبابه
ويحزن صاحب السئية وينزل في حديد مذاب=ويسكن في جهنم جاره الشيطان وأحزابه
انا ماني نبي ولارسولٍ يهدي المرتاب=أنا مسلم غيور وديني الأسلام وأهدا به