إبن صبحان و إبن ريضه موجهه لإبن منيخر

[ناصر بن حمود]

الشاعر المعروف محمد بن صبحان.. يكتب هذه القصيدة

الصادقة والوافية في معانيها اثناء رحلة علاج محمد بن فهد بن مينخر

إلى الخارج وقد اسندها الشاعر مجول بن ريضه.



بالسلامه يعودي






ــــــــــــــــــــــــــــــ

يا لله يا دفاع غثيره بعد ماه=بأمرك توجه مرزمات الرعودي

يا مشفي ايوب من بعد بلواه=ياللي لوجهك لا لغيرك سجودي

يا حافظ ذنون في الحوت وانجاه=انت الوجود ولا لغيرك وجودي

نرجوك ولا فيه غيرك رجيناه=عسى محمد بالسلامة يعودي

ابو فهد لا حل ذكره وطرياه=فعله ينومسنا وسيع البنودي

عز الرفيق اللي من البعد ينصاه=وسيفي لربعه يوم فتل الزنودي

متسلسلي من رأس منصور مجناه=شيخن لصلفات السبايا يقودي

مستارثي الطيب منه وشرواه=عزاز النفوس ومحتمين اللكودي

الله يرده بالسلامه وياقاه=ويرجع من الشكوى سهودي مهودي

هذا الذي في كل يوم نتمناه=ولا فيه شي برادة الله يكودي

يرد من هو تفعل الطيب يمناه=وشوحه بعيدي ولا لطلعه حدودي

ولا هوب من همه رصيده ومخباه=يحاتي الدنيا يبيها تزودي

إلى فقد دينار مازان ممساه=ولا نافع ربعه ولا فيه فودي

ولا محمد جعل الانذال تفداه=الصافي الوافي عريب الجدودي

ويالله عسى عوج الليالي تعداه=ويبطي ما رزت عليه الحيودي

ويالله عسى مجول يبشر املفاه=علم يسر وثابت بالردودي

حيث انه اللي ضايق فرقاه=يا لله عسى الفرقا زمنها محدودي

رفيقه اللي يبعد الهم لا جاه=هو العوض في الشايبين معدودي

من غير اقصور بهادي هو ابناه=وخوانه الوافين نسل الفهودي

وبذكر الله بأول القول واتلاه=رب كريم ومخضري كل عودي


ـــــــــــــ

من جانبه قام الشاعر المعروف مجول بن ريضه

بالرد على قصيدة الشاعر محمد بن صبحان في نفس الغرض

بهذه القصيدة الشاملة للكثير من المعاني



موقف الطيب






ـــــــــــــــــــــــــ

يا الله يا للي تسجد الناس لرضاه=يا واحدي ما فيه غيرك معبودي

ما فيه من يعبد على غيرك سواه=يا ربنا المعبود خير محمودي

يا ربنا المعبود يا الله يا الله=يا ناصري عبده بليا جنودي

القلب جا همي من النوم قزاه=وما نمت يوم إن الخلايق رقودي

القلب كنه يتل من قاصي أقصاه=تل الدلو بعد الصدر للورودي

أبو فهد يا جعلنا ما عدمناه=من المرجلة ما هو يعرف الصدودي

إلى لفينا يا أبو مشعل لقيناه=ومن جاه في الحاجة بيرقا السنودي

الطيب للي موفق الطيب مبداه=ما همته دنياه نقصي وزودي

الطيب له مكسوب من أقصاه وأدناه=حري من أحراري تضد الجرودي

في الطيب نعجز ما نعدد مزاياه=وفي كل ماني قلت عندي شهودي

مرقا العلى دايم على طول مرقاه=حري وميكاره بعالي الرجودي

أبو فهد وشلون بانسى عطاياه=حبله لمد الخير دايم مدودي

أذكر مواقيفه وأذكر سجاياه=اللي لربعه يحتمل للهودي

اللي لرفيقه دايمي يدمح خطاه=وما هو يهمه لو لطيبه جحودي

لا يا بعد نذلي كباري حكاياه=يبي يسود ولا حصل له يسودي

يا الله عساه مجار من كل شكواه=اللي لعدوانه يضد ولدودي

يا الله عسى الدكتور ياجدله دواه=وإنك تسهل كل ما فيه كودي

يا جعل يسقا لا لفانا وشفناه=هذاك والله من ليالي سعودي

مشكور يا اللي أحسن القيل وداه=محمد بن صبحان دايم يجودي

من لابةي تلقى نهار المثاراة=دلاقة فيهم تشد العضودي

ولا قلت قيلي فاهمي كيف معناه=وأعرف لمن تبدى عليه السدودي

أشوف وقتي ضيع إخطاه لقداه=الذيب له منصاب بأكبر جمودي

ــــــــــــــــــــ

خالص تحيتي و تقديري للجميع



ــــــــــــــــــــــــــــ