صاحبي بنشدك عن سر الغلا

[عيد بن شدقان]

صاحبي بنشدك عن سر الغلا =الغرام اللي به اعيوني تهيم
لك بقلب الذيب يا ريم الفلا =برق ليلٍ لاح في روضة خريم
مزنةٍ هلّت بوااااابلها على =صدرك اللي لاعبه كف النسيم
اطرقٍ مفدوع والمشيه (. دلا .) =واسود الحجاّن خطٍ مستقيم
والبرد بين الشفايف والحلا =ينسكب منها على فم السقيم
الرموش انياب سرحانٍ كلا =ابتغنّاجه شرايين الكريــم
الشعر شلال يغرق ما سلا =عن غريقه لين توّجْه العظيم
الصدر كنّه قزازٍ و امتلا =بحمر التّفاح مقسوم الصميم
والظهر قوسٍ وظهره للخلا =واتّهادى فيــه جنّات النعيم
وان مشى كن مشيته بين الملا =شيخ قومٍ مالي اعيون اليتيـم
وان تكّلم كنّه اغلامٍ تلا =آية الكرسي على الشيخ الحكيم
وان تبسّم كن في قلبي علا= صوت ميّت صاح واعظامه رميم
البلا يا صاحبي والله البلا =طاح فيني من عرفتك يا لئيــم .
اشهد انّي في عيونك مبتلا =ضايعٍ ما بين زمزم والحطيــم
لا يغرّك عنفواني لا ... ولااا =بالحشى مسكنْك والله العظيــم
لو سحابك ما على الكل اعتلا =ماجرح بارق سحابك عين غيم
لك خفوقٍ يوم أعلنت الولى =لك قبل عامين يالوجه الوسيم
كل ما ضاقت علي يسري صلا =بيت قلبك يطرق الباب القديم
يعرف انّه لا طرق يسمع (. هلا.) =ياهلا بالنور في الليل الظليم
صاحبي في ذمتّي ثوبي بلا =كل ما ضاقت نقول (.(. الله كريــم .).)
كافر الدنيا على وجهي طلا =صبغه الحارق وكنّي له غريــم
رغم هذا ما نسيتك (.يالغلا.) =فاحت الدلّه على جمر الهشيــم