بعد امطار الخير

[عجمي الوادي]

بعد امطار الخير التي هطلت على معظم مناطق المملكة قبل ايام ... قررت شلة الإستراحة الذهاب في رحلة مكشاتية الى مناطق الربيع ... وبعد بحث وتحري وسؤال ومشاهدات لمواقع انترنتية قررنا الاتجاه الى منطقة الصمان ..بعد ما ذكر لنا ان الربيع هناك طيب وفي بداياته ... اتجهنا صباح يوم الأربعاء الماضي على طريق الزلفي – الارطاوية – ام الجماجم وبعد ام الجماجم بمسافة وقبل مفرق مشذوبة نزلنا يمينا على نفود الدهنا ...وكان وصولنا ظهرا ... قررنا المبيت تلك الليلة في النفود ... وه بس .... الكتابة باللغة العربية متعبة ...ابهرج على راحتي ...المهم ... هذي صورة لمكاننا باليوم الأول ..وكانت ليلة كويسة جميلة وش ملحه وش زينه جو ولا اجمل ونفود متماسك عقب السيل ويوسع الصدر

وهذي صور من اول يوم

تكيتنا في الدهنا في اول يوم ...

شبة النار والمعنى وعلوم الرجاجيل في الدهنا <<< وينك عن ياريف النشاما على هالسجع ... اصلح اصير خباز .
؟

نصب الخيمة وكان من اهم اهداف هالرحلة هو تجريب هالنوع من الخيام ...وكانت ممتازة لولا بعض الصعوبات في تركيبها ..لكن على العموم تعتبر جيدة وابعادها هي 3في 2.5 تقريبا .. وهذي صورتين للخيام



http://us.f1f.yahoofs.com/bc/4ad16e4b/bc/Mail+Attachments/untitled3.bmp?bf_bxDCBxiAzCN0A[/img]ments/untitled2.bmp?bf_bxDCBQRAMT3Qj[/img]
بعد ما اصبحنا يوم الخميس اتجهنا على طريق الأسفلت ومن بعد محطة ام رقيبة بمسافة بسيطة وبعد ما تزهل لنا الشيخ جارمن بعد توفيق الله طبعا وسمح لنا وقال من هنا انزلوا لإحداثيتكم اللي هي رديفة فيضة الحاج ...وكانت المسافة 108كلم قطر يعني الأكيد انه اكثر مع اللفات والمطبات ...وصلنا الموقع قبل العصر بشوي .. والصراحة الطريق كان متعب وبعيد جدا .وشفنا ربيع طيب في بداياته وكانوا الشباب ميتين جوع وما لقينا بدربنا احد يبيع خرفان ولا حتى برابر ولاعلى الأقل وبر ولا جراد ... المهم تكينا واتفقنا ان بعضنا يضبط الجلسة وبعضنا يروح يدور لنا خروف علشان ندغدغه لمين يموت من الضحك همن نلهمه ...راحوا الشباب ما لقوا شي قررنا نأجل سالفة الذبيحة لباتسر وتكينا في الروضة وقبل صور الروضة وبالطريق الى الروضة لقينا قطيع من البعارين والبعرينات ...وليقنا بعيرة ترضع ولدها فلتقطت له صورتين
الصورة الأولى

وهذي صورة مقربة بالزوم.....شكله يقول ماما مين الناس دول شكلهم متوحشين

صور لفيضة رديفة الحاج .... والربيع اللي يوسع الصدر



اتجهنا صباحا يوم الجمعة بعد ما افطرنا الى الموقع التالي المذكور بربيعه ..اللي هو خبراء البخراء وكان اتجاهانا شمال شرق تقريبا المسافة 36 كلم تقريبا ...وبعد ما وصلنا للخبراء لقينا ربيعها زين ماشاءالله والجميل بالأمر اننا لقينا بها قطيع نعيمي سالنا الراعي هن للبيع قال نعم قلنا ماشاء الله طيب على كم قال على 400 قلنا هات لنا حبة هريفي بس لايكون لاعب النصر ..قال روحوا لراعي الحلال هو اللي يبيع عليكم ..قلنا وينه قال هناك في بيت الشعر اللي عنكم مطلع قمر ..اتجهنا له ولقيناهم جامعين بين القديم اللي هو بيت الشعر والجديد من التقنية اللي هو صحن استقبال


المهم يوم فاوضوه الشباب قال روحوا للراعي والولد هم يبيعون عليكم ...قلنا تونا جايين منهم قالوا روحوا للشايب ..قال ما عليكم روحوالهم بس وهم يبيعون عليكم اصلا هذي حركة نسويها حنا بالرخوم ..قلنا تسلم تسلم نحسب كلمة رخوم كلمة مدح يوم سالنا عنها بالرجعة اثرها مسبة ..الله يسامحه

رجعناواثناء رجعتنا للراعي والولد لحقنا ولد ثاني للشايب وقال ترى السعر ب 450 قلنا حنا متفقين على 400 قالوا عاد البورصة قفلت على 450 تبون او اطبخوا غداكم على حصى ...قلنا الشكوا لله .. ناخذ ...اصلا الجوع لاعب بنا ولو قالوا ب 455 نبي ناخذه ... وهالحين بعض صور ربيع خبراء البخرا



الصورة عاد هذي كانت حلم الشباب ..لأن فيها اول وجبة تحتوي على لحم الهرفي الطيب اللي وش زينه .. من زينه ودي لو اني ضامه لدفتر العائلة ...



وقت عصر يوم الجمعة في خبراء البخرا

صباح يوم السبت

الكبدة ...وهي من عمل الشيف ابو ابراهيم ...متخصص ومنفذ مشروع تسمين الشباب 10 كلجم في 5 ايام

وفي صباح يوم السبت اتفقنا على الاتجاه الى الرفيعة وبعدها الى الشوكي والتنهاة ... كانت المسافة للرفيعة بحدود 40 كلم ....وقبل ما نحرك من الموقع ....قمنا بتنظيفه ...فكان هدفنا ان من يجي للمحل يفرح به وبنظافته مثل ما صار لنا ..ويتضح الكيس اللي حطينا فيه الزبالة الله يكرمكم

وهذي صورة الموقع بعد تنظيفه


وبعدها اتجهنا الى الرفيعة ومنها الى الشوكي والتنهاة

وبالطريق بين الرفيعة والتنهاة والشوكي كان الخط للبعارين مهوب للأوادم ...راعين الحلال محتلينه ولا جابوا خبر الناس اللي تستخدمه وهذي صورة للبعارين

وفي الطريق الى الشوكي صادفنا حالة ولادة .... واليكم الصورة

شعيب الشوكي

معتحيات

عجمي الوادي

[جالس بن مبارك]

لاهنت يا السنافى على السالفه و اربكم استانستوا
بس ترى الصور ما ظهرت

[كويتيه]

يعطيك العافيه اخوي
بس نفس الشي الصور ماطلعت

[عجمي الوادي]

مشرف لورنس


باللة شفلنا حل لهذة المشكلة اول مانزلت الصور في المنتدى كانت طالعة انا شفتها بنفسي



مراقب كويتية



همتكم ياشباب


تحياتي