من روائع الشيخ تركى بن حميد العتيبى

[يتــــــرنم]

من روائع الشيخ تركى بن حميد العتيبى

شيخ شمل قبائل برقا من عتيبه

البارحـه بالنـوم كنّـى مــوراّ

جا حلـم ليـل يـوم عبّـر ولاشيـف

اونست هاجوس علىالصدر مـراّ

منـه الفـواد معـلّـق بالمخاطـيـف

وابدى كنين الروح داخـل وبـرّا

مـن نقـض مايفتـل وفتـل بتكليـف

يارازق اللى فـى رجـاك يتحـرّا

من مدّ جـودك ياوسيـع المحاريـف

ان جـت مـن الله ماعدويـضـرّا

وليا ادبرت قلـت دبـور المصاريـف

مادون ربـك واحـد لـك يسـرّا

للـرب حكمـه بالمعانـى وتصريـف

قـم يامحمـد سـوّ حلـو ومـرا

رسم الى جوك النشامـا هـل الكيـف

مع منسف حـول المنـاره يجـرّا

واشناق حيل صفوهـا لـه ذواريـف

واعمل بخير ولا تجـازى بشـرّا

وارجى الفرج من عند والى المصاريف

واجهد بتقـوى الله لـدار المقـرا

العبـد طرقـىّ ركـابـه مناكـيـف

دنياك لـو زانـت تراهـا مغـرّا

دنيـا خـراب ولا عليهـا تحاسيـف

فيهـا لبيـب العقـل مـا يستغـرّا

لـو امهلـت لابـد رحلـه وتخفيـف

اخشـع تواضـع لا تكبّـر تـزرّا

ما شفـت ميـلات الليالـى مراديـف

ورفيقـك الغالـى منـه لاتـبـرّا

ادمح خطاه اللـى تعبّـث عجاريـف

يشرب معك صافى وكـدر ومـرّا

ويرد معك حوض المنايا الـى عيـف

نوب تـذرّى بـه ونـوب يتـذرّا

عديـل عمـرك باليالـى الشفاشيـف

جر القلم واكتب لنـا اللـى تـورّا

سلام احلى مـن حليـب المشاغيـف

منّى لمن تابع هـوى كـل غـرّا

شيخ يـروّى بالملاقـى شبـا السيـف

زيـزوم غلبـا كـل يـوم تجـرّا

واطرافهـا تاطـا الغبـا والمشاريـف

ذولـى يسرّحهـن وذولـى تسـرّا

وذولـى مغيـرات وذولـى مناكيـف

والى عدا باللى عـدا فيـه غـرّا

بر بع على قحص المهار المزاغيـف

سلاحهم شغـل العجـم والمجـرّا

ودهـم الفرنـج مفرّقـات المواليـف

وصلّوا على المختار والصحب طرّا

ماهبت الانسام مـن رايـح الصيـف

وسلامتــــــــــــــــــــــــكــــــــــم

أرجوا من عنده علم بسالفة هذي القصيده أن يتفضل برسدها مشكوراً


أخيكم / يتــــــــــــــرنم

[فلاح ال مخلص]

واعمـل بخيـر ولا تجـازى بشـرّا

وارجى الفرج من عند والى المصاريف

واجهـد بتقـوى الله لـدار المـقـرا

العبـد طرقـىّ ركـابـه مناكـيـف


صح لسانك


وبيض الله وجهك

[المناجي]

يتــــــرنم ...

لاهنت على هالقصيده الرائعه ....للشاعر و الفارس الشيخ تركي بن حميد والذي تعرفه الصحراء والمعارك ورايه لاتعرف الخذلان ....

اخي الكريم اعتقد ان القصيده ليس لها حدث او قصه انما الزهد بالدنيا والنصيحه.... تحياتي


.....المناجي

[اطياف الماضي]

يترنم

صح لسانك ولسان الشاعر

يعطيك العافية

[محمد العتيبي]

يترنم

يعطيك العافيه وبيض الله وجهك على النقل
والله يرحم شيخ عتيبه

[هند]

يترنــــم

صح لسانك ولسان الشيخ ( تركى بن حميد العتيبى )

أبيات رائعه وإختيار موفق

ننتظر القادم



السؤدد

[تركي العصيمي]

لاهنت على هالقصيده الرائعه ....للشاعر و الفارس الشيخ تركي بن حميد
مشكور ياغالي