.. المستحيــــــله ..

[بحوور]

عبير بنت أحمد .. روعــة و وهج .. لا ينطفـئ ..

استمتعـوا معـــي ..




لا تمادى فـ الأمـاني ... والأماني مستحيــله
لا توقف فالمسافة بين (إحساسي) و (ظله )

ايييه ياللي تحسب اني رايقه .. شفني عليـله
لا تصدق بإنني لا صــرت اغنى مسفهلـــه

لي حبيبٍ من فقدته .. صـارت البسمة دخيله
ماخذٍ قـلبي وخـلا الجـــرح يدمي في محلــه

كان لا جاني عبوس ٍ ..راق .. لافك الجديلـه
كيف لا جاني مـروَق .. يوم كــلي رايق ٍ لـه

شامخـة .. لكنَ مثلـــه يستحـــق اني أجيـــله
ولو بغـى راســـي بكل العـز .. خليته يتلــــه

بس مدري وش بلا المحبـوب شوفاتة قليــله
وفجأةٍ ما عاد له شوفه ومدري وش حصل له؟

عـــادة الدنـيا على العشــــاق فاللقيــــا بخيـــله
وإن بغت تجزل عطاها جابت هجوس مملـَـه

( هو على عهده ..أو انه لاقي عنَـــي بديـــله ؟؟
أو تناساني وانا اللي ذابحه نفسي وفــا لــه .. ؟؟ )

منبــــري عودي من الفرقــا .. وانا اصلا نحيلــه
ما درى بأن العطر مرهون به .. يومه يعلَــــه ؟؟

بس اقـــلب ذكـــرياته .. ليلـــهٍ من بعـــد ليلـــه
والألـــم بعضه ترى يذبح .. أجل وشلـون كـله

يا ترى وش آآخـرة صبــري على حمولٍ ثقيـله
هو بقـــى فالعيــن دمع ٍ ما نشف .. حتى أهلـَــه؟

ورغم اللي حصــل بأقولهــا .. ( يا حبنيـــله )
ورغم كل اللي يبــووني .. عفتهم بس فدوةٍ لــه

آآه يا لـــيت الشعـــر يجمع خليلٍ مع خليـــــه
كان مـا خليــت خلٍ في المــلا دون خلـــــــه

وانت ياللي تحجج بالهـوى .. عطني دليلــــه
ميــر يا كثــر الهواويَــــه ويا قــل الأدلـَــــه

انت .. قدَ الحب .. يوم انك تجاهد سبيــــله ؟
وإلا ظنك .. كل من جاهد يبي قلبي .. وصل له ؟!

جايز اني شاعرة واكتب احاسيس جميلــــه
بس انا ماني مجـرد شاعرة ياللي .. مولـَـــه

ميــر دامك عاشق ( شعري) وانا بنت اصيله؟
دوكَ شعري .. واترك الخافق ترى منتب هل لـه

خلنَـي عنك .. تراني واثقــة مـــــالك وسيلـــه
شف لك أية شــاعرة تنشر صورهـا في مجلـه

إعـرف انـــك تحلــم في غــرام المستحيـــله
لا تحرَك لك من احساسي .. ولا حرَكت ظلـَـه




ســـــلامتكــــــمـ