ياحمود ماحولك خبر عن عذاب سعود = ضافي الجديله ترف الاطراف وشلونه
ياحمود انا عندك خبر مبتلش بقيود = وان العرب ذولاك ياحمود من دونه
ان رحت ادوّر له واراقب عليّ منقود = عيب وحكايا الناس ماهيب مامونه
ويلي على شوفه وقربه غضيض العود = عليه قلبي ذاب والعين مفتونه
عن شوفته محروم ومبعـّد ومجحود = يابخت منهم كل لليله يشوفونه
وانا تمنـّا لو ورا بابه المردود = لمحات زوله وابرد الجاش وغبونه
الله يجازي بالفكر ذعذعات النود = لاقام يومي بالشجر رطبة غصونه
يلهم علي ذكرا الغضي بالليالي السود = ثم يستبيح الهم سـّدي بمكنونه
ويسهرني المكنون والمسلمين رقود = عزي لمن مثلي سهيراة ٍ عيونه
ليتك تبشرني بقلب الغضي ياحمود = قلبه عسا مافيه ناس ٍ يحلّونه
عساه مبعد من دروب الهوا المقرود = وعساني اول واحد ٍ صار مجنونه
انا على اعصابي وهمي ترى مكبود = هم ٍ على هم ٍ رجا لاتحطونه
يكفي من الهم البطى بشوفتي للذود = وضح ٍ لبو فارس رعاها كما عيونه
قدلي من الشرهات حول شهرين وزود = دايم وانا محروم ! يالله بك العونه
ياحمود حلّ المسأله فيدني يالفود = وامنع من الواشين شي ٍ يريدونه
كيد الحسود وفيد من بالحسد محسود = علّ الفرج هوّ في فرح روح مسجونه
والطيب لاهل الطيب يامنبعه مردود = عجـّل وعطني من هوا البال مضمونه
وســـــــــــــلامتكم
الشــــــــــــاعر/ ســـــــــعود رتيبان الجويّر
العرض الشجري