يا رب صبرني / حمد المغلوث

[زود الغـــــــــــلا]

اسعد الله اوقاتكم ...

(تمتعــــــــــــــــــوا...)

يا رب صبرني على امـرك وبلـواك =واجبر عزا من شاف ضيـم العزايـر
مثل الدريك اللي على حوض الادراك=يبكي ودمعه فـوق الأوجـان جايـر
يا عين هلـي ذارف الدمـع سفـاك=وابكي وهاتي ما خفـا مـن عبايـر
يـا عيـن لا تبكيـن هــذا ولا ذاك=لا ولا فرقـا الأهــل والعشـايـر
ابكي على سمح النبا حسن الاسـلاك=اللـي عليـه مغـوزر الدمـع فايـر
قلبي عليه مـن الولـع فيـه دكـاك=والحـال منـي خلصـت بالحسايـر
كني ربيط الروم فـي وسـط شبـاك=ولا كسـيـرٍ موجعـتـه الجبـايـر
قدم العرب غادي بشـوشٍ وضحـاك=والكبـد يصلاهـا لهيـب السعـايـر
يالله يـا والـي تصاريـف الافـلاك=يـا مطفـيٍ نـار السنيـن العسايـر
يا مـن لعسـرات الشرابيـك فكـاك=والي السماء والـي جميـع البصايـر
اسألك من جودك وفضلك وحسنـاك=تجمع بشملـي مـع ظبـي الزبايـر
الجادل اللي يصقـل السـن بالـراك=حاوي محاسـن محصنـات الخدايـر
سبه عزاي وصـار للـروح مـلاك=وارخصت له عمري ومـا بالذخايـر
يا زين روحي يا أريش العين تفـداك=حيثك هواي وعن هوى الغيـر ذايـر
علـي نـذرٍ ان ولـف الله بلامـاك=لا رزّ رايـات الـفـرح والبشـايـر
واصـوم لله مـا تيـسـر لعيـنـاك=وابنـي لحبـك بالضمايـر منـايـر
يا زين يا عذب اللما كيـف بنسـاك=والحب سلطانه علـى الحـال جايـر
يا مـورد الخديـن محلـى سجايـاك=يـا سيـد كـلّ المترفـات النضايـر
يا زين شفني من غرامـك وفرقـاك=كني علـى جـالٍ مـن اليـام هايـر
سهرٍّ ونوح بنوح ورقٍ علـى الـراك=معـذا تصفقنـي ركـون العـوايـر
يا بو محمد يا فتـى الجُـود بنخـاك=يا فرحـة المضيـوم يـوم الكسايـر
شف لي طبيـبٍ شاطـرٍ لا عدمنـاك=كـوده يـداوي عـلـةٍ بالضمـايـر
والا فنـا يـا معـدن الجُـود ويـاك=نركب على ثنتيـن عـوصٍ حرايـر
نركب عليهن يا فتى وقـت الامسـاك=من دار أبو جابـر عزيـز القصايـر
والعصر حول مريخ وبيمـة اشيـاك=ومنكبـيـن المـزهـره والنقـايـر
يا بعـد والله يـا القعيمـي معشـاك=ان سـلـم الله مـردمـات القفـايـر
يومين والثالث علـى الهـون ملفـاك=هجر منازل مـن لـه القلـب طايـر
فيـلا لقينـا ديـرة الـربـع ذولاكا=لوصل يطفي ما لجـا مـن زفايـر
وامسي لكنـي مالـكٍ كـلّ الامـلاك=امـلاك سلطـان البحـر والجزايـر
والـى لفينـا دافــع الله منـايـاك=مرخوص يا مروي السيوف الشطايـر
الا ان يطيب الكيف لك فانت برضاك=اتـم انـا ويـاك للـحـول دايــر
عند السياسـب لابـةٍ مثـل شـرواك=الكـل منهـم يحتـمـل بالخسـايـر
اهـل دلال كالغرانـيـق ودكــاك=وحِيـلٍّ تقلـط للوجـيـه السفـايـر
يا بـو محمـد عانـك الله وعافـاك=وذراك ربي مـن حتـوف الدوايـر
شفني من الفرقا ولا الحـال يخفـاك=مثل المريض انهض ولانيـب ثايـر
مـن فقـد طفـلٍ للمعاليـق مسـاك=الجادل اللـي مـا يـدوس الوزايـر
كامل تواصيفـه ولا هـوب حشـاك=الا ولا يــومٍ لقـيـتـه مـكـايـر
منـزهٍ عرضـة ولا هـوب دكـاك=بالشين حاشا ما سمـع شـور شايـر
من صلب شغمومٍ ضحى الكون سفاك=لادما العدى يـوم اشتعـال الذخايـر
سمـحٍ سلوكـي ولا هـوب شكـاك=ومغفلٍّ مـا هـوب راعـي عبايـر
ربي كساه مـن المحاسـن والابـراك=ثـوب الجمـال وكمّلـه بالستـايـر
الخـد كالقنديـل واللـحـظ فـتـاك=يغري الضمايـر والذوايـب حدايـر
متعثكـلاتٍ يسهجـن روس الاوراك=مثل الدجـى فـوق الردايـف نثايـر
علمي بشوفـه يـوم الاثنيـن هـذاك=قبـل المديـد بعشـرة أيـام زايــر
سَلّْم علـي وقـال بالـك و حـذراك=تفضي السدود ولو تشـوف النكايـر
واعرف ترى ما لي عزى عن ملاماك=الله يبـور بملـزمـة كــل بـايـر
ليـاك تطرينـي ولا جِيـب طريـاك=عنـد العـرب والله عليـم السرايـر
وارجـي عسـى ربٍّ بلانـا بهـذاك=اللي وداده في حشـا الـروح صايـر
يجمع بشملي بأريش العيـن وهنـاك=هالعمـر خيـره لـو بقـى للودايـر
والختم صلى الله على المصطفى ذاك=محمـد المبعـوث مـا سـار سايـر

الشاعر/ حمد المغلوث