قصيده مهداه الى ابو حمد الشامري

[السياسي]

((دقـــيـــت نـــجـــري))

شبّيت ضو المعاني من طرف ضـوّي=( ودقيت نجري) ومن سمعه لفى صوبه
الهيل والبـن كيـف الـراس ياجـوّي=يوم اكثر النـاس جـوّه درب لذنوبـه
وانا بذكـر الولـي والعـزم متقـوّي=ونـار المعـزّه بفضـل الله مشبوبـه
والعبـد ينـوّي وربـه دايـم يسـوّي=والرجل لولا طموحه ضـاع فدروبـه
ياخالط السّم وسـط الشّهـد يامخـوّي=خوة سواتـك لمثلـي اكبـر أعجوبـه
اقصى علومك ماتوصـل قمّـة دنـوّي=وقمّة شموخي على لحيتـك محجوبـه
الله يشافيـك والله يزيـد مـن قــوّي=ورجلي على و ِجهتك ماهي بمغصوبه
انا احسب إخطاي من خلفي ومن توّي=وانته رجل مااستحى من كثرة عيوبـه
وجهك من العيـب متوشّـم ومتكـوّي=وراع الردى يستوي راسه وعرقوبـه
وانا رجل محتسـب للطيـب وانـوّي=وانته لبسك الخمل لبس الرجـل ثوبـه
وانا احمدالله في كثـري وفـي شـوّي=دام ان يميني مع اهل الطيب محسوبـه
وان عوّّدت للشعر شف قافـي يـدوّي=وانتـه قوافيـك معلولـه ومنكـوبـه
انا في بحـر المعانـي مانـي بتـوّي=اغوص فـي غبّتـه واميّـز اسلوبـه
ولا جاك بيتي ماجاك اعوج ومتلـوّي=ياللـي يضيّـع اهجينيـه بمسحـوبـه
هذي سما الشعر وذا نجمي وذا نـوّي=وشفني محلّـق سمـا وانتـه بغيبوبـه
ومادام راسي جزل والفكـر متـروّي=وشلـون مايدحـم الضيقـات بجنوبـه
ياجعل يفدانـي اللـي مثلـك مهـوّي=اللي يشيل الخزي في داخـل اجيوبـه
عن خوّتك حاشـم شـرواي وسمـوّي=ماوالله ينـزل سمـوي لـك ولا نوبـه
جتك المعاني وسو اللي تبـي تسـوّي=ماعندي بلحيتـك ياراعـي (الكوبـه)

الشاعرمحمـدفهدالعرجانـي


السياسي (( والمعنى في صدر الشاعر ))

[ابوحمد الشامري]

مرحبا الف بأخي العزيز ( السياسي ) وأشكرك على الاهداء يا السنافي وترا غلاك من العين اليمنى الى العين اليسرى انت وجميع أعضاء المنتدى.
وهاذي قصيدة مجاراه لقصيدتك أخي العزيز ( السياسي ).

أنا للكلام الزين يا ( السياسي ) يا حبي= وراعي القصيده داعب القلب بسلوبه
تشوّقت فيها لقيتها لبي=تشوّق محبٍ شايفٍ زول محبوبه
على شان في موضوعها ما حرش ضبي= وخلاني أمشي مع مماشيه ودروبه
هجوسي أتكبر مع معانيه وتلبي=وهو يشتكي من قسوة الوقت وخطوبه
ويلوم الهذور اللي على الهذر متربي=مشاهد إعيوب ما شاهد اعيوبه
بخيلٍ ذليلٍ عِلته ما لها طبي= وشذب القِفاء غاية مرامه ومطلوبه
عسى ساق من لامه بما قال تنجبي=نتيجة قذيفة بندقٍ وجهت صوبه
ليا ضبها الجبار ما عاد تنظبي=صوابه من الركبه لياحد عرقوبه
فأنا الوقت مثلك يا ( السياسي ) شيب بي=وخلاني أشكي من بلاويه وكروبه
ذلول الهواجس دايم الدوم تشعبي=ونوبٍ يغيبي عن الكون وشعوبه
أصارع همومٍ عن يمومي تغيب بي=وتكشف لي آفات عن الخلق محجوبه
وأنا في رجا اللي بأمره الغيث ينصبي= مدبر ابن آدم خالقه غافر ذنوبه

أخوك أبو حمد الشامري

[ولد ال صالح]

الله عليكم

ياسلام

كفووووو والله بالشاعرين

محمد العرجاني

و

ابو حمد الشامري

صح الله لسانكم جميع

لاهنتوااا

تقبل

سلااااااامي

[السياسي]

يا مرحبا يا بو حمد وهذا قليل في حقك , وشكرا على القصيده ولا هنت


السياسي

[السياسي]

ارحب يا ولد ال صالح ولا هنت على الحضور


السياسي

[راكان اليامي]

ونعم في بن شايقه وفيك يالسياسي

ولا يهونون الجميع

وتستاهلون الخير

[السياسي]

ارحب يا راكان وما عليك زود يا السنافي ولا هنت على الحضور


السياسي

[أبوعمير]

لاهنت على المشاركة يالسياسي وتستاهل

وصح الله لسان أبن نادر وأبوحمد الشامري على القصيد الجزل

ونعم بالجميع وتستاهلون الطيب

أبو عمير

[طويق]

الله لايهينك يالسياسي على المشاركه الطيبة

ودايم معودناعلى هذه المشاركات الجميله ويعطيك الف عافيه

وصح الله ألسان محمدالعرجاني وابوحمدالشامري,,,,,,,,

[السامر]

السياسي

مبدع دائما في طرحك وفي نقلك


لاهنت يالسياسي

وصح لسان محمد العرجاني

وابو حمد الشامري


ولاهنت

وتقبل تحياتي


اخوك/ السامر