صلي لحالش وانا باصلي لحالي

[ابن وعيل]

يا بنت ليجيت اصلي ما لـش ومالـي
لا اجيب لـي عيـد لا بعـده ولا قبلـه

صلي لحالـش وانـا بصلـي لحالـي
اخاف قلبي هدب عينـش يوجِّـب لـه

واضيِّـع اللـي نويتـه بـاول وتالـي
وتصير عيني الامـام وعينـش القبلـه

وش عاد تنفع صلاتـي وانتـي قبالـي
لا قلت بدل الله اكبـر حـي ذا القبلـه

واعيد فرضي عشر مرات لـو جالـي
وفي كل مره هدب عينش يعرقـب لـه

اللي لقتـل الشجـاع يسيـر مختالـي
وان قيل له كم بتاخذ ؟ قال وش هبله !!

ما انلام لو قيل جـن وصابـه هبالـي
وانتي جميـع الخلايـق فيـش منهبلـه

تدرين وانتي بعيـده / كنـش ظلالـي
طيفش يدورج وعيني بس ترقـب لـه

ان قلت بنساش واعقد دونـش حبالـي
أقبل وقطـع حبالـي ثـم عقـد حبلـه

كنه حلف ويـن مـا الـد يتهيـا لـي
ولا حلف قال طرفك والله لانشـب لـه

اجلس مع النـاس لكـن دالـه ٍ سالـي
ولي عين كنها علـى السلهـام منجبلـه

وجيه تمـلا المكـان وناظـري خالـي
وان سولفوا تحلف ان اذني بـلا طبلـه

الا لما جابـوا اسمـش لحـت بعقالـي
وفزيت فـز بـدوي ْ لسارقيـن إبلـه

وليشفت نظراتهم تبحث خفـى احوالـي
وكنها مـن الشـك والتنغيـز معتبلـه

سويت كنـي ازبـط وضـع دسمالـي
وان قالوا اشفيك قمـت الـف واستبلـه

ادراش عـن ناقليـن القيـل والقالـي
ما ابغاه يدري بش اللي ما يحطب لـه

وابعد عن الناس خوف عيـون عذالـي
العـاذل اللـي سببـه الكبـد مندبـلـه

في خايع ٍ فيـه كـن ذكـراش همالـي
وما غير طيفش معي من ربلـه لربلـه

كنـه ايتمايـل مـع دنـدان مـوالـي
ويرد ما قلت وانـا ارد واطـرب لـه

وقلبي من الشوق لا ميـل معـه مالـي
وليتثنـى يفـز القلـب يلـعـب لــه

من بن شوقـي مبهـر لاجلـه دلالـي
والشعر مثل القدوع اللـي يقـرّب لـه

اجمع غرامش مـن عروقـي بفنجالـي
واسقيه فنجال دون الخلق يسكـب لـه

يلعب على رمش عينـي ويتثنـى لـي
وليتعب يفترش جفنـي واطبطـب لـه

وليسرى شب ضو الشـوق فـي بالـي
يدفى على جمر حر ٍ مـا هـو بعبلـه

من كبر حبش غدى كنه اصغر عيالـي
ما اغير اداريه واراعيه واحسـب لـه

كتبت لش في غيابش مـا بـرا حالـي
يا كيف لو شفت زولش ويش بكتب لـه

كيف الشعر لا انتثـر يشبـه لشلالـي
روح بقلب ٍ شجـاع ٍ كـم تزهـب لـه

ولا الجمر كيف يحمي المبسـم الحالـي
اللي هماجه رحيق النحـل ينسـب لـه

ويا كيف برق الثنايـا يشعـل اشعالـي
هو بس يقدح وشعـري ينهمـر وبلـه

وكيف الزهر من عبيره ينتشي الخـال
ِاللي يحرس الزهر لا احد ٍ ( يهوب له )

ويا كيف عود ٍ مـع النسنـاس ميالـي
من قال بان لش شبيه يقول هذا أبلـه !!

يا كوثر الحب يـا ياقـوت يـا غالـي
يا كيف انا في يمينش ما احسـد الدبلـه

ويا كيف اوفي الصلاه وترفع اعمالـي
وانتي قبالـي وجفنـش مرخـي ٍ نبلـه

صلي لحالـش وانـا باصلـي لحالـي
يا بنـت يكفـي لعبتـي فينـي السبلـه

...
..
.

وسلامتكم .... سالم بن جلعان