الغرب يصنع طائرات وصواريـخ=والشرق الاوسط ضاع نفطه بلاشي
حطوا لهم في صفحة العلم تاريـخ=وحنا بماضينـا نعيـد النقاشـي
من عقب ماكنا جبـال شواميـخ=صرنا تحت حكم الاجانب ولاشي
شـي يـدوخ الـراس تدويـخ=وشلون عقب الحر حام الفراشـي
اقولها والقلب اقوى مـن الصيـخ=متى نشوف الحق في الارض ماشي
لاني ولد تاجر ولاني ولـد شيـخ=انا فقيـر وراس مالـي معاشـي
( حمود البغيلي )
----
ردّ للشاعر ( باقي المفلح )
يابن البغيلي للعـرب بعـد تاريـخ=مـن قمـة لقمـة كـلام وتماشـي
شف هالجرايد كلها صورة الشيـخ=والشيخ مايسـوى خسـارة فلاشـي
واعلام شاطر في عروض المفاصيخ=والحر يكفخ بين مرشـي وراشـي
والا شباب مـن العوايـد مساليـخ=والا بنـات للنصـارى تمـاشـي
للي يقـول الحـق ياحمـود تكفيـخ=وللي يقول الـزور عـز ومعاشـي
ارهابي اللي ينصر الديـن ياشيـخ=والا اليهودي ياخـذ ارض وكاشـي
خلك بشعر المدح مـدح الشواميـخ=اللـي معاركهـم بكـاس وفراشـي
حناالعرب مابيـن كـوره وبطيـخ=فـي كـل ملعـب تلتقينـا نفاشـي
بننتصر ياحمود بالطـاخ والطيـخ=كم الف مطرب سوقهـم بانتعاشـي
بافلامنا بنوصل الصوت للمريـخ=وببشوتنا بنصد قصـف الاباتشـي
بالرقص نقدر نكتب احلى تواريـخ=مادام صرنا بيـن خايـن وواشـي
واموالنا ترجـع علينـا صواريـخ=وجروحنا تنزف ولا فيـه شاشـي
هيا تعـال نوجـه لبـوش توبيـخ=ليه العرب يابوش عنـدك مواشـي
ونحذرك يابـوش يكفيـك تلطيـخ=لاتحسب ان الـدم ضـاع ببلاشـي
حكامنـا يابـوش شلـة مدالـيـخ=لكـن يجونـك ساكنيـن العشاشـي
ناس تسمـع صوتهـا للمصاميـخ=ناس تمـوت اعراضهـا ماتناشـي
يابوش صبرك لين تلقى المطانيـخ=اللـي يـردون الذيابـه كبـاشـي
اهل الفعل يسقونـك الـرد زرنيـخ=اللـي مـع الله لازميـن المماشـي
---
وهذا رد آخــــــــــر
الله من قلب تقـل داخلـه صيـخ=كن الجمر ولع على وسط جاشي
هذا زمان فـرخ الكفـر تفريـخ=شين يخلي بالضميـر اندهاشـي
ينبح علينا الكلب ويكشـر الذيـخ=والثعلب المكـار فيـه استهاشـي
لونا اطعنا مرسخ الديـن ترسيـخ=اللى صحابته هاجـروا للنجاشـي
ان كان نوخنا هل الكفـر تنويـخ=نسوقهم سـوق الغنـم بالحواشـي
انطوع هل الغرب والصين والسيخ=وناخذ عليهم جزية الديـن كاشـي
تكمخ المجرم على الراس تكميـخ=ولا عاد يقـد يهتنـي بالمعاشـي
ودمتم
الســـــــــــــــــؤدد
العرض الشجري