همــهـــمــات سعد . . !

[سعد الصميل]

بما اني جبت شي من الطفوله خلوني اجيب لكم موقف عجيب . . .


طبعا السالفه هذي ممسك علي عند اهلي . . يعايروني فيها ويتهموني بالغباء فيها . .


يوم كنت بزر كنت متولع بالـ ( شراخيات ) << تعال فسرها الحين حق اللي مايعرفها

شراخيات = العاب ناريه بس شغل خفيف يعني طع وطععع بس . .


ماعلينا . . المهم اني بذاك الوقت ابي اشب الشراخي وكان الوقت ليل . . ومابي اسبب ازعاج والناس نايمه . . لأني قد سويتها وانرضخت !!

قمت وشفت بالمطبخ قدر الجريش . . اللي يجي مخصر شوي . . وطرى علي اشب الشراخيات واحذفها فيه واسكر الغطاء . . واسمع الصوت مجوف ومو مزعج !!


مدري وش اللي كان عاجبني بالسخافه اللي سويتها !!


المهم اني ولعت واحد . . الثاني . . الثالث . . العاشر . . اولع واحذف واسكر الغطاء بسرعه علشان مايصير ازعاج . .

اخر مره فيها شبيت الشراخي وبلحظة غباء مكتسبه . . حطيته بالقدر . . . سكرت الغطاء . . . .



بس نسيت ايدي داخل القدر وماسك الشراخي !!


اترك لكم التفكير بمستوى الألم اللي واجهته والرضخ اللي صار بعده !!

[سعد الصميل]

تعجبكم الهمهمات ؟

محد رد علي !! ليه ؟

طيب يعني اقول السكوت علامة الرضا ؟


تتوقعون ان السكوت فعلا علامة عن التعبير بالرضا ؟؟


انا عن نفسي اعتبر المثل هذا مدوج , وتم تأليفه من العرب علشان الخطبه بس وحياء البنات في ذاك الوقت بس . .!!


طيب البنات الحين نصهم مافيهم حياء ابدا

والنص الثاني اللي عاد فيهم رجا . . اذا تبي الزوج بتقول ايه واذا ماتبيه بترفض !!

يعني المشكله مع المثل الضايع هذا منتهيه . . !!

طيب ليه المثل لحد الآن الناس تقوله ؟

السكوت بالنسبه لي يعبر عن الدهشه , التعجب , الذهول , الحيره . . . !!

مو معناته عن الرضا بكل الاحوال . .

تعجبكم الهمهمات الحين ؟

[سعد الصميل]

يااا صديق ... يا رفيق ... ياااا محمد !!!


كذا ننادي الهنود صح ؟


فيه عدد كبير مننا ينادي الهنود يااا محمد !!!



ياخي قلت عليك الاسامي علشان تكرم اي هندي بإسم سيد الخلق ؟؟



طيب ، فيه ناس يقول لأنه احب البشر لي الرسول عليه الصلاة والسلام . . انادي الناس كلها بإسمه !!!!



طيب ياحلو . . ماطرى عليك ان اكثر ناس بالجنسيه هذي هندوس وسيخ ؟؟


بالله عليك يستاهل انك تكرمه بمناداته بإسم اكرم الخلق ؟؟

كلامي سليم ، صح ؟

[سعد الصميل]

اول ماطحت بالنت كنت اروح للكافيه نت . . . وكانت اسعارها صلخ

في البدايه كانت الاسعار مو معقوله ٤ دنانير للساعه بس

. . بس ماكنت اتجرأ اروح

تجرأت بعد ماصارت رخيصه . . يوم صارت الساعه دينارين !!! رخيصه ها ؟؟


المهم مو هذا موضوعي . . تميت بالكافيهات ورخصت زياده وزاد ادماني على النت !!!


وكنت زبون صيده . . اقعد بالساعات شابك والحسابه بتحسب !!

اللي طرا علي السالفه ، اننا انا والزباين الصيدات كنا نعرف اشكال بعض لأننا نواجه بعض كثير ويمكن يواجهوني اكثر من اهلي !!

المهم اني كبرت وركدت وصرت خوش ولد . . وصرت اشبك بالبيت . .


لكن الصدمه اني قبل كم يوم رحت للكافيه نفسه . . والله ياجماعه لقيت ناس من الاشكال نفسها !!

هو هو . . نفس الشخص !!

يخرب بيتك ، ١٤ سنه ماقدرت تشبك بالبيت !!!

شو هالحيونه على قولة الاخوان الحلوين

[سعد الصميل]

قبل شوي كنت قاعد اشوف التلفزيون واقلب بين المليون محطه . . !!

والعجيب ان ولا محطه اعجبتني !!

على كثرها مافيها بركه !!

تذكرت قبل يوم كنا مقزرينها على القناه الرابعه . . !!

يازين ذيك الايام يوم طلعت . . كان انجاز مذهل لتلفزيون الكويت . . قناه ماتسكر بعد الساعه ١٢ بالليل !!

وكان اي فلم يطلع يعجبك غصب . . لأنه مافيه بديل اصلا

والا شرايكم ؟

[سعد الصميل]

يسولف علي واحد من الربع يداوم في الدوريات النجده . . عن موقف قديم

خلاني اضحك بشراهه

يقول كنت بالشارع وشفت قدامي سياره مكسور ليتها اللي ورى . . ووقفته علشان اسوي له مخالفه . .

نزل إلا صاحب السياره وافد من دولة عربيه . . ودار الحديث التالي . .

صاحبنا : عطني الاجازه والدفتر . .

الوافد : حاضر ياباشا . .

الوافد : تفضل ياباشا . . بس ممكن اعرف المشكله ؟

صاحبنا : ليتك مكسور وعليك مخالفه . .

يكمل خوينا السالفه ويقول انا قلت كذا . . الوافد انهار من البكي !! قام يبكي بضمير ودموع . . وصياح !! ويشهق !!

الحين البكي هذا كله علشان مخالفه ؟ ؟

يقول خليته وهونت من المخالفه , قلت له لو ادري بتبكي كان ماوقفتك , قطعت قلبي على البكي هذا كله !!

الحلو بالموقف لحد الآن ماقلته . . !!

يقول خوينا بعد مارجعت له الدفتر والاجازه , قام ومسح دموعه وتكلم بنبرة فيها شهقه . . .

وقال : هي قطعة 2 فين ؟



مشكله . . فيه ناس يجمع مواصفات سيئه كثير . . هذا جمعها . . بخيل , وكذاب , وخواف . . . الخ

[سعد الصميل]

على طاري الصيدات والكافيهات . . . وكم يربحون من الصيدات !!


واحد من الشباب القريبين مايشبك الا في انترنت كافيه , ومره من المرات قعدت اتناقش انا وياه . . . قلت ياخي وش حادك عليه ؟ النت بطيئ والسعر غالي . . . قال ياخي ما ارتاح الا فيه !!

حاولت اقنعه بطريقه ثانيه . . وسوينا حسبة سريعه انا وياه وصعقنا !!

قلت انت بالكافيه هذا تشبك من سنة 2002 الى 2011 يعني 9 سنوات . . .

كل يوم تقعد اقل شي 3 ساعات واقل شي تطلب لك شاهي والا عصير وزقاير وطلباتك في بيت النازل دينار . . . قال حلو يعني يوميتي عنده دينارين ونص بما ان الساعه بنص

شرايكم صرت مصري على الحسبه !! بس ابي اقنعه يترك الكافيه

اتفقنا انه اقل مبلغ يقطه يوميا على الكافيه دينارين ونص . . . في 9 سنوات ؟؟


المبلغ طلع 8200 دينار . . . يعني . . . صاحبنا قاط على الكافيه لحد الآن 8200 دينار وهذا في بيت الناااازل جدا . .


اخلي التعليق لكم لأنه هو انصدم من المبلغ . . . والمشكله والله لحد الآن يروح للكافيه بعد

[سعد الصميل]

هذي بشاره لكم . . .

ابشركم الحمدلله رب العالمين . .

كلمني اليوم وكيل احد المطابع في الكويت , وتشرفت بمقابلته وزيارته في مكتبه , وقالي ان احد الاشخاص نصحهم بالهمهمات , وبعد ما قروها اعجبتهم جدا , وحبوا انهم ينشرونها . . بس كل شي بحسابه طبعا

الموافقه المبدئيه اعطيتهم اياها , لكن تبقى امور مانختلف عليها بتوقيع العقد ان شاء الله . . وعلى السريع فاجؤني بأنهم عاملين نسخه تجريبيه لغلاف الكتاب , كمفاجأه لي فقط لا غير . . عن نفسي اعجبني الغلاف . .

قبل لا اوريكم الصوره . . حبيت اقولكم البزنس دخل بالمسأله يعني الهمهمات مافيه شي بلاش . . الباقي من الافكار بتنزل هناك واذا تبون اشتروا الله لا يهينكم





وهذي صورة الغلاف . . ادري تخوف بس احس فيها جنوون . . !!




شرايكم ؟





ماعلينا . . المهم بقولكم شغله بس قبل لا اختم . . .



ترا الغلاف انا اللي مصممه , والسالفه كذب في كذب , بس مقلب حلو ابيكم تشربونه . . لا مكتبه ولا نشر ولا بطيخ . .


وجودي بينكم هنا يكفيني << كذاب محد عايف الشغل والبزنس

بس تصدقون ؟ ودي اعرف كم واحد فرح لي وكم واحد ضاق خلقه ! ههههههههههههههه

تعيشون وتاكلون غيرها . .

[سعد الصميل]

هذي سالفه كوميديه لواحد من الشباب يوم كان بزر . .

يقول . . يوم كان عمري ١٠ سنوات طلعت من بيتنا ورحت لبيت عمي آخر الليل . .

ومانت الساعه تقريبا ١١ بالليل . . ولقيت عيال عمي الكبار قاعدين يتابعون فلم اجنبي . .

وعجبني الفلم . . . وشفت الوقت متأخر وبروح البيت . . وسألتهم عن اسم الفلم . .

لأني ابي اشتريه بما انه عجبني . . طبعا عيال عمه فيهم خساسه زايده . .

قالو له هذا اسمه فلم خلاعي !!!

المهم صاحبنا خزن الاسم بذاكرته يبي يشتريه وطلع للبيت . . وهو في طريقه للبيت . .

صدفت ان ابيه كان طالع يدوره يبيه يرقد علشان المدرسه . . سأله . . انت وينك من اليوم ؟

قال في دوانية عمي . . لحد الآن الوضع طبيعي !!

سأله وش تسوي ؟

قال كنت اتابع فلم خلاعي انا وعيال عمي !!

قال وش ؟ رد عليه بكل ثقه . . اتابع فلم خلاعي !!

طبعا يكمل السالفه ويقول بعد ماخلصت الاجابه . . جاني طراااق يمشي مليووون !!

طبعا خوينا يقول انا مصدوم وقتها من الطراق . . ما اشوف اني قلت شي خطأ !!

وكرهت ابي وقتها . . ليه يضربني بدون سبب !!


ههههههههه

بعد ماكبر تحول الكره لعيال عمه النذلين شلون سوو فيه مقلب وهو بزر !!

بس شرايكم تجربون تسوونها في بزرانكم المقاريد ؟

[سعد الصميل]

اليوم الصبح . . ثلاث مشاهدات من الشارع . . !!


الاولى . . دورية مرور ماخذ الاشارة فوق تحت وهي ممنوع ياخذها . . يعني خالف المرور وهو . . المفروض اول من يحافظ عليه !!


الثانيه . . شارع مسكر وزحمه . . وتأخير . . يوم قربت وشفت السبب طلع واحد واقف عند المطعم ينتظر الطلب . . ومسكر حاره كامله بالطريق !!


الثالثه . . بالطريق فيه واحد يمشي بسيارته ويترنح . . احسبه فيه شي والا سكران . . طلع ابو الشباب مندمج بالايفون ويمشي على الراحه ومعطل الطريق !!


ناس لا مبالين بشكل ودك انك تمسكهم الثلاثه وتجلدهم جلد لين يتسنعون !!