السلام عليكم ورحمة الله وبركاته....
هذي قصيدة للشاعرة ليلى بنت سعد الحربي
وهي إهداء: إلى كل من نزغ الشيطان بينه وبين أخيه ونسي أن العمر يمضي وكل شيء إلى زوال
وأن خيرهما الذي يبدأ بالسلام
واتمنى ان تحوز على رضاكم واعجابكم
الناس واجد مير ما مثل الاخوان=ما مثل اخوك اللي يحبك ويغليك
ما مثل اخوك اللي صدوق ومعوان=تفديه بالغالـي وبالـروح يفديـك
يشكي لك جروحه وهمه والاحزان=ولا ضاقت الدنيا بهمك يواسيـك
لو كان لك ربعٍ ونـاسٍ وجيـران=ما مثل اخوك اللي عن الناس يغنيك
أخــوك هـو عزك ولو كان ما كان=يبيع كل الناس لأجلك ويشريـك
أنا أشهد أنه لك على الصدر نيشان=تاجٍ على راسك وستـر يغطيـك
وانا اشهد انه مـا يثاقـل بميـزان=مثل الذهب والماس مافيه تشكيك
وانا اشهد إنه ما يقـدر بالاثمـان=عن العدو حصـن ودرع يوقيـك
إيــاك لا تفتـح طريـق لشيطـان=بينك وبينه جعـل ربـي ينجيـك
ولا تستمع لاجاك علان وفـلان=يا كثر ما تسمع من اللي يعاديـك
ولا تجعل لغيرك على العقل سلطان=ترى كثير اللي بشـوره يدهويـك
ترى الدهر دوار يا سرع الأزمـان=يومٍ تواريـه الثـرى أو يواريـك
تقول يا ليت الذي كـان ماكـان=يا ليتني بالقبر جنبـك واخاويـك
يا ليتك تعود واضمك بالاحضـان=أضمك لصدري واقبـل أياديـك
يا ليتك تعود ترى القلـب ندمـان=وده يسوق المعذرة ثـم يراضيـك
مير البلا يا ليت مـاردت إنسـان=ويا ليت ما تمحي ظلام بما ضيـك
تماكن الدنيا وواصـل بالاحسـان=قبل الندم يطويك والهـم يبريـك
ونهاية المشوار ما غيـر الاكفـان=ويبقى مع السارين ذكرك وطاريك
اخيكمـ: العـــرجاني
18-09-2006, 02:33 PM
العرض العادي
