اقرب قصيدة لقلب شيـــــــــــــــوم

[شيوم العجمي]

الله يسمّح دربها لو بعــد فيه ... نهــاية المشــوار بينــه وبيــــنــــــــي

يارب انا طالبك تجعل خطاويه .. خطــوة فرــح والثانيه فرحتيــنــــــــي

يارب ماغيرك ليا ضقت انا جيه .. وسجّادتي بيّن عليها جـبينــــــــــي

الحب بلوى لكن اللّي محلّيه .. انّي عشقت انسان قلبه يبينـــــــي

لولاه يسوى ماتكدّر بطاريه .. ولــولاه ماضاق الفضا وسط عينــــــي

ولولاه حتّى الشعر ماعاد اغنيّه .. ولولاه ماتصفق يساري يمينـــــــــي

صحيح راح وكل حيّ(ن) بطاريه .. لو المســــافه بيننا خــطوتينـــــي

والبارحه ياقمّة الحسن والتيّه .. مرّيـت والشارع تعيس وحـزينـــــــي

مرّيت والنفس الشقيّه تلاغيه .. تدعي عليه وتطلبه حـاجتينـــــــي

الاوله وجهك عن النّاس صدّيه .. والــثــانيه باللّــه لا تذكــرينـــــــــي

ماني مكمّل لا تقولون وشفيه .. ملعون جد العشق بيّح كنينــــــــي

اي واللّه احبّه وحبّه واداريه .. ومسامحه من قلب دنيا ودينـــــــــي

اللّه يغفرلي ويسعد لياليه .. ويرحم زمانن فات بينه وبيــنــــــــــي