على قدر قـدرك تسـاق الفناجيـل
وعلى قدر عـزك تجيـك التحايـا
والوقت يكشف لك وجيه الرجاجيل
وبعض الوجيه تبين فيهـا النوايـا
والتجربه احيان لو هـدت الحيـل
اخيـر مـن جهـلٍ بكـل الخفايـا
رجلٍ على ماقيل يستاهـل الهيـل
محشوم خلقه من جزيـل العطايـا
منزهٍ نفسـه عـن القـال والقيـل
وله سيرةٍ عطره وطيـب سجايـا
له قيمةٍ بيـن الرجـال المشاكيـل
ولا داج حـول المهزلـه والدنايـا
ذكره مابين الناس عالي كما سهيل
مكملـه ربـي بـكـل المـزايـا
ورجل على ماقيل ضمن المهابيـل
وزودٍ على هبالـه كثيـر الخطايـا
ماله مع اهل الطيب قدرٍ ولا كيـل
وبضاعته بيـن العـرب بالحكايـا
يهب ياوجهٍ سـواده كمـا الليـل
يهـب ياوجـه الـردى والوشايـا
وانا منايه كل ماسرجت لي خيـل
ان الاوادم تتـعـض بالوصـايـا
خلك وفي مع الرجـال الحلاحيـل
ترى الوفاء تـاجٍ بـروس البرايـا
وابعد عن اهل الكذب والقول والميل
لاتغرك الضحكـه وبيـض الثنايـا
هذا الزمن فاني وجيل ورى جيـل
والطيب يبقى بعـد سهـم المنايـا
اللي بغاهـا قدمـه البـن والهيـل
ومن لابغـا قدمـه بحـورٍ ملايـا
22-10-2010, 07:57 PM
>>"{على قدر قدرك تساق الفناجيل وعلى قدر عزك تجيك التحايا ..!! .."}
العرض الشجري