النصرالسهل________ مثل الهزيمه !!

[أشهب الـلال]

السلام عليكم ورحمة الله وبركاته


أخيكم أشهب الـلال

ينقل لكم تحياته من تحت المجهر

ويقول:

رغم ضيق الوقت....!!

((مازال التواصل مُستمر لمُنتدى الشعر))



______________

أخواني/ أخواتي الكرام



شاعر شاب أستطاع أن يُثبت وجوده في الساحه بقوة الألفاظ والمعنى حين قال:

احدٍ عرق وجهه من الوقت صبـاب=وَ أحدٍ عرق غيـره مسبـب نعيمـه

شاعر وضع قصائد الغزل جانباً وقال:

إلى متـى زود التفاخـر بالأنسـاب؟=العـز.. مـن تـوّج جديـدة قديمـة

أقدم لكم هذه الرائعه للشاعر / عبيد الأزمع أبوثنين



حرب الأعصاب

شاب القصيد وباقي الهم مـا شـاب!=ونعيم فكـري مـا تجـاوز جحيمـه
يوم انفتح معناي للحـرف وانسـاب=للحزن قيمه.. ولـ أصدق الشعـر قيمـه
نويت أمّيلها غزل وأكسـب إعجـاب=حديث عشـقٍ مـن نديـم لــنديمـه
لكن حضر هم الشعر والغزل غـاب=جاء للشعر بيـن المحانـي حطيمـه
من يحترق ماله عن النـار مجنـاب=وماهوب شرط إن العواقـب سليمـة
والشعر لو جاله جماعات وأحـزاب=زيف المشاعـر لا تمـادى ذميمـة
ياشينها لا طوّلت حـرب الأعصـاب=ما ينتصر فـارس ولا مـن غنيمـة..!!
ماجا بدون حساب ماجاء له حسـاب=(والنصر لاجاء سهـل مثـل الهزيمـة)
احدٍ عرق وجهه من الوقت صبـاب=واحدٍ عرق غيـره مسبـب نعيمـه
للفعـل روايــه.. وللمجـلـس آداب=وللمستقيـم.. أفكـاره المستقيـمـة
والصفحة اللي ضيّعت جهـد كتّـاب=وجودهـا وسـط والمجلـد (جريمـة)
من عابها يفتح على الناس له بـاب=يشيب راسه ما عرف من خصيمـه!!
ومن غض طرفه ضاع والوقت غلاّب=والعقـل نعمـه... والجهالـة عقيمـة
إلى متـى زود التفاخـر بالأنسـاب=العـز... مـن تـوّج جديـدة قديمـة
كبوة جواد الروس.. من حظ الاذنـاب=(وبعض الاسامي جت لأهلها ظليمـه)
بس العزى ما ينقص النار مشهـاب=من شذ محروم ٍ عسـاه الحـريمـه
والفعل بيت.. وعزه النفـس الأطنـاب=يبنى على الشيمة.. وبـذل.. وعزيمـة..
(((ولو نظرة العالم لنا بـدو وأعـراب=حنا الأصـول الثابتـات المُـديمـه)))
حنا بنينا المجد مـن قـوّ الأسبـاب=تاريخنـا طـبّ العقـول السقيـمـة
وما يلغي التاريخ تظليـل الأغـراب=الحـر يفهـم.. والبهيمـة بهيـمـة..!!!

وسلامتكم

عبيد الأزمع

_______

تحياتي


أخيكم