زانت طواريق الشعر والمعاني

[فلاح بن مبخوت]

قصيده القيتها في حفل زفاف اخونا فهيد بن محمد ال جحوم العجمي

زانت طواريق الشعر والمعاني = وهاضت مشاعر بالضماير خفيّه
وراحت حروف الشعر تسبق لساني = كن الفرح وصا لها في وصيّه
مبروك من قلبي وكامل كياني = في ليلةً كنها الفطر والضحيّه
تجمع مابين ربعنا والعواني = واصحابنا اللي في صفوف السريّه
يامرحباً مليار ومليار ثاني = يامرحباً ترحيبةً عسكريّه
ويامرحباً بالكل قاصي وداني = يستاهل النشمي حروف ابجديّه
يافهيد انا في حفلكم ما حداني = غير المحبه والعروق القويّه
في عزكم يافهيد معتز شاني = ومن دونكم نارد حياض المنيّه
قلته وانا صادق وربي عطاني = فيض المشاعر والشعر مقدريّه
وفي لابتي بصهل صهيل الحصاني = كسابة الناموس والنار حيّه
يشهد لنا التاريخ ويشهد زماني = اهل الكرم والعز واهل الحميّه
واليا الفخر في لابتي لا خذاني = هوجاس فكري للفعول الجزيّه
ومنسى العرب عدنان ولا إقحطاني = والنعم في كل القبايل سويّه
واخير كلمه قلتها في مكاني = الحمد للي بشرونا ابنبيّه