((لا بارك الله بالترف والمياعه))---مصافحه اولى

[ناصر البرغش]

السلام عليكم ورحمة الله وبركاته


في البدايه أوجه تحيه لجميع الأعضاء المشاركين في هذا المنتدى الرائع


واتشرف بانضمامي لاخواني وربعي وبني عمي


واضع هذه المتواضعه بين ايديكم..عسى أن تحوز على رضاكم

بعض العروض اللي تقطع تقطاع=ماجابت إلا للقصيد القطاعه
إما بقافن يطرب الكيف لاذاع=ولا بلاش إمن الشعر وإستماعه
وزن البحر يدرس ويكتب وينباع=بضاعةٍ يا شينها من بضاعه
واللي شراها جيدٍ بالتمياع=لا بارك الله بالترف والمياعه
إمنعمن صوته على كل مذياع=من صوت أبن شلحاط عنده مناعه
من كثر ما ياكل نعومه ليا جاع=سبب لعشاق النعومه مجاعه
أكبر طموحاته مظاليل ووساع=مسكين.. مقرب نظرته وإرتفاعه
غير الطبع مايغلبه بالتطباع=هذا تطباعه وهذي طباعه
واللي سواته ننصحه غير ماطاع=ضايع وعنده هقوتن في ذراعه
خلوه ضايع دام كلن له ذراع=قدام يبشر بالقشر والقلاعه
حنا نعّرف إن الكسر بين الأضلاع=من قبل تظهر صورته بالأشاعه
ولا الأضاءه كلها زيف وخداع=وإمجاملاتٍ للصحف والأذاعه
أحدن يولعها فتيله على القاع=وأحدن تقادح بندقه بالرفاعه
الوجد لا جالك من إحساس ملتاع=لازم تحس بحرقته وإلتياعه
لنّه يترجمها من شعور وابداع=ياللي تحسب إن القوافي صناعه
ولا القناعه كنز باقي ولا ضاع=وياقل منهو يحتوي للقناعه

وسلامتكم

.