ماينفع الرمي من تحت الحزام

[ســـداح]

السلام عليكم ورحمة الله وبركاته
هذي اول مشاركه لي في صدى المشاعر واتمنا
ان ترتقي لأسماعكم وذوقكم الرفيع


يا حبيـبٍ صـد مافيهـا كـلام
تـلّ كبـدي وأنقطـع معلوقهـا

قـام يفلقهـا وخلاّهـا حـطـام
قلت ليه ؟ وقـال عـدّ فلوقهـا

يوم جاء في نيّته نقطـة نظـام
طيـرّ طيـور الجفـا بسبوقهـا

عقب كنّا في محبّـه وانسجـام
نقطف ثمـار الهـوى ونذوقهـا

ذعذع الهجر ونشى مزن الخصام
وقامت الفرقـا تلـوح بروقهـا

ما يعزيني سوى نـوح الحمـام
شلت طاروقي علـى طاروقهـا

وش حصلّك وانت لك قدر ومقام
لهجتـك مـا ينفهـم منطوقهـا

ليه تذبحني وأنا ذبحـي حـرام
ماتضيـع عهـودي ولا أبوقهـا

أذكر أني يـوم زاد بـك الهيـام
قلت لك سوق المشاعر سوقهـا

مايفيد الرمي من تحت الحـزام
أرم .. من حدب الضلوع وفوقها

صابرن والطقّ ما فـكّ اللحـام
والليالـي شرّهـا ب حلوقـهـا

صار في شخصيتي شبه انفصام
رحت اطشّ السالفـه واحوقهـا

أكثر العشاق فـي سلـم الغـرام
يفتـح الله ضايعـات حقوقهـا

خاتمك بالمسك يا مسك الختـام
طبت يا شفّ الجـروح وذوقهـا

كان عذرك مانـي بقـد المقـام
الخطايـا .. قافلـن صندوقهـا

لكن اصبر لين ابلّغـك السـلام
من عيونن شالتك فـي موقهـا

العيون اللي تحبّـك ب انتظـام
كل بادي ليـل ترسـل شوقهـا


وسلالالالالالامتكم

ســـــــــداح