خذني على قد عقلي .. ~ } روعـــه

[şσ ί Ļόve]

(( الجزء السادس ))

(( أم سالم تتكلم))

عقب اللي استوى في الغرفة توجهت عند غرفة محمد وطقيت الباب
وأول مابطل الباب قلتله.. تعال أبيك في غرفة سالم..
وتوجهت لغرفة سالم وطقيت باب غرفته ويوم بطلي الباب قال :

ياهلا ومرحبا.. زارتني البركة والله ياهلا بتاج راسي..

بطل الباب على آخر شي وقال: دشي يا بعد هلي وربعي وخلاني.. ولو تبيني أستوي الأرض اللي تدوسيها ماعندي مانع..؟!!

دشيت الغرفة بدون متكلم وشوي طق الباب محمد ويوم بطله الباب سالم في البداية ماخلاه يدش وقاله :

لا.. أنت سير غرفتك لأنك يوم بدش بتسير أمي..لأنك غلس..

رد ولدي محمد: سر لاه.. شو تقصد لو حظرة الشياطين طلعت الملايكة..؟!!

زين أنك تعرف نفسك يامحمد..

تكلمت علشان أنهي اليوم على خير : سالم خل أخوك يدش الغرفة أنا اللي طلبته..

دش محمد الغرفة بخطوات كلها نصر وقال: أحم أحم الشيخ محمد وصل يالمطيرزي..

طالعني سالم وهو حاط إيده على خصره : يمه شوفيه يقولي مطيرزي..؟!!

ولما طالعوني عيالي وأنا بهالشكل.. مارد عليهم..
توجهوا يسألون:

خير يا يمه.. شو السالفة..؟!!

طالعت سالم وقلت: أنت أبيك تخبرني شو استوى منبينكم مع أبوكم في ذاك اليوم..؟!!

ضحك محمد مثل عادته وقال : يعني ضربني وبكى.. وسبقني وأشتكى..؟!!
والله حاله..؟!!
طالعته بنظرة جديه وقلت : احترم أبوك يوم ترمس جذيه.. ولو ما خبرتوني بالسالفة والله لا أنا أمكم ولا أعرفكم..

سالم ويا محمد تبادلوا النظرات وشوي بدأ سالم بالكلام :
مستوى شي يالوالدة.. بس الصراحة.. أننا في ذاك اليوم شفنا عمي صدفة في الدايرة اللي نحن نشتغل فيها ، كانت عنده معاملة ومحمد خلصله إياها.. ويوم رجعنا البيت قلنا لأبوي:

عمي يسلم عليك..؟!!

قلت متفاجئة: عمكم..؟!! أخو أبوكم..؟!!

ودخل محمد بالموضوع مثل عادته وقال معبر بأسلوبه:

لا وبعد أشطط علينا.. معصب.. الوالد

بس أنا أعيبج يالوالدة.. تعرفي شنو سويت..؟!! اللحين بعلمج منو محمد حسن أنا شيخ الرياييل..؟!!

قاطعه سالم: دخيلك بس.. والله اللي عطاك إياه أبوي ماسدك صح..؟!!

طنشه محمد وقال:
قلته يا يمه :

أسمع عاد لا تغثنا بالماضي..عمي غلط وأعترف بغلطته سامحه وش بتخسر..؟!!


قلت وأنا أطالعه منصدمة: أحلف بس..؟!!

طالعني مفتخر باللي سواه وقال وهو نافخ صدره: أعيبج أنا..

رد سالم: بس عطاه اطراق أسميه ردله الحس يالغالية..والله طافج..

صرخت عليهم وقلت: اللحين تدشوا على أبوكم وتحبوا راسه وسالفة عمكم خلوها للكبار.. ولا غرتكم الكم شعره اللي بويوهكم واعتبرتوا نفسكم رياييل..؟!!

قال سالم : يمه شنو اللي استوى منبينكم..؟!! لو علـــ......

قاطعته: بسك يا سالم وإذا كلامي ماتنفذ.. لاتعرفوني ولا أعرفكم فاهمين..؟!!

وسيرت عمكم مابيها تنفتح في هالبيت ولو منبينكم البين.. سمعتوا..؟!!

طلعت من الغرفة معصبة وتركت الباب من وراي مبطل من عقب ماسمعت صوته ينضرب باليدار وسرت المطبخ..


****************************** ****************


(( محمد يتكلم.. ))

أف.. يا سالم أسميها الوالدة تسير الصالة لكمال الأجسام.. يابوك أشرخت بابك.. الحمد لله أن هالاجتماع في غرفتك..

توجه سالم للباب وسكره وقال:
ياخي.. أنا أذكر أن الحيزبونة الله يرحمها أقصد حرمة عمك.. الله يرحمها آذتنا.. بس شنو اللي استوى مذكر..؟!!


قلت: أنا عني أذكر يوم..

قاطعني سالم: بسك كذب واحتيال كان عمرك أربع ولا خمس اسنين..

هيه بس أنا أذكر يوم كانت تشيل حلوياتي وتعطي بنتها نورة البنورة..أهيه يا زمن أكيد اللحين اكبرت واستوت مثل القمر..
قاطعني سالم: حشم عمرك وأنت تذكرها تراها مب مثل اللي يرابعن هالشباب سمعت..؟!!

واللحين خلك من هالسالفة.. يامحمد
يالله نروح عند الوالد.. ونعتذر..

رديت عليه:
لو تبا تسير سير بروحك.. حلوة والله أنطق وأعتذر.. كأني أقوله أنا تحت الخدمة متى ماتبي تطق أو متى ماحكتك أيدك طق باب الغرفة وأنا أييك ركض وصفع هاللوح اللي بويهي تصفيع..؟!!

ضحك سالم وهو يجر محمد: ياليت والله كنت أشتركت وياه بهالنادي.. خلك زين..تراه أبوك..

سويت نفسي أني كبير وأني عاقل ورحنا لغرفة الوالد ودشينا الغرفة..

حبينا راس أبوي وبدئ سالم بالكلام:
يبه نحن نعتذر منك.. وأن شاء الله ماعاد نعيدها..

مارد أبوي ولا بكلمة... طالعني سالم يبيني أرمس.. كنت أأشر..ماريد..

حاول سالم يتذكر كل كلمة وجملة ممكن تساعده بهالوهقة وقال: وحتى محمد غلطان ماكان لازم يساعد عمي..

طالعته وأنا أهمسله ياللي ما فيك خير...!! والله لضربك وياهالخشم..

صرخ بويهه أبوي: هذا عمه ولو ابن أخوه ماساعده يالخسيس منو اللي بيساعده..؟!!

أهنيه تلون ويه سالم أما أنا ضحكت ضحكة وقلت : والله تستاهل من حفر حفرة لأخيه وقع..فيها..
طالعني أبوي وقال: إذا ماصكيت حلجك أنت الثاني لطير ويهك بطراق يذكرك الحشيمة وأشلون يرمسون الرياييل..

ضحك سالم.. بس لما عصب أبوي زيادة سكتنا وقلنا: خلاص حقك علينا وانسى الموضوع المهم ترضى علينا..

سكت أبوي شوي وقال: خلاص.. روحوا.. صار خير..

حبينا على راسه.. ومشينا وتوجهنا لعند الوالدة وراضيناها بعد.. شنو أكثر من جذيه برنامج (( أفتح قلبك ))
ههههههه

وبعد ما راضينا كل الأطراف وأبوي تكلم ويانا وتكلمت الوالدة ويالوالد.. رحت مع سالم لغرفته.. وعفستها فوق حدر وهربت غرفتي وصكيت الباب بالمفتاح.. ورقدت..

****************************** ***************

وبعد هالسالفة بأيام سرت للبحر على عادتي المعتادة بس هالمرة علشان أشوف غروب الشمس..
الله يوم تشوف هالشمس تحتضن البحر وأشعتها تودع جميع المخلوقات منظر يسوى الدنيا ومافيها..

المهم وصلت وشليت عودي وياي.. وتميت أراقب بهالشمس.. إلين ما غابت.. بعدها يالغريب وهو لابس هالجاكيت الأسود..اللي يبرز جماله المتخبي ورى هالملابس..

مشى ومشى إلين ما يلس احذاي وقال:
شنو عيــبك الجاكيت..؟!!

رديت عليه..

تبى الصدق.. هيه.. بالمرة..
طالعني الغريب وقال:
مو مشكلة واصل بس مو اليوم مرة ثانية..

ضحكت وأنا أقول: ماتنلام بخيل..

وشوي قطع هالحوار.. صوت الجوال ، لكن كان داخل السيارة تركت العود وأخذت أتحرك صوب السيارة ولما وصلت تبند الجوال وشليته وتوجهت صوب الغريب..

إلا شوي دق الجوال مرة ثانية وهذا كان عمي رديت عليه:
وعليكم السلام.. ياهلا بعمي..

عمي سالم : وشلونك يا ولدي أن شاء الله بخير..؟!!

قلت: الحمد لله ياعم..؟!!

سألني : وين أنت..؟!!

قلتله : والله بعيد شوي مو في البيت.. خير تآمر على شي..؟!!

حبيت أعزمك على العشا اليوم وش قلت..؟!!

والله اليوم صعب يا عم.. خلها مرة ثانية..؟!!

قال بصوت كأنه يأمرني: يا ولدي تعال خلنا نتوالف يميع مايسد اللي ضاع من العمر..؟!! وترى سالم عندي اللحين..

رديت عليه: خلاص ثواني وأنا عندكم يا عم مايصير خاطرك إلا طيب..

أنزين يا ولدي بيتنا ما يتوه.. تحيدني يوم وصفته قبل ..؟!!

هيه ياعم أذكر يوم وصفتلي إياه..

خلاص .. نترياك بس لاتسرع يا ولدي تراني شفت بعيونك أنك متهور خذ راحتك.. ترانا ما بنطير.. وضحك..

ضحكت وياه وخلصت المكالمة..

بس أول ما خلصت طالعت الغريب وقلت: عمي عازمني على العشا وش رايك تروح وياي..؟!!

طالعني الغريب بنظرة وقال: لالا.. سير بروحك وتوكل على الله خيرها في غيرها أن شاء الله..

طالعته وقلت : وش بلاك..؟!! لاتاكل معي ولاتشرب معي حتى هالثام ماتبطله بالمرة.. يعني غير عيونك ماشوف..؟!!

قام معصب وقال: مو قلتلك لا تسألني عن أي شي يخصني..؟!!

قمت أنا الثاني من مكاني وقلتله: وأشلون مسألك يالغريب مو ستوينا ربع..؟!!

أنا قلتلك يا محمد من البداية لو تبي صداقتنا تستمر لا تدخل باللي يخصني صح ولا لأ..؟!!

قلت : لكن..؟!!

لا لكن ولا شي.. يامحمد.. في داعة الله..إذا وجودي يضايقك خلاص مابتشوفني مرة ثانية..

وأول ما كان بيعطيني ظهره سرت وواجهته ويه بويه وقلت: خلاص خلاص..
ما بدخل بس ياخي كنت أتمنى رفقتك في كل مكان مو البحر وبس..؟!!

طالعني الغريب وقال: خلاص انسى السالفة

قلت وأنا أريده يأكدلي بإجابته: ماتتركني..؟!!

قلتلك خلاص يا محمد سير اللحين للعزيمة.. بس ماقلتي عن عمك هذا..؟!!
ماعطيتني خبر أن لك عم أو حد غير أهلك وأصحابك أهنيه في الدولة..؟!!


بخبرك عقب كل شي.. ترى استوى فجأة بس توعدني أنك ماتغيب عني..؟!! لأن كل مادقت بمزاجك.. تغيب بدون ماتراعي أني ...؟!!

طالعني الغريب وقال: أنك شنو...؟!!

ضحكت وقلت مغير الكلام : يعني هذا آخر كلام عندك..؟!! مابتسير..؟!!

قال الغريب : لا.. اسمحلي.. مرة ثانية..

طالعته وأنا أأشر.. البيت مو بعيد ولفيت بظهري علشان أراويه أن المسافة بس تبالها دقايق..؟!!

يوم درت بويهي صوبه.. بسم الله الرحمن الرحيم ... وين سااار..؟!!
تلفت ناديت..؟!! بس بلا فايدة..

****************************** *************

يتبع
vvvvvv
vvvvv
vvvv
vvv
vv
v

[şσ ί Ļόve]

(( الجزء السابع ))

(( ماضي على مشارف الحاضر))


((محمد يتكلم.. ))

المهم شليت نفسي وسرت بيت عمي.. كان بيته بالفعل ما يضيع بالذات أنه يبعد عن الشاطئ اللي أنا أروحله قرابت ربع ساعة لاغير..


وأول ما وصلت لقيت عمي وأخوي سالم يتريوني برع البيت

خرجت من السيارة وتوجهت لعندهم على طول.. وسلمت بعمي وأخوي..

سألني عمي سالم : أشوفك كنت قريب..؟!!

طالعته وأنا ابتسم : يعني.. كان عندي مشوار بسيط وخلصته ويتكم..

ياهلا فيك يا ولدي.. تفضلوا ياعيالي.. وفتح لنا باب الميلس.. ودشينا..

تكلم سالم بخبث : انزين عمي منو عايش وياك..؟!!


ضحك عمي سالم وقال : بنتي..

رد وسأله وهو مرتبك : أنزين منو بنتك..؟!! أنا أذكر أن عندك بنتين..؟!!

طالعه عمي وقال: لأ.. أنا ماعندي غير وحدة.. نورة بنتي الوحيدة اللي مايبت حد سواها..

رجع لونه ورتاح.. بس حبيت أني أوهقه انتقام باللي يسويه فيني ، انزين عمي هي كم عمرها اللحين..؟!!

طالعني عمي سالم وقال : هي أصغر من سالم.. أظنها.. لالا..متأكد.. على عمرك ياولدي محمد..

ضحكت بخبث وقلت: أها.. يعني بعمر الزهور..؟!!

كلنا ضحكنا ماعاد سالم كان يناظرني بحقد وقال : عمرها يالطفس من عمر الزهور بس أنت.. من عمر الشوك..

ضحك عمي سالم.. وشوي دق الباب شخص منو تتوقعووون...؟!!

كانت بنته نورة..

قالها عمي سالم دشي وسلمي على عيال عمج يا بنتي..

دشت نورة ومن بعيد سلمت علينا بتحية الإسلام وقالت : أسمحولي على التأخير.. بس حبيت أخبرك يا يـــبه أن العشا خلص تقدر تتفضل وياهم..

سالم ما نزل عيونه من نورة.. أما أنا كنت أطالعه وأقول بخاطري: صادوه.. والله لمسكها عليك ياسالم..

وقطع حبل أفكاري صوت نورة وهي تقول : محمد وش أخبارك..؟!! أن شاء الله بخير..؟!!

مثل عادتي حبيت أضحك :
الحمد لله..أنتي وشلونج..؟!! أشوفج أستويتي أحلى من قبل أكيد هذا كله بسبب حلوياتي اللي كنتي تاكليها..؟!!

نزلت راسها للأرض وهي مستحية وقالت : أنت مثل منت ماتتغير..!!

طبعاً منو اللي كان بخاطره يصكني بيده؟!!.. أيوه سالم..
طالعني وقال: استح على ويهك.. أرمس وياها بحشيمة..

رد عليه عمي : خلهم يا ولدي من يوم يومهم وهم جذيه ناقر ونقير..

طالعته نورة وهي مستحية وقالت : أسمحلي ماسألتك عن حالك على طول تكلمت عن العشا..؟!!

رد عليها سالم.. أونه عاد بذرابة : لا عادي مو مشكلة.. أدريبج بنت واجب..

طالعته وقلت : واجب ولا أمتحان...؟!!! هههههههه

طالعني بنظرة .. بس على طول تغيرت لضحكة أول ماسمع نورة تضحك..

ورد سألها سالم: أنتي أشلونج..؟!! أن شاء الله بخير..؟!!

طالعته نورة وهي تحاول ما تبين اضروسها من الضحك.. وقالت :
الحمد لله بخير ومرتاحة.. بس أنت أشلونك..؟!!

طالعته وجاوبت نيابة عنه: أحمر ولا ماتشوفي لونه...؟!!هههههههه

عصب سالم وكان يخزني بعيونه وقال : يا عم خلنا نتعشى علشان نرد البيت..

وجهت كلامي له: سالم.. وش بلاك..؟!! لا تفضحنا ولا والله عمي مايعزمك مرة ثانية..؟!! صح عمي..؟!!

طالعني عمي اللي كان ميت من الضحك وقال: والله ياليتكم تسكنون وياي..

قلتله: ماعندي مانع بس كم بتدفعلي إيجار..؟!!

وجهلي عمي كلامه وقال: أنا اللي أدفع.. ولا أنت..؟!!

المهم أرتفعت ضحكاتنا وتوجهنا صوب غرفة الأكل وأكلنا يميع بس بدون نورة ..

وعقب ماخلصنا الأكل ردينا الميلس وخبرنا عمي بسبب الخلاف اللي منبينه وبين الوالد..
المهم طمناه وحاولنا نريح باله.. بس ماقلناله عن موقف أبوي آخر مرة.. وكملنا السهرة بضحك وتعليقات..

وحاول عمي يقنعنا بالمبيت عندهم لكن استسمحنا منه مأكدين أن مرة ثانية بنييه وبنبيت..

ودعناه هو ونورة البنورة وسرنا البيت بس هالمرة كل واحد بسيارته..

****************************** ****************

(( نورة تتكلم ))

معقول بعد هالسنوات بيتعشون عندنا آآآه.. الله يسامحج يا أمي.. الله يرحمج.. ويغفرلج أنتي ويميع أموات المسلمين أن شاء الله..

طبخت من كل الأصناف.. لامحاشي إلا طبختها ولاشي تتوقعوه إلا سويته..

وأول ما خلصت العشا ووصلوا البيت كانت دقات قلبي مسويه حفلة بصدري.. واللي زاد دقات قلبي يوم دشيت عليهم..

محمد أنت مثل منت.. ضحوك وحبوب وهم بعد طفس أنا أحلويت من حلوياتك..؟!! وأنا أقول شو اللي خلاني أخس ..؟!! أكيد عينه على حلوياته..

سالم... يابعد قلبي والله.. بعدك تستحي وتغار حد يكلمني..؟!!

الله يسامحج يمه..لو ماكن اللي كان..؟!!

كنت اللحين من كم سنة وأنا في بيتهم اللحين.. حليلة لسالم..

قطع حبل أفكاري صوت أبوي وهو يطق باب الغرفة:

نورة يابنيتي رقدتي..؟!! ولا بعدج صاحية...؟!!

رديت عليه : لا يبه دش بعدني عالرقاد..

دش أبوي الغرفة وهو يضحك وقال: شو رايج في عيال عمج..؟!!

تلون ويهي وقلت : والله لهم وحشة.. يايبه..

وجهلي كلامه وهو يضحك : هذول اللحين هم سند ظهرج من بعدي..

قاطعته وقلت: بعد عمر طويل يا يبه.. بسم الله عليك..

حط إيده علي وقام.. وحب على راسي ويوم وصل عند الباب طالعني وقال: قولي آمين..؟!!

رفعت إيدي وقلت: آآآآآآآمـــــــــين...

ضحك وقال اللي صدمني: أن شاء الله تكوني لمحمـــد... خرج وخلا النار تشتعل في صدري..

قلت بخاطري وأنا مصدومة:محمد..؟!! لالالالالا..



****************************** ****************

((سالم يتكلم ))

ماصدقت على هالعزيمة.. نورة يابعد هلي والله.. أنتي مثل ماتعودت أحلويتي واستويتي قمر.. ما شاء الله عليج.. أدب وأخلاق.. ابصراحة عمي عرف يربي..

يوم دشت الميلس وتمت تطالع وتنزل براسها للأرض.. بنت مو مثل البنات

بس اللي خرب علي كلام اليوم.. هالمحمد الطفس والله لراويه.. وأنا بعدني أسوق أتصلت لمحمد على الجوال شوي ورد علي:

هلا سليم الئيم..؟!!

أنا سليم الائيم..؟!! وش اللي سويته يالطفس..؟!!

شوي سوى حركة.. سبقني بالسيارة إلين مستوى حذاي ونزل الجامة وطالعني وقال: موت بحرتك ... وسكر الجوال..

صدقه خلاني أموت بحرتي.. يالله يالله إلين ما وصلنا البيت دش محمد قبلي علشان يسبقني.. وأنا أركض علشان ألحقه..!!

تعرفوووون شو استوى...؟!!

منو صادنا...؟!!

أبوي.. صاد محمد بإيده اليمين ونخش ورى باب الصالة ويوم دشيت.. زخني بإيده اليسار.. وقال: اللحين أنتوا وين كنتوا...؟!!

طالعته وقلت : كنت ويا محمد نتمشى..

سحبنا أبوي لغرفة محمد وصك الباب من وراه واقترب من محمد ينازع: أنت مايسدك أنك صايع ضايع ماتيي إلا لويه الفير.. تريد تخرب أخوك..؟!!

طبعاً هذي نقطة بصالحي فمثلت أني بريء ... طالعني أبوي وصرخ بويهي وقال :
ولا أنت.. ثور.. على طول وين ماقال بنروح قلت يالله..؟!!

ضحك محمد ولف أبوي وقال: عيدوها وأنا أراويكم..؟!!

ظهر من الغرفة .. وأول ما هجمنا على بعض علشان نتكافخ.. إلا دش أبوي ومسكني من كندورتي وقال:
أذلف لغرفتك.. أعرفكم.. وين أنتوا والرقاد وين..؟!!

سحبني أبوي وأنا بروحي اللي كنت أشوف محمد وهو يضحك ويسويلي حركات ويقولي: أحسن..

وصلني الحبيب الوالد للغرفة.. وقال: نام الله يهديك أنت وياهلمسطول محمد..؟!!

وعقبها سار..
أما أنا من كثر خوفي فصخت ثيابي ورقدت إلين اليوم الثاني..

****************************** ****************



(( محمد يتكلم ))


أول ما سار أبوي وهو يسحب سالم لغرفته.. صكيت الباب بالمفتاح فصخت هالثياب اللي علي.. وتسبحت.. ولبست ملابسي.. حاولت أرقد.. مافي فايدة..
ليش الغريب انسان غامض..؟!!

أحس أني تعلقت فيه.. والله لو هدني هذا الأنسان معرف شو ممكن يستوي فيني..؟!!

طيب حبوب .. وعاقل.. لأول مرة تضبط وياي أرافج واحد عنده عقل ويستخدمه..؟!!

عيونه حلوة.. بس ليش يلبس هالوشاح دايماً.. لا يكون مشوه..؟!!
أكيد.. لأني يوم كنت أسأله عن أهله.. قال: لا تسأل..؟!!
أها.. يعني الغريب.. يتيم واستواله حادث هو وأهله توفوا اليميع.. إلا هو نجى بس مع تشوه فيه..

أوهوووو.. ببدأ لفتح مجال لخيالي الواسع..
لا أن شاء الله.. ولا شي من هذا هو صح..

مر الوقت وأنا أفكر بالغريب إلين رقدت.. ونشيت لصلاة الفير عقبها كملت رقادي..

نشيت مبكر اليوم .. وتوجهت عقب ماتسبحت وتعطرت لغرفة سالم ، مالقيته مسكر الباب.. دشيت.. بهدوء.. وصكيت الباب من وراي..
مشيت بخطوات هادية إلين ماصرت قريب عنده.. حطيت فمي عند أذنه.. وصرخت بصوت عالي:

نووووورة على الجوال تبي تكلمك..

نش وهو مفزوع ومسك الجوال يطالع، لقاه مغلق.. وأول ما طالعني.. نش من مكانه مثل اللي لدغته حية.. ونط علي.. وصفعني تصفيع وهو يقول:

طفس.. والله طفس.. طيحت قلبي..

أما أنا.. كنت ميت من الضحك وقلتله : هذا كله لأني طفس..؟!! ولا علشان خاب ظنك أن نورررة البنورة مو على الجوال...؟!!

زاد وهو يكفخ وقال: لا تناديها نورة البنورة سمعت..؟!!

تركني عقب ماطلع كل حرته فيني من الأمس إلين اللحين.. ويلس يشوفني شوي.. وعقبها ضحك.. وقال :

شفتها.. يا محمد.. والله قمر..

رديت عليه : أعرف أني قمر ما يحتاي أنك تقول
أخذ مخده وفرها علي سالم وطالعني وقال:

وحشتني مووووت.. ماغابت من بالي لو ثواني.. طول هالسنين

سألته بخبث: تحبها يا سالم..؟!!

ضحك وهو يطالعني وقال : إلا أموووت فيها مو بس أحبها..؟!!
كل قطرة بدمي كانت منها وفيها..
كذب المثل اللي قال: اللي بعيد عن العين بعيد عن القلب.. والله شوقي لها ضعف المسافات والثواني والساعات والدقايق اللي غابتها عن اعيوني..

سكت شوي

وطالعني سالم وقال:
محمد.. تتوقع أبوي بيوافق علشان أتزوجها..؟!!


طالعته عقب ماتوسعت عيوني.. وأنا منصدم

خاف سالم وقال: لاتقول..؟!! يعني تتوقع ... مايوافقوا أهلي..؟!!

توسعت عيوني زوووود عن قبل..

رد سألني سالم وهو متجه صوبي ومسكني من إيدي وقال:
وش بلاك.. عيونك صارت قد كفوف إيدي..؟!! هذا كله ممكن يكون رد فعلهم..؟!!

طالعته وقلت : لا مو السالفة جذيه.. بس بلعت العلجة اللي كانت بفمي وما عندي غيرها.. شو أسوي..؟!!

وقف سالم.. وعضني عضة أستوت مثل ساعة بق بن.. وقال: أنا ميت من الخوف وأنت تفكر بالعلوج..

ضحكت أنا وياها.. وعقبها قلت: ألبس ملابسك وبيحلها ألف حلال..
المهم تركت سالم يتسبح ويلبس.. وأنا توجهت لغرفتي وكملت لباسي وتوجهنا لصوب الريوق وتريقنا..

وتوجهنا مباشرة للدوام..


****************************** ****************

(( سالم.. يتكلم ))

أول ما دش محمد الغرفة وقال نورة.. استانست بس.. هالطفس ما يوز عن سوالفه..

دشت الفكرة براسي.. يسدني ما ضاع من عمري وأنا أتريا..
نورة لي.. وأنا لنورة.. ولازم أشوف حل..

توجهنا أنا ومحمد للدوام.. وكل منا سار على مكتبه.. أما أنا..أول ما يلست.. أتصلت على تيلفون بيت عمي سالم ومنو رد علي..؟!! تعرفووون..؟!!

هيه نورة..

أول ما سمعت صوتها مادري شو ياني تميت ساكت إلين ما صكت بويهي
واتصلت مرة ثانية.. بس هالمرة تجرأت وقلت:

السلام عليكم..؟!!

ردت نورة: وعليكم السلام ورحمة الله وبركاته..

سكت ماتكلمت.. إلا يوم سمعتها تقول:
أيوه يالأخو.. تآمر على شي..

رديت عليها وقلت:
صباح الخير يا بنت عمي..

سكتت شوي وقالت: صباح النور.. منو وياي محمد..؟!!

جاوبت على طول : لا.. أنا سالم..

وهنيه أسمعها بدت تتكلم :
ياهلا بسالم..؟!! أشلونك ؟؟

حسيت قلبي يرد عليها مو لساني : بخير والله بس.. أنتي..؟!! وسكت..

تفاجئة نورة وقالت : أنا.. شنو..؟!!

تلعفست حتى الكلام اللي أبي أقوله لعندها وقف.. حاولت أقولها أشلونج..؟!!
قلتلها :

أنتي..؟!! طبخج حلو..

ضحكت وقالت : مشكور والحمدلله أنه نال إعجابكم..

حسيت أن موقفي سخيف ، قلت على طول: وين عمي..؟!!

جاوبتني وقالت: عمك..؟!! ليش ماتجرب تدق على جواله..؟!!

قلتلها : دقيت بس لقيته مغلق..

ضحكت شوي وقالت : مادام مغلق يعني في سابع نومة تبيني أوعيه..؟!!

قاطعتها : لالا.. بس سلمي عليه..

قالت: أن شاء الله..

قلتلها : مع السلامة.. وداري على عمرج زين..؟!!
وشوي إلا أسمعها تقول : سالم..؟!!
نورة .. تناديني..؟!! فديتج يابعد قلبي..؟!!

آمري يا نورة.. تفضلي..؟!! شي في خاطرج..؟!!

سكتت شوي وقالت : لا سلامتك.. بس لاتقاطع..

ضحكت أهنيه وقلت : أن شاء الله

ردت علي : مع السلامة اللحين..

قلت مرادد عليها : الله يسلمج..

نهينا المكالمة.. آه يا زينها نورة.. ويا حلات أسمي يوم يظهر من لسانها..
مو محمد..؟!! ياسليم الئيم..؟!! وووع منك يالطفس..


****************************** ***************
يتبع
vvvvvv
vvvvv
vvvv
vvv
vv
v

[بتاااار]

حجز ولي عوده





<<<< باروح اجيب نظارتي وروق شوي وجي


بس ياليت تكبرين الخط شوي ماعليك امر عيوني راحت فيها

[şσ ί Ļόve]

(( الجزء الثامن ))


(( دنيا ما خلت لا كبير ولا صغير ))


(( محمد يتكلم ))


أول ما وصلنا الدوام بديت أفكر وأفكر..
مرت أيام وشهور ونحن على هالحالة ويا عمي نزوره وبدون علم أبوي
شنو الحل..؟!! حتى المسكين سالم.. يحب بنت عمي.. والأثنين ماتزوجوا يتريوا بعض..شو ممكن أسويه يا ربي..؟!!

أقول: أحسن أريح أعصابي وبخلص هالدوام اللي كرهني هالحياة..

خلصت شغلي.. أنا وسالم.. وتوجهنا على طول وين ما صافين السيارة.. وأول مايـينا نركب السيارة لقيت شخص كبير في السن ياي صوبي وقال:

ماتذكرني..؟!!

طالعته.. وأنا أحاول أتذكر..وبعد شوي صرخت وحظنته :

هيه مو أنت اللي أنقذت أخوي..؟!! مو أنت العم...؟!!

ابتسم وقال: هيه أنا.. عمك علي ..والله ماتوقعت أشوفكم عقب هالشهور.. وأشلونه أخوك..؟!!

أشرت على سالم وقلت : مثل ماتشوفه.. أحسن مني ومنك..

يا سالم وسلم على الشايب وسولفنا شوي عن هالدنيا ونحن واقفين صوب السيارة.. طالعته وقلت :

شنو يابك يا عم..؟!! تدور على حد..؟!!

طالعني وهو مثل اللي مايريد يــبكي وعقبها قال :
والله أدور على ولدي ماشوفه..؟!!

سألته : منو ولدك يا عم..؟!!

طالعني وقال بعد تفكير : مايحتاي يا ولدي.. باجر بطوف ويمكن بلاقيه .. واللحين أترخص عنكم..

مسكناه أنا وسالم وحلفنا عليه أنه يتغدى ويانا اليوم..ويالله يالله إلين طاع..
وركبنا السيارة..

ولما وصلنا البيت توجهنا لميلس الرياييل ودخلنا العم علي..
دش أبوي وسلم عليه ، وقدمنا له الأكل وكل ويانا واستانسنا شوي..
المهم عقب الغدا.. شفت العم علي تعبان طلبت منه أنه يرقد شوي إلين صلاة العصر ، وبعد ماطلع روحي وافق ، ويبتله الفراش واللحاف.. وفرشت له على الأرض..

يا عمي علي وتمدد على الفراش ونام على طول.. يوم لحفته.. طالعته وهو راقد.. شكله مثل اللي شال هموم الدنيا وما فيها.. ياترى شنو بلاك ياعم من مصاب الدنيا..؟!!

خرجت من الميلس وأنا متجه صوب غرفتي وتريت إلين العم ما نش وصلى صلاة العصر.. وخلص.. عقبها توجهت بالشاي والقهوة صوبه وأول ما دشيت طالعني وقال :

ليش متعب عمرك يا ولدي..؟!!

طالعته وقلت : لا تعب ولاشي كله من الموجود يا عم..

صبيت له القهوة وتقهوى وقربت له التمر وخذ تمره بإيده وهو يفكر.. وسرحان ولا كأني مويود.. قاطعت عليه يوم قلت :

عمي علي وش بلاك سارح..؟!!

سكت شوي وقال : ولا شي يا ولدي .. بس ترى الدنيا ماخلت حد مايفكر..
أه.. وأنا عمك..

طالعته وأنا أحس أن الآه وراها جروح مكوية بصدر هالعم..قلت له :
حلفتك بالله يا عم .. خبرني شو بلاك..؟!! وشنو فيك؟؟ ومنو ولدك اللي خفت تقلي على أسمه..؟!!

تم ساكت وما كان يريد يتكلم ومع ضغطي الملح عليه جاوبني وهو يبكي وقال :
خالد علي..

طالعته وأنا أفكر..قطع الصمت اللي كان محيط بالميلس وقال:

ولدي .. خالد علي هو نفسه المدير اللي يدير شركتكم..

مفاجئة اصدمتني.. مرة وحدة وقلت: المدير ماغيره يا عم..؟!!

استحى العم ونزل راسه وهو يقول: دنيا..

أخذ حبة من التمر وهو يفرك فيها بأصابعه ومع الدموع اللي تسير بين تعرجات بشرته.. السمرة
هذي البشرة اللي تحمل طيات من الزمن خلفته فيه.. شكله واضح مجروح.. آه يادنيا.. حتى الكبار ما سلموا منج..

قلتله: عمي.. شي مستوي بينك وبين ولدك..؟!!

حسيته استحى زيادة وقال: ابصراحة يا ولدي.. مافي شي..بس تعرف مشاغل واشغلته عني..

حسيت أنه يريد يخبي في صدره.. لكن في نفس الوقت حبيت أني أساعده..

قلت له على طول : أسمعني.. ياعمي.. شنو رايك أسير وياك عقب لمشوار.. بس بيني وبينك..؟‍!!


رفع راسه وطالعني بعيونه المتخبية بين تعرجات ويهه وقال وهو يضحك :
لا يكون تريد تخطفني..؟!!

رغم جرحه إلا بعده يضحك..؟!!

دش الوالد هو وأخوي سالم للميلس.. ويلسوا معاه لفترة طويلة حتى صلاة المغرب.. وتوجهنا يميع للمسيد وصلينا وعقب شوي قلت أني بوصله للبيت لكن أبوي قال :

وش رايك تتعشا معانا ؟!!
أشر بأيده وقال : لا بسني الله يسلمكم والله أنكم أجواد صدق ترى الدنيا بعدها بخير..

مع المحاولات اللي انصدرت من أهلي والرفض من الشايب.. عقبها أخذت العم وياي في السيارة بعد ما كان أهو المصر على أنه مايطول..
المهم..
توجهت لأحد المطاعم وتشريت لنا العشا ، وتوجهت عقبها للبحر للمكان اللي أحسه بيخليه يرتاح..

خرجنا من السيارة وتوجهنا قرب البحر.. وعمي علي أخذ يتنفس من أعماق قلبه.. وتمت عيونه تبحر ويا سكون البحر.. وعقبها قال:

هيه يا ولدي..لو تعرف أن آخر مرة شفت فيها بحر كان متى..؟!!

وأنا كنت يالس أرتب المكان والعشا وجهت لعيوني صوب عمي اللي كان بعده ما يلس وقلت :
ليش..؟!! من متى ما شفت البحر..؟!!
وأخذت أترياه يجاوبني وأنا لفيت براسي صوب الأكل وأخذت ارتب في هالأغراض..

اقترب مني شوي شوي.. وهو يتمتع بملمس التراب اللي يمر بين أصابع أريوله..ويوم طالعت عليه.. لقيته ماسك هالنعول بيديه ويلعب بأصابع أريوله بالتراب.. إلين ما يلس احذاي.. وعقبها قال :

تقريباً.. ما شفته.. من.. من..؟!!
من 40 سنة..

طالعته وقلت وأنا متفاجئ :
شنهو..؟!!

40 سنـــــــــــة..؟!!

بالله عليك.. تتكلم صدق أنت اللحين..؟!!

سكت عمي علي.. فترة وعقبها قال :
خلها على الله .. المهم خلنا اللحين بعشانا.. وأخذ يضحك.. ضحكة والله ما رمت أفهم مغزاها..

طالعته وقلت : أترياني اللحين وأنا برد..

رحت أدور على الغريب اللي صارله من آخر مرة أختفى فيها.. غايب..

ويوم مالقيته.. توجهت مباشرة لصوب الشايب وحطيت العشا وتعشينا وعقب ما خلصنا من كل شي.. طالعني العيوز وهو يقول:
الله يعطيك ألف عافية على العشا الطيب..

طالعته .. الله يعافيك يالغالي..


تعرف يا ولدي محمد..
ياليت ابني مثلك.. بس تسلم البطن اللي شالتــك يا ولدي..


طالعته وقلت: شنو هالجرح اللي أشوفه ينزف بين حروف الكلام.. أشكيلي وأن شاء الله أكون لك عون.. يا عم علي..


وجهلي كلامه وقال : أي هم بان علي يا ولدي.. علشان تقولي أني مهموم..؟!!

طالعته وأنا أغمزه كأني أقوله.. علي يا عم..؟!!
وأول ما شاف الحركة اللي انصدرت مني
ضحك ضحكة والدموع تلمع بوسط اعيونه وقال : ابصراحة أنا ماقلت لحد هالهم اللي فيني من سنين أخاف أن الناس تغير نظرتها في ولدي..
بس من يوم ما شفتك.. والله قلبي أرتاحلك كثير..


حطيت إيدي على إيده وقلت : مادمت ارتحت لي اعتبرني ولد لك وخبرني وش بلاك..؟!! والله ماخلي الهم يسكن بصدرك بإذن الله..

أخذ يطالعني ومسك إيدي اللي كانت تحضن إيده وباسها بوسة الأبن للولد وعقبها قال:

تعرف كان ولدي خالد يموت بالنجاح والحمدلله نجح في جميع مراحله وبعت كل اللي أملكه حتى يكمل حياته ودراسته أما زوجتي توفت بسبب مرض خذ من عمرها يوم ورى يوم ومن عقبها رفضت أني أيــيب لولدي حرمة أب.. فيوم كبر زوجته من بنت أختي..
طبعاً المشاكل زادت أول ما دشت بنت أختي لهالبيت وتغير ولدي وصار يطول إيده علي ويبيتني بلا عشا..
وفي يوم من الأيام قالي أنه بيوديني علشان أفحص
بس أول ما وصلنا المستشفى تركني في غرفة ومن عقبها ماشفته طول هالسنين..



تعرف ليش.. يا ولدي محمد..؟!!



طالعته وأنا العبرة خانقتني : ليش يا عم..؟!!



لأنه كان فارني بمستشفى المسنين طول هالسنين.. لدرجة أني ماعرف إذا كان عنده عيال ولا لأ.. ويوم ييت أسأل عنه.. أكتشفت أنه انتقل من البيت اللي كان فيه لفلة كبيرة.. وأنا متأكد يا ولدي أنه شور حرمته.. والله أعلم..
المهم.. دلني واحد من الطيبين على مكان الشغل اللي يداوم فيه..



ونزل راسه وحط إيده على عيونه وتم يصيح والدموع غرقت لحيته البيضا.. وكمل والعبرات ترفع بجسمه وتحط فيه..
تصدق.. توقعته يتأسف..أو.. ياخذني بالحضن.. بس آآه من الزمن.. والله صدق من قال : قلبي على ابني انفطر.. وقلب ابني علي حجر..

وتم يصيح ويصيح وهو يمسح بكفوف إيده هالدموع اللي يذرفها بحرجة..

حضنته وتميت أبوس راسه.. وقلت ماعليه ياعم..ترى الدنيا دواره وأنا ابنك.. من يوم ورايح..وهذا الخالد طز فيه يعله يفداك أن شاء الله...

طالعني وهو يصيح وحط عينه بعيني وقال : لا يا ولدي.. لا تقول جذيه بس..تعرف يوم شافني يا ولدي شنو قال..؟!!
قال : أطلع برع من الدايرة لطلبلك الشرطة..تصدق..؟!!

يطلبلي الشرطة..؟!! أنا.. أنا.. أبوه اللي ضحيت بكل عمري يقولي هالقول..؟!!


آآآه من اللي حرج أعصابي يا ولدي.. آآآه.. بس ماقول غير : لا حول ولا قوة إلا بالله العلي العظيم..


ماعرفت اهنيه شو أسوي بالضبط.. لكن تميت أواسيه وقلت :
والله يا عم مالك مرده لدار المسنين مادام راسي يشم الهوى.. والله..

طالعني العم علي وقال وهو يمسح هالدموع : وأنت شنو ذنبك تتحمل اهمومي زود على اهمومك ..؟!!
خلني يا ولدي.. ترى اللي خلقني.. ما يضيع أحد لا بمكان ولا برزق وأنا عمك..


طالعته وأنا أتكلم بجدية : أسمع يا عم هذا الموضوع انتهى.. وذنبي.. هو نفس الذنب اللي خلاك تساعد أخوي .. وإذا أنت تحسبه كرم مني..؟!!
لأ.. أعتبر أني أرد جميلك اللي شايله فوق راسي..

ضحك وقال : أي جميل.. بس خير أن شاء الله .. وعسى ربي يرزقك الحرمة الطيبة والذرية الصالحة..

المهم كملت وياه السهرة بس مو لمنتصف الليل..!!
لأن هالشايب كان تعبان..

فتصلت على عمي وطلبت منه أنه يستقبل في بيته ضيف.. وطبعاً كان العم علي..

خلصنا من السمرة واتجهت بالعم علي لبيت عمي سالم ، وأول ما وصلنا.. يلسنا رباعة في ميلس الرياييل.. وفهمت عمي سالم أن الضيف بييلس عنده فترة معينة إلين مايرد ابنه المسافر..
وهذا نفس اللي اتفقت عليه مع العم علي.. علشان مايحس بالإحراج.

تركت العم علي في بيت عمي سالم.. وتوجهت للبيت وأنا شايل سر يديد مايعرفه غير ربي والشايب وأنا..

****************************** ****************

(( نورة تتكلم ))

يوم رفعت السماعة.. ولقيته سالم ما صدقت.. والله وحشني موووت..
كنت أتمتع بكل حرف يقوله..

فديت اللي قال داري على عمرج..

تلفت على صوت أبوي وهو يقول: نورة منو كنتي ترمسي وياه..؟!!

طالعته وقلت : هذا سالم.. قال أنه اتصل عليك وحب يسلم بس لقى جوالك مغلق..

هيه صح.. أنا أغلقه علشان محد يزعجني..
المهم أبي ريوق اللحين..وعقبها خير أن شاء الله

سرت المطبخ.. ويهزت الريوق لبوي وسرت ويلست احذاه.. وكنت أشوفه وهو يتريق..تم يطالعني شوي عقبها قال :

شنو اللي قاله سالم ... بالضبط يابنتي..؟!!

تغير لون ويهي.. وأبوي يكمل ريوقه وهو يترياني أجاوبه..
شنو اللي تباني أقوله لك يا يبه..؟!! تبيني أخبرك.. أني ميته بولد أخوك سالم..؟!!

طالعته وقلت : قال أنه حب يسلم ويصبح عليك ..و...وأن طبخي حلو..

ضحك أبوي وهو مخلص من الريوق.. وقال: اللحين أنا بسير بخلص الشغل اللي لازم أخلصه وبرد..

سار الوالد وتلبس وأول ما كان بيظهر طالعني وقال: في شي ناقص على البيت...؟!!

رديت عليه وقلت: لا.. والحمد لله ترى خير الله وااايد..

ابتسم وراح..

أما أنا توجهت للمطبخ علشان أزهب الغدا.. مرت الساعات ورى ساعات إلين ما وصل الوالد.. دش.. وتسبح .. وتغدى ورقد.. إلين صلاة العصر..

وعقبها تمينا يالسين أنا وياه نرمس عن يلست أمس.. اللي كانت اهنيه.. وبدأ يتكلم بكل إعجاب عن محمد.. أما أنا كنت أجر الأسئلة عن سالم..

والمشكلة أن أبوي مو راضي يفهم تلميحاتي..
قاطع كلامنا صوت المؤذن لصلاة المغرب.. توضأ أبوي وتوجه للمسيد..
أما أنا توضيت وصليت صلاة المغرب.. ورحت أجهز العشا..

وأول ما خلصت العشا وترتيباته إلا أذن العشاء وشفت أبوي يخرج علشان يسير المسيد..

وعقب ما مر الوقت وخلص أبوي من صلاة العشاء.. تعشينا وكل شي وييت أيلس ويا أبوي عقب ما خلصت من شغل المطبخ اللي هدلي حيلي..

وفجأة بدون مقدمات.. قاطع هالسمرة.. صوت الجوال..
ويوم سرت أييبه.. علشان أبوي يرد.. لقيت مكتوب على الجوال.. حمودي..

هنيه توقعت حد من ربع الوالد.. لكن يوم رد ..فهمت من طريقة كلامه.. أن هذا محمد أخو سالم.. يعني ولد عمي..

طالعني أبوي وقال: سيري جهزي فراش ولحاف بيينا ضيف..

طالعته وقلت: أنزين أبوي تعشوا ولا لأ..؟!! ولا أجهزلهم عشا..؟!!
رد علي الوالد وقال: لا يابنتي.. متعشين.. جذيه قال ولد عمج محمد.. مشكورة.. يابنتي..

ومر الوقت.. وأنا.. أتريا بفارغ الصبر..

طبعاً فرحت كثير على بالي أن سالم بيي علشان يرقد عندنا لكن الصدمة صحتني من غفلتي يوم شفت محمد ويا ريال شايب يدشون الميلس..

كنت أراقب من الشباك اللي يطل على جهة الميلس.. بس بشكل غير ملحوظ..

ورحت أدور وأدور بعيوني لكن مالقيت سالم.. تحركت وأنا أقول ... أووووف وينك يا سالم..؟!! ليش ماييت وياهم..؟!!

مضى الوقت وكلهم يالسين في الميلس.. أبوي والشايب ومحمد..


فكري تم يروح ويي.. وفجأة قلت بصوت مسموع.. بس الحمد لله محد سمعني..
حامض على بوزك يا محمد أنك تاخذني.. يا أكون لسالم.. ولا أيلس بلا زواج ولو شو ما قال أبوي..

دش علي أبوي وقطع حبل أفكاري يوم قال: خلاص محمد سار البيت ويسلم عليج.. وترى هذا ضيفنا يا بنتي.. بيضي ويهي معاه ولا تنقصي بحقه.. ولو قصر أي شي في البيت تعالي وعطيني خبر سمعتي وأنا أبوج..؟!!

أشرت على عيوني وقلت : من عيوني يابو نورة..

ضحك وقال: الله يسلم عيونج يا نورة.. وعلى قولت محمد.. نورة البنورة..

راح وهو يضحك.. أما أنا.. قلت بخاطري.. أنا وأنت يا محمد والزمن طويل..

****************************** ****************

(( محمد يتكلم ))

أول ما وصلت العم علي لبيت عمي سالم.. عرفتهم على بعض.. والحمد لله شكلهم بيوانسوا أعمارهم.. ودعتهم وركبت السيارة..

وأنا يالس أسوق.. فكري تم يروح ويي على هالشايب.. ويوم طالعت الساعة لقيتها تأشر على بداية الليل..
يعني جدامي الليل بطوله علشان أسهر في مكاني.. هيه والله.. مكاني..؟!!




يالغريب..؟!! شنو قصتك أنت بعد..؟!! مرة أشوفك .. وأسابيع تغيب.. بدون أي خبر..




أول ما وصلت عند البحر.. تميت يالس في السيارة وما ظهرت.. وتم فكري

ويا لشايب.. أذكر شكله.. ريال كبير في السن الشيب غطى راسه وشنبه

ولحيته الطويلة.. والزمن رسم خطوطه اللي مثل النحت في ويهه الأسمر

وإيدينه النحيفة.. اللي عروجها ظاهرة مثل العناوين .. آآآه ريال ضحى
بشبابه وربى أبنه بكل ماربي عطاه من طاقة ويوم فرح فيه شنو المقابل..؟!!

يبيعه أبنه..؟!! آآآه يا زمن شنو مخبي لنا وياك..؟!!


شوي.. أسمع حد يطق الجامة.. يوم شفته.. لقيته الغريب..

ظهرت من السيارة وأنا أسحب أريولي.. طالعني الغريب وقال : شنو اللي غير حالك هاليوم..؟!! التعب مرسوم بويهك..؟!! خير أن شاء الله..

ومشيت وأنا أحس أن عقلي مو وياه.. وسكرت باب السيارة لدرجة أن سيارتي أهتزت من قوة الضربة..

شفت عيون الغريب تلمع وهو يطالع فيني ، اقتربت منه وقلت : شنو بعد..؟!!
بيستوي لنا من الناس اللي نحبهم..؟!!
ليش الخيانة صارت تجري بالدم..؟!! خبرني ليش..؟!!

تفاجئة من رد الغريب يوم قال :

مايلجأ للخيانة إلا اللي مابقلبه ذرة الإيمان.. ترى اللي يعرف الله ورسوله- صلى الله عليه وسلم – ما كان بيعطي الشيطان مجال..


سكت منه ومشيت لصوب البحر.. أما الغريب أخذ يتابع خطواتي إلين ما صارت المسافة منبينا كم شبر..

طالعني وقال : يــيت قبل.. بس منو الشايب اللي كان وياك..؟!!

طالعته وأنا الدموع غرقة اعيوني وقلت : ليش ما يـيت علشان تسمع.. آهات تطلع من صدر ياكله القهر..؟!!

ليش..؟!!

بديت أصرخ.. وأصرخ .. طالعني الغريب.. واقترب مني وقال:
محمد.. استهدى ربك.. شنو اللي استوالك..؟!!

أرجوك..؟!! يالغريب.. خلني في حالي.. أرجوووك

قاطعني وقال : خبرني شو بلاك..؟!! الريال الشايب شو علاقته فيك..؟!!

حسيت النار سوت حريجة بصدري.. طالعته وأنا أطيح جسمي على الرمل علشان أيلس..

أما الغريب أخذ يشوفني منصدم بالحالة اللي كنت فيها.. وأول ما يلست أقترب مني شوي ومثل العادة لازم تفصل منبينا كم شبر..

طالعني الغريب وقال : محمد.. ممكن تخبرني..؟!! يمكن أقدر..

قاطعته وقلت : ليش تريدني أخبرك باللي يجرح قلبي وأنت ولا تخبرني حتى وين ساكن..؟!! أو أي شي يتعلق فيك..؟!!

جاوبني ...؟!! قوووول..؟!!


سكت الغريب.. ووجه عيونه للبحر..
السكوت كان هو سيد الموقف.. كل منا ظل ساكت.. عقبها هديت شوي..



وطالعت الغريب اللي رغم الكلام اللي قلت له بقى وياي..

وقلت : يالغريب.. أعتذر منك.. بس والله.. أنتــــ.....

قاطعني وهو يقول: خبرني شنو هي السالفة اللي ثــقلت عليك الحمل..؟!!

أخذت أشوفه شوي.. وعقبها قلت :
شفت الشايب اللي كان وياي.؟!!

كان الغريب يسمعني بالحرف وقال : هيه.. شو بلاه..؟!!

قلت له وأنا أطالع على إيدي : هذا هو اللي.. أنقذر أخوي سالم.. يوم.. يوم..

قاطعني الغريب: ما يحتاي تكمل عرفت.. أنزين شو فيه..؟!! وشنو مستوي وياه..؟!!


هذا يالغريب.. اليوم اللي أنقذ فيه أخوي كان هذا أول يوم يظهر من دار المسنين عقب 35 سنة.. كان يدور ابنه..
ويوم شاف أخوي مرمي على الأرض بدمه ساعده أهو وراعي التكسي اللي كان راكب معاه..
تصدق.. أنقذ أخوي.. ومن شهور طويلة.. ومن ذيك الشهور.. يوم ورى يوم.. من مكان لمكان يدور على ابنه..؟!!

طالعني الغريب اللي حس أن العبرة خنقتني.. وقال:
محمد.. ريح أعصابك شوي عقب كمل كلامك..!!

طالعته.. وأخذت أبكي وأنا أتكلم :
تعرف أن المدير النذل أهو ابنه..؟!! هالريال الطيب..ينعق بدار المسنين وكم..؟!!

وكم..سنة يالغريب..؟!!
35 سنة..؟!!

طالعني الغريب وهو مثل اللي يمدني الطاقة وقال : يا محمد.. ولا تكرهوا شيءً وهو خيراً لكم.. يمكن ربي أرسله ينقذ أخوك.. علشان أنت تنقذ ما تبقى من عمره..؟!!

طالعته وأنا أحاول أمسح هالدموع بغترتي.. وقلت : شنو قصدك..؟!!

رد علي بجرأة وبرقة وبأسلوب حنون في نفس الوقت وقال : محمد ترى هالريال تعب لمدة 35 سنة.. أحس أنه ريال خير عليك.. أهتم به

وأنا الغريب.. اللي نظرتي بالشخص بإذن الله تصيب..ما تخيب

بعد ما هديت شوي وأستجمعت قوتي قلت وأنا أطالع فيه :

عطني شورك.. تراني اللحين خليته عند عمي سالم.. يبيت هاليوم.. بس تعرف.. ما روم أخليه في بيت عمي على طوووول...


سكت فترة من الوقت وطالعني عقبها وقال:
تعرف يا محمد..شنو الحل..؟.!!

طالعته وقلت : لا تقول أني أسير عند ولده..لأني لو شفته والله يا جاتل أو مجتول..

حط عينه بعيني وهو يريد يرطب الجو قال:
وأشلون يقول عنك سالم طفس..؟!!

ابتسمت ابتسامة وعقبها تنهدت وقلت : يالغريب شور علي..

رد علي وهو موجه لي نظرة كلها شك : وبتاخذ على نصيحتي...؟!!

ضربت على صدري وقلت : جربني.. بس ماريد حل غريب مثــلك..؟!! عطني حلول معقولة ومنطقية..


ضحك الغريب وقال:

أشور عليك أنك تسوي......................
.............................. .................... .............




صرخت وأنا أوقف على اريولي وقلت : شنو هذا يالغريب..؟!!

طالعني وقال : شو بلاك وقفت يامحمد..؟!!

نظرته بنظرة وأنا مو قادر أوجه أي نظرة غير لعيونه لأنها هي الشي الوحيد بارزة مثل ماقلت قبل..

يالغريب.. اللي فيني كافيني.. وأنت لو تعرف..؟!! وبديت أصرخ وأنا أتلفت براسي مرة يمين مرة يسار
يالغريب.. يالغريب.. دخيل الله.. خذ كلامي بمحمل الجد.. أقولك الريال أبنه ناكرنه وتشور علي بهذا الشور..؟!! شو.. تستخف بدمك..؟!!


الغريب ما رد علي.. وقالي عقب فترة : أنزين يا محمد.. أنت شنو شورك لهالمشكلة..؟!! عطني شورك.. وخلني أشوف..؟!!

لأن كلامه ما عيـبنـــي سرت عنه شوي.. وأخذت أفكر

وأمشي على البحر وعطيته ظهري.. أما هو.. ظل مكانه ولا تحرك.. وأنا أخذت أمشي رايح جاي.. عقب شوي.. اقتربت صوبه وتوقفت وقلت:

أسمع.. شو رايك أروح وأضرب أبنه ضرب ، وأخليه يعترف بأبوه..؟!! واخذت أرفع أصبعي وأسوي حركة على أساس أني ذكي..

تعرفون شنو اللي خلاني أضحك على الرغم أني كنت متضايق حيل..
ضحك الغريب ضحكته الحلوة..

وطالعني عقبها وقال: وشنو اللي يضمنلك أنه مايرده لدار المسنين..؟!!
شنو ...؟!! بتنصب خيمة جدام بيتهم وبتبقى مراقبه الخاص..؟!!

سكت شوي.. وأنا أفكر بكلامه المنطقي.. قاطع سكوتي الغريب يوم قال:

اسمعني يا محمد ماعندك غير اللي قلته لك.. وخذ بشوري وهذي أول الخطوة وعقبها بخبرك شنو تسويه علشان تريح هالشايب..

طالعت الغريب وأنا حاط إيدي فوق راسي مثل اللي يولول..وقلت :
شنو الحل يا رب..؟!!

ضحك الغريب بضحكته الملفته وقال وهو يطالعني بنظرة ثقة:
خذني على قد عقلي ..

رفعت إيديني من فوق راسي وقلتله: بسايرك.. وبشوف لوين ناوي توديني وياك يالغريب..

سمعت صوت الجوال يدق.. فتشت مخابيي لكن مثل العادة الجوال كان في السيارة أتجهت للسيارة علشان آخذ الجوال ، طالعت الغريب وقلتله: شوي وبردلك..

سرت للسيارة وطالعت الجوال لقيته سالم.. رديت عليه :
أيوه يا سالم .. شنو عندك..؟!!

رد علي سالم وهو بارد الأعصاب :
طفس.. أكيد طفس.. الواحد يقول يا مليون مرحبا بأخوي..
وأخذ يقلد صوتي متمصخر
أما أنت.. أيــــوه يا سالم.. شنو عندك..؟!!

ماكان لي مزاج أضحك.. قلتله: سالم الله يخليك خلني بحالي اللحين..

سكت سالم شوي وقال: شو فيك..؟!!

رديت عليه : ولاشي بس يوم برد البيت بكلمك أوكيه..

جاوبني سالم وقال: خلاص.. أترياك..وأول ما توصل دش غرفتي على طول..

نهينا المكالمة ويوم اتجهت صوب الغريب .. صدمني هالغريب.. مستوي يظهر فجأة ويختفي فجأة..


آآآه منك يالغريب شنو بيــيــني منك بعد..؟!!


ركبت السيارة وتوجهت للبيت ويوم سرت غرفة سالم..لقيته يترياني..
طالعني سالم وترك الكتاب اللي كان يقرأ
فيه وقال:

شو بلاك..؟!! حسيتك متضايق يوم رمست وياي..؟!!


طالعته وقلت: بخبرك يا سالم شي وأبيك تفهمه زين وبلا أسئلة..


يوم شافني سالم وأنا على هذي الحالة .. عدل يلسته وحط المخده في حظنه.. وفوقها إيديه وأخذ يشوفني بطريقة أكثر جدية.. وقال :
أسمعك.. قول..؟!!

أقتربت منه ويلست على الكرسي اللي احذا الشبرية وقلت بعد سكوت :
رحت بيت عمي..

قاطعني وقال: يالخسيس ليش ماقلتلي كنت سرت وياك..؟!!

وقفت وقلت لسالم : تعرف.. مايفيد أني أخبرك أي شي.. همك نورة وبس..

وكنت متجه صوب الباب وأنا معصب.. قام من فوق شبريته ووقف على الباب معارض أني أخرج وقال وهو مغطي الباب بجسمه وإيدينه :

أوووف يا محمد..؟!! شنو اللي مخليك جذيه..؟!!
أكيد السالفة شايدة ولا أنا أعرفك يا حبك للمصخرة..

إيلس إيلس والله بتكلم وياك يا محمد بجدية ولا بتمصخر والله حلفت..يالله إيلس..

يوم شفت سالم يحلف.. رجعت للكرسي ويلست وهو رد ييلس فوق شبريته وحاط المخده فوق حظنه وأخذ يسمع اللي أقوله.. قلت له:
ترى الشايب بيــبيت ابيت عمي فترة

طالعني سالم وهو مستغرب وقال: ليش..؟!! وبيته..؟!! وأهله..؟!!

رديت عليه بخبرك السبب بس مو اللحين.. كل شي بوقته حلو.. ولو رحت بيت عمي ماريدك تغث العم علي بأسئلتك سمعت..؟!!

طالعني سالم وقال: خير أن شاء الله.. وفالك طيب..

وتركت سالم في غرفته مستغرب عن الحالة اللي أنا فيها.. وأنا رحت غرفتي..عقب ما وصيته أنه لا يغث عمي علي.. فتسبحت.. ولأول مرة أصلي قيام الليل وتميت أدعي وأدعي.. وعقبها قريت القرآن.. ورقدت.. إلين صلاة الفير ..بس ارتحت راحة..؟!!! مقدر أوصفها..

****************************** ****************

(( سالم يتكلم ))


بس أول مارد محمد البيت ودش علي حجرتي تفاجئة بعيونه الحمرة.. معقول يكون تعبان..؟!!


ولأول مرة أشوفه على هذي الحالة من عقب حالته يوم الحادث اللي صار..


شنو اللي قلب مزاجه.. بس محمد أعرفه زين قلبه طيب.. معقول.. يكون الشايب طايح في مشكلة وهو مايريد يخبرني..؟!!


استغربت أن الشايب في بيت عمي سالم ، لكن عقب ما شفت محمد يعطيني الأوامر باللي لازم أسويه وما أسويه.. ما حبيت أكون فضولي بهالحزة بالذات..


مو مشكلة بخليه على راحته اللحين ومرده يخبرني..وأول ماخلص محمد جملته.. ظهر من عندي.. بدون مايقول حتى: تصبح على خير..وسكر الباب من وراه..


رميت عمري على الشبرية اللي كنت يالس عليها وتغطيت وقلت..
اللحين برقد أحسن لي.. باجر علي دوام وأريد أريح جسمي المهدود..


وهمست بصوت يالله يالله ينسمع : تصبحين على خير يا نورة.. وغمضت اعيوني ورقدت...


****************************** ****************

يتبع
vvvvvvv
vvvvv
vvv
vv

[şσ ί Ļόve]

المشاركة الأصلية كتبت بواسطة بتاااار

حجز ولي عوده


<<<< باروح اجيب نظارات وروق شوي وجي


بس ياليت تكبرين الخط شوي ماعليك امر عيوني راحت فيها

ارحبـوو

تــــم .. كبرت الخـط وسـوري

بإنتظــآأإركـ لاهنت

[şσ ί Ļόve]

(( الجزء التاسع ))

(( فرح رغـم الجرح ))

(( العم علي ))

أول ما حطني محمد في بيت عمه سالم.. خفت أثقل عليهم.. بس يوم شفت هالويه السموح.. أبو نورة..
تبدل الخوف لراحة مابعدها راحة.. أيه يا رب.. كم أنت كريم على عبادك..

وعقب مايلست ويا أبو نورة بعد ماتركني وياه محمد وسار.. أستسمح مني وهو متأكد أن كل شي عندي وجاهز.. وماعلي قصور.. تركني علشان أريح جسمي الهلكان.. وقال: تصبح على خير يا علي.. وإذا احتيت شي دق على هالتلفون اللي احذاك على هالرقم.. وعطاني رقم جواله.. وحط تلفون البيت احذاي..

طالعته وقلت: وأنت من أهل الخير.. ومشكور ورايتك بيضة..

سكر الباب وراح..

وأنا أول ما حطيت راسي.. أخذت أفكر وأفكر.. وأقول :


آه ياقلبي من زمن صار الأبو يذرف أدموعه بسبب عياله.. معقول يا خالد..؟!! معقول تسوي فيني جذيه..؟!!

من يوم ما فريتني في دار المسنين وأنا حاطنلك مليون عذر وعذر.. قلت ماعليه.. أكيد باجر بيينــي..؟!!

وباجر كان يجر باجر واللي عقبه..

وأثاري باجر كان 35 سنة من عمري.. وأنا حاطنلك أعذار الأب لبنه..
بس ماعليه.. ماعليه.. ياخالد..

أخذت أفكر بمحمد اللي ربي رسله لي.. والله أنه ابني اللي مو من صلبي.. ياهنيالك يابو سالم بعيالك اللي محد مثلهم..

من يوم ما وصلت لهنيه.. الكل يعاملني على أساس أني واحدٍ منهم.. وحاطيني فوق روسهم.. بس ماقول غير: الله يجازيهم مليون خير وخير..

وبدون ما حس غرقت مخدتي بالدموع..وبوسط الدموع هذي رقدت من كثر التعب.. إلين اليوم الثاني..


****************************** ****************

(( محمد يتكلم.. ))

في صباح هاليوم.. اليديد

نشيت بنشاط غير معتاد.. وظهرت من غرفتي متوجه مباشرة لغرفة سالم ويوم بطلت الباب.. مالقيت سالم في غرفته.. فخرجت من الغرفة وصكيت الباب.. ويوم ييت ألف بويهي علشان أسير.. الصالة..

لقيت سالم واقف وراي على طول..

طالعته وقلت: بسم الله ياسالم .. ماتعرف تسوي حركة.. تخليني أعرف أنك وراي..؟!!


تبهت على ضحكت سالم وقال : أنا أريد أخرعك.. ومنو قالك أني أريد أنبهك عن وجودي..؟!!



أخذت أطالع بعيوني وحكيت راسي مثل اللي يبي يتذكر.. وأنا أقول في خاطري.. هذي مثل جملة الغريب..؟!!


خزيته ابنظرة ولا رديت عليه.. مشيت وتوجهت للصالة وين حاطين الريوق.. وسالم أخذ يهذرب بالسوالف وأنا ما عطيه ويه..

ويوم شافني ساكت.. سكت هو بعد إلين ما خلصنا الريوق.. وساعتها.. كل واحد اتجه لغرفته وتلبسنا.. وسرنا على الدوام بسيارة وحدة..
في السيارة.. تسندر راسي من هالسالم.. اللي كل كلامه.. نورة ونورة..
وما صدقت أني وصلت الدوام..
صف سالم سيارته عند الباركن وظهرنا رباعه من السيارة واتجهنا لمكتبنا..

سار سالم مكتبه.. أما أنا..
توجهت للمكتب.. وبالي عند فكرة الغريب.. ويوم دشيت المكتب.. يلست على مكتبي.. وأخذت هالتيلفون المحطوط على هالمكتب.. وبديت أتصل على بيت عمي سالم..

ردت علي نورة وقالت: ألو..

رديت عليها وقلت : السلام عليكم

وعليكم السلام ورحمة الله وبركاته.. منو وياي..؟!!

أنا محمد ولد عمج يا نورة.. أشلونج..؟!! أن شاء الله بخير..؟!!

شوي سمعتها تضحك وعقبها قالت : الحمد لله بخير .. بس ما قلتي يا محمد..؟!!

خير يا نورة..؟!! في شي..؟!!

لا ياولد عمي بس ماتعرف منو عندي في الخط..؟!!

أي خط يانورة..؟!!

الخط الأول.. تراك أنت متصل وييت بالخط الثاني

سكت شوي وقلت : منو.. بالخط انزين..؟!!

محمد.. أنا اللي أسألك مو أنت..؟!! ترانا طولنا على الخط الأول..

رديت عليها وقلت وأنا شاك بشخص :معرف بس نورة شوي وبرد أتصل.. أوكيه..؟!!

انزين يا محمد..

صكيت التيلفون وظهرت من مكتبي وتوجهت لمكتب سالم وبدون ما يحس فيني.. سحبت التيلفون منه وقلت :

نوووورة البنورة شنو رايج فيني..؟!!

سمعتها تضحك وتقول : يعني عرفت منو كان بالخط..؟!!

مابغيت أكمل الجملة.. إلا سحب سالم السماعة مني وقال لنورة : تريي شوي..

حط السماعة بصوب.. وأخذ يركض وراي في الممر.. وأول ما تأكد أني أختفيت رد الحبيب يكمل هالسوالف.. بس أنا أعـيـبكم.. رديت عنده ولعوزته مرة ثانية.. وعقبها رجعت مكتبي..

المهم.. أتصلت مرة ثانية على بيت عمي سالم وردت علي نورة وقالتلي أن سالم أخوي من زمان صك عنها.. بس كان حاب يسأل.. أونه..؟!! عن عمي سالم..

طوفتها بس على مزاجي .. وقلت:
لو سمحتي يانورة البنورة ممكن أرمس ويا عمي..؟!!

ضحكت نورة وقالت : كان سالم أشطر..؟!!

ليش..؟!! شنو اللي تقصديه يا نورة..؟!!

لأني قلتلك من البداية أن سالم كان يبي أبوي.. بس أبوي راقد..؟!!

أهنيه تطمن قلبي وقلت : والله أسميج فتو كوبي من سالم.. صج أنكم..لايــ
وسكت شوي..

أحاول أمسك هالسان اللي وين مارحت فاضحني..

سمعت نورة عقبها تقول : كمل..؟!! ليش سكت..؟!!

أهنيه تأكدت أن نورة تحب سالم.. حسيتها تدور منبين الحروف على اللي يطمنها أن سالم يبيها..

قلت بصيغة جدية: لا ولا شي.. بس هذا عم سالم.. مو...عمي

وعلى طول حطيت إيدي على فمي.. علشان أنطم على عيني.. وقلت بخاطري أوهوووو أنا أعرف أن لساني مسحوب.. بس مو لذي الدرجة..؟!!

أما نورة ماتصدق أن لساني ينسحب..ورجعت تقول :
محمد.. شنو عم سالم..مو عمي..؟!! أنت فيك شي..؟!!

رديت بسرعة علشان ما أتوهق :
سمعيني يا بنت العم.. أنا أتصلت علشان عمي علي.. الضيف اللي عندكم..

هيه يا ولد عمي.. اللحين عرفت.. أتصل على تيلفون الميلس وهو بيرد عليك.. لأن أبوي خصصله تيلفون الميلس لعمك علي.. على قولتك..

أنزين.. عطيني الرقم لو سمحتي..؟!!

عندك ورقة وقلم يا محمد..؟!!

هيه عندي.. ولا مكتب على الفاضي..؟!!

ضحكت وهي تقول : أندوك الرقم أكتب يالطفس..
.............................. ......

أنا سكت شوي وكتبت الرقم وأول ما خلصت قلتلها : نورة لا تسايري سالم واااايد تراه بيخربج.. من مكالمة حفظتي طفس..؟!! عيل باجر شنو بتقولي..؟!!


ضحكت وهالمرة أهي من طاحة بلسانها.. الحمدلله يعني طيحت هالسان وراثة.. المهم مو أنا بروحي اللي أطيح بلساني..

وقالت: هذا سلومي.. مــ...

ويوم ركزت أنها طاحت بلسانها..اسكتت.. وأنا متأكد أنها اللحين حمرة مثل الطماط.. المهم حبيت أختصر هالموقف فقلت:
نورة يا بنورة اللحين برخصتج ، لأني بتصل على عمي علي.. شي بخاطرج..؟!!

قالت بسرعة مثل اللي ماصدقت بتصك التيلفون :
لا مشكور .. مع السلامة..

مع السلامة يا نورة.. بس سلمــ...

حشى ما كملت جملتي إلا صكت.. يالله من وين بتاخذ هالدفاشة غير من عند سليم الئيم..ههههههه

أخذت الرقم.. وبديت أضغط على أزرار هالتيلفون.. إلا أسمعه يدق.. وبعد شوي سمعت حس عمي علي:
السلام عليكم ورحمة الله وبركاته..

وعليكم السلام يا عمي علي..أن شاء ما كون أزعجتك..؟!!

منو..؟!! ولدي محمد..؟!! ياهلا بالضي.. اللي نور الحي..

الله يا عمي شنو هالترحيب ترى مشكلة لو تعودت عليه..؟!!

ضحك وقال :
تراك غالي.. يالعالي..بقدرك.. ومنزالك..


أنحرجت أهنيه الريال من الصبح يرحب فيني..ما عرفت شنو أقول..؟!!

وشوي سمعته يقول : محمد يا نظر عيني..؟!!

جاوبه قلبي قبل صوتي : لبيه.. يا عمي..

رد علي بصوته الدافي وقال : لب الله نداك.. بكل خطوة معاك.. ومن كل ضيقة نجاك.. ويآذي من آذاك

قلت له : والقايل أن شاء الله..
رد علي : آمين.. يا ولدي...

أنزين يا عمي ماقلت شنو اللي تبيه ..؟!!

طوف علي اليوم يا ولدي.. لاتتركني وتنساني..؟!!

جاوبته بتأكيد : أفا عليك.. يا عم علي.. أنا..؟!! عسى ربي ياخذ روحي لو نسيتك..

قاطعني وقال:

أمنتك بالله يا ولدي محمد.. مثل هالدعاء لا تقوله وأنا عمك.. ماتعرف متى يكون باب السما مفتوح.. ونحن اللحين صبح ومحبوب الدعاء اللحين.. ويمكن تنقبل الدعاء بدون ماتدرك..

سكته وأنا أطمنه : خلاص والله ماعيدها أن شاء الله..

بس ماقلتلي يا عمي..؟!! أشلون نمت..؟!! أن شاء الله أرتحت برقادك..؟!!

نمت مرتاح البال يا محمد.. وعسى ربي يريح بدنك من كل علة وزلة ، أنت وجميع أهلك ومحبيك..

قلتله: وأنت معانا أن شاء الله.. بس تريقت ياعمي..؟!!

هيه والحمد لله.. نعمة أن شاء الله ربي يحفظها من الزوال..

رديت عليه : آآآمين أن شاء الله أنزين أترخص عنك لأن اللحين عندي شغل بخلصه واليوم بمرك بإذن الله..

أن شاء الله يا ولدي.. الله يحفظك.. بكل خطوة.. مع السلامة

مع السلامة يا عم..

نهينا المكالمة.. وحسيت كأن ربي عطاني طاقة على غير عن المعتاد.. ياني نشاط مو طبيعي.. يالله يالله علشان أخلص هالدوام..
وأسير لعمي.. اللي أحسه استوى شي كبير في حياتي..


****************************** ****************


(( نورة تتكلم ))

أحلى صباح يوم أسمع فيه حس هالسالم..وأنا يالسة أفكر فيه.. إلا شوي أسمع صوت التيلفون.. توجهت للصالة علشان أرد على التيلفون.. وتعرفووون منو كان...؟؟!!


هيه سالم.. رديت عليه : ألو..؟!!


قال: السلام عليكم ورحمة الله وبركاته..

وعليكم السلام يا سالم..

أشلونج نورة..؟!! أن شاء الله بخير..؟!!

الحمد لله على كل شي.. بس أنت أشلونك؟؟ وأشلونها حرمة عمي
وعمي وأخوانك يميع..؟!!

والله يسرج حالهم يالغالية..كلهم في صحة وعافية والحمدلله..

وشوي أسمع صوت في الخط الثاني.. قلت : سالم تريا شوي.. علشان برد على الخط الثاني.. لا تسكر..أوكيه..؟!!

أوكيه يا نورة.. سيري للخط وأنا بترياج..

رحت للخط الثاني وتعرفون منو.. كان..؟!! كان محمد.. ولد عمي..
بس سكر على طول وقال عقب بيرد.. وبيتصل.. أما اللحين برد للغالي ولد عمي..
رديت لسالم.. وقلت :
أسمحلي تأخرت عليك..؟!!

لا عادي.. مو مشكلة.. صكيتي عن اللي بالخط ولا بعدج..؟!!

لا خلاص.. هو بروحه صكر قال: عقب بيرد يتصل..

تغيرة طريقة كلام سالم وقال : أنزين.....ممكن أعرف منو كان..؟!!

هيه عادي .. يعني مو لازم تسأل.. هذا محمد أخوك..

أخوي...؟!! شنو يبي ..؟!!

يمكن يبي أبوي ..... شرات منت تبيه..؟!!

سكت سالم شوي وقال: المهم حبيت أسلم سلمي على عمي وااايد وقوليله أشتقتلك موووت.. أنزين مووت..

أن شاء الله.. وأنت بعد سلم على محمد.. وعلى الأهل.. ومشكور والله يجازيك على قد نيتك..

وشوي بدال ما يصك سمعت حس هالطفس محمد.. وقال: شنو رايج فيني..؟!!

صراحة مت من الضحك.. المهم نهيت المكالمة مع سالم.. وعقبها بفترة أتصل محمد..

آآآه.. يا ويلي زليت عنده بلساني..!! بس ليش أخاف..؟!! هم بعد هو زل بلسانه..؟!!
لا فرق.. هو يزل عادي.. أنا أزل...لأ؟؟

أهووو أحسن أسير المطبخ.. وأخلص اللي بيديني..

****************************** ****************

(( سالم يتكلم ))


أول ما وصلت للمكتب أخذت هالتيلفون وأتصلت على زوجة المستقبل.. بس هالطفس مثل العادة يحب يخرب علي..

شنو الحل يا رب ويا أبوي..؟!!

أشلون أقنعه يخطبلي نورة..؟!!

بس يوم ناقشناه عن السماح.. صرخ بويهي.. وشلخ ويه هالأثول محمد.. هههههههه والله شكله كان أنتيكا..

أروح لأمي اليوم وبخبرها..!!

لا لو رحت بتسويلي مناحة.. وأبوك وأبوك..!!!

مافي غير محمد.. أهو اللي بينقذني.. لو حتى أبوي راغه من البيت يعرف يدبر حاله.. بس حتى لو راغه.. مو عقب أبوي بيستـلمني أنا.. لأني أنا اللي بيتزوج.. مو محمد...؟!!

أقول أخلص هاليوم وما بيصير إلا الخير أن شاء الله.. بس ما كون سالم حسن..
إذا ما تزوجتج يا نورة البنورة..

****************************** ****************


يتبع
vvvvvvv
vvvvvv
vvvvv
vvvv
vvv
vvv

[şσ ί Ļόve]

(( الجزء العاشر))



(( خطة الغريب ))



(( محمد يتكلم ))

أول ما خلصنا أنا وسالم هالدوام.. سرنا نوقع على أساس أن إجازتنا بتبدأ من اليوم اللي يليه..
وقبل لانوصل البيت قلت لسالم .. توجه لأي بقالة علشان نتشرى بعض

الأغراض..لأخواني.. وأنا أطالع الدرب..
شفت سالم صف السيارة في نفس الباركن اللي صف سيارته يوم الحادث

المشؤوم.. وأول ما كان بيظهر من السيارة.. مسكت إيده وأنا أصرخ:

سالم.. هالبقالة حشى والله ما دشيتها.. يا تودينا أي بقالة ثانية ولا ردنا البيت.. بلا أغراض وبلا زفت..

طالعني سالم مستغرب لأني من فترة كنت أضحك.. وفجأة أنقلب حالي لحالة هستيرية.. وقال :
ليش..؟‍!!

رديت عليه بأنفعال : أسمع.. لو أنا ثقيل على سيارتك.. بسير وبهدك.. وأكيد بلاقي تكسي.. وبرد البيت..

سكت سالم.. اللي بدأ يفهم السبب يوم طالعني أتلفت للمكان اللي كان معقوق فيه.. يوم الحادث.. وقال :

أفا عليك.. يالطفس.. بنسير.. أي مركز من المراكز مرة وحدة.. مو بقالة..


وحرك سيارته وسرنا مبتعدين عن المكان المشؤوم .. المهم يوم دشينا المركز التجاري.. كنا نتبضع من طابق لطابق..


لفتت انتباهي شغلات.. وأشتريتها المهم..
وأول ما خلصنا وحاسبنا.. ردينا البيت..

وأول ما دشينا.. يا الجيش للهجوم علينا.. وهم أخواني..
بس شنو الحركة اللي سواها سالم..؟!!

شال أختي نورة وحملها وهو يقول.. يا زين أسمج والله.. خذي هالكيس لج..
وشوي راحت تركض لعند أبوي وأمي تراويهم الأغراض..

واللي فجرت أذني من صرخة صوتها ونبهتني أنها موجودة أختي إيمان وقالت: محمد.. وأنا منو بيشلني..؟!!

طبعاً محد يشيلها غيري.. لأن الحبيبة رفعت يدينها لي..!!
المهم شليتها.. وشوي قالت: أنا وين هديتي..؟!!


طالعتها وقلت : أندوج خذي.. حشى يا حبكم للهدايا.. وأنا منو يهديني..؟!!
وحطيتها على الأرض وراحت تغيض أختي نورة بأغراضها..
ويوم ييت أتحرك..

لقيت حد متعلق على اريولي يـيت أطالع..؟!!

تعرفون شنو اللي متعلق بريولي..؟!!

أخوي حارب..كان حاضن أريولي ويقول: أنا أهبك يا مأمد

طبعاً ضحت.. ورفعته فوق وأنا شايله.. وقلت: قول..محمـــد..؟!!

مـــأمد..

لا يا حارب.. قول محمد وبعطيك كيس اللي فيه هديتك..

أنذين ... مـــأمد..


طالعته وأنا أضحك : لا يا حارب.. مــ ـــحــ ـــمـــ ـــــد

قول محمد..؟!!

طالعته.. وشفت دمعتين معلقة بعيونه وقال بصوت حزين :
معلف أقول مأمد..؟!!

قلتله : لا شاطر.. قلت محمد اللحين يالله خذ هديتك يا حبيبي.. وبسته على خده.. ويوم حطيته على الأرض..
شفت الفرحة بعيونه وابتسم وقال: ثــكلاً ..ياطفث..

راح يلحق أخواتي.. يراويهم أغراضه.. أما أنا بقـقت بعيوني وطالعت سالم اللي كان يراقب أخواني اللي كانوا عندي.. وهو ساند جسمه على اليدار.. ورافع وحدة من أريوله رادنها ورى.. وكأنه كان يتمتع..

أشرت بالسبابة على أخوي حارب اللي راح وأنا أطالع بسالم وقلت وأنا مصدوم :
ســـ..... سمعته.. قال طفث..؟!!
أنا طفث..يا ثالم..؟!! أقصد.. يا سالم..؟!!

طالعني وهو يضحك.. وتحرك صوبي وقال :
لا.. أنت مو طفث..!! أنت طفس..

ويوم كان بيسير.. طالعته وقلت: منو علمه هالكلمة..؟!!

رد سالم وهو ميت من الضحك وقال : ابصراحة يا صوبي وقال.. طفث ثو يأني..؟!!


ماعرفت شنو أرد..؟!! فاقلت..طفس يعني..يعني.. يا حلو يا طيب..


يعني أنت يا سالم اللي علمته..؟!!

هرب سالم وهو يضحك .. صوب أبوي وأمي .. وأول ما وصلنا..
يلسنا بأدب قرب أبوي.. وأنا كان بخاطري.. آكل هالسالم..

المهم يلسنا شوي.. وعقبها توجهنا لغرفنا وبدلنا الثياب.. وتغدينا وأرتحنا شوي..

وعقب العصر.. توجهت صوب غرفة سالم.. وأول ما دقيت الباب.. توقعته بينش وبيـبـطل الباب.. لكن تفاجئة أن الحبيب مو بالغرفة..

ويوم سرت صوب أمي أتخبرها عن سالم.. طالعتني بنظرة غريبة وقالت: شنو يدريني فيه..؟!! أشوفه سار صوب أبوك..؟!!

طبعاً تفاجأت على الموقف اللي كان وسرت صوب ما يالسين أبوي وسالم..

بس شكل اليلسة ما تبشر على الخير..


طقيت الباب وأستأذنت أني أدش.. طالعني أبوي وهو مفول وقال :
دش وشوف أخوك العاقل اللي أقدر أعتمد عليه..؟!!

قلت بخاطري.. لا يكون تكلم مع أبوي عن موضوع نورة..؟!!

شوي.. إلا أبوي مسكني من إيدي وقال: دش يا ولدي.. وصك الباب من وراي وقال:

تعال..؟!! وشوف هالأثول شو يقول..؟!!


****************************** ********************

مشيت وييت صوب سالم ويلست احذاه.. وقلت وأنا أهمس لسالم :
شنو السالفة..؟!! شنو اللي مستوي..؟!!

طالعني وهو متغير لون ويهه.. وأشر لي أسكت..

المهم.. طالعت أبوي وقلت : خير يا الغالي..؟!! شنهي السالفة..؟!!

رد علي وهو معصب : قلت لأخوك ما دامت إجازتكم بدت.. شنو رايكم نسافر..؟!! رد علي : مانقدر..

أهنيه أرتحت.. وقلت لأبوي عفوياً : يا شيخ..؟!! خرعتني حسبت السالفة مو جذيه..؟!!

طالعني أبوي وقال : أكيد أنا الغلطان آخر زماني.. آخذ راي واحد أثول مثلك..

ضحك سالم.. وقال: قوله يا محمد..خبره.. أن السفر هالسنة مو ضروري..
خبره..

طالعت أبوي وقلت : يالغالي السفر اللحين ما نقدر عليه بالذات أنا عندي أشغال بعدني ما خلصتها.. بالمرة.. فشلون نسافر.. ونهد اللي ورانا..؟!!

طالعني أبوي وهو يصرخ وقال :

اللي يسمعكم يقول رياييل أعمال حره .. بس خلاص .. برايكم لو ما تبون السفر..خلاص.. نأجلها هالمرة..

رحنا أنا وسالم.. نحب راس الوالد وقال:

بس خلاص.. أنا حبيت أشاوركم لأني الرسول- صلى الله عليه وسلم – أمر بالشورى.. علشان جذيه ناديت سالم.. وزين أنك ييت على الرغم رايك ما فادني..

ضحكنا أنا وسالم ونحن نطالع في بعض..

وعقب منتبه أبوي أننا يالسين نضحك..

ضحك هو بعد وقال :
تصدق يا محمد على الرغم أنك طفس.. بس حياتي بدونك أنت وأخوك هالأثول... وأشر على سالم..
ما تسوى.. عسى ربي يحفظكم..

وظهر من الميلس.. وخلانا .. نتبادل نظرات الأستغراب أنا وسالم وقلت:

تصدق.. لو ما شفته بعيوني .. وما سمعت هالكلام يظهر منه..
كنت بقول أني أحلم..؟!! شنو هالانقلاب المفاجئ..؟!!

وتميت أعد على أصابع إيديني..
اليوم مو رمضان..
ولا عيد الفطر..
ولا عيد الأضحى..
ولا عيد الأم..
ولا عيد ميلادنا..
ولا عيد الفلاحين..


رد علي سالم عقب منفطس من الضحك : تصدق أنا متأكد أن أبوي يفكر بأخوه.. لأنه قال الكلام اللي بقلبه .. بس أثاري أبوي رقيق..

ضحكت ضحكة وحركت كتفه بإيدي وقلت : أسمع اللحين بسير بيت عمي بتسير ولا لأ..؟!!

رد الدم بويهه وقال : أكيـــد هذا ما يحتايله كلام يالطفس.. يالله خلنا نسير..

سرنا غرفنا وتجهزنا .. ويوم كنا ظاهرين.. سرت صوب ما أصف سيارتي


ولحقني سالم.. ويوم شفته يـبطل الباب اللي حذاي قلتله:
هي.. هي.. على وين ساير..؟!!

طالعني سالم وهو يعدل جلسته احذاي وقال: بسير وياك..؟!!يعني وين بسير..؟!!

طالعته وقلت وأنا أأشر بأصبعي : أطلع برع.. أنا ما بسير بيت عمي وبس..عندي مشاوير ثانية..
سير بسيارتك.. واسبقني وعقبها بلحقك هناك..
طالعني سالم وقال: أحسن..

تحرك الحبيب وهو شايل معاه أكياس..
وركب سيارته.. وراح متوجه لبيت عمي...

أما أنا تعرفون وين سرت قبل..؟!!

وشنهو المشوار المهم..؟!!

****************************** ****************

أيوه.. خطت الغريب..
عدلت الأكياس اللي ورى ويبتها احذاي.. طبعاً هذي اهي الأغراض اللي طلبها مني الغريب أني أشتريها..

وتوجهت لأحد البيوت اللي قريب من بيت عمي وسألت على بيت للإيجار..

طبعاً عقب ماخبرني الغريب أنه شاف بيوت فاضية من ذاك الصوب..

بعد ما دورت ودورت أخيراً لقيت بيت برح وحلو ويفصل عن بيت عمي بس حارتين.. والحمد لله..

أتفقت مع راعيه.. واستأجرت هالبيت منه وعطاني المفاتيح.. وبعد ما استلمت منه البيت..

سمعت صوت الأذان.. توجهت للمسيد وصليت.. وعقب ما خلصت..

رحت البنك.. وسحبت مبلغ كبير من اللي كنت حاطنه لوقت الضيق..

ورحت للأماكن اللي يبيعوا فيها الأثاث وأخترت أثاث كامل للبيت..
واتفقت مع شركة.. أنها تصبغ وتسوي ديكور لهالبيت..
من باجر..

ورحت.. لشركة ثانية تجهز الستاير على أحسن الأنواع.. المهم خلصت كل ترتيباتي لهالبيت..
وأن الأجراءات بتبدأ من صباح باجر..

ويوم خلصت كل شي.. توجهت لبيت عمي وكانت صلاة العشاء بعدها بتقوم.. فرحت للمسيد وصليت..


واتجهت صوب الميلس.. ودشيت وأنا شايل معاي أكياس.. وفواكه وبعض الشغلات لبيت عمي..

وأول ما دشيت.. سلمت على عمي ويوم طالع هالأغراض قال:
شنو هذا يامحمد..؟!!

طالعته وأوني عاد أرمس بذرابة وقلت : كل هذا من خير الله يا عم .. هالمقسوم إلكم..


وعقب ما شكرني ومدحني مثل العادة..حملنا الأغراض للبيت وداخل المطبخ.. ويوم شفت نورة سلمت عليها وعطيتها كيس وقلت:
أعذريني على القصور..

طالعتني وهي مستحية : مشكور يا محمد ليش كلفت على عمرك..؟!!

رديت وأنا أتمصخر : مو مشكلة تراج أختي الثانية.. ويوم طالعة عمي علشان أقوله صح كلامي..؟!! لقيت لون ويهه تغير.. وقال:
يالله علشان ندش.. صوب الرياييل..

المهم مشينا صوب الميلس.. ودشينا..وسلمت على عمي علي.. وعلى أخوي سالم.. ويلست شوي.. وبعدها مديت إيدي على الأكياس.. وخذيت كيس وعطيته عمي علي.. وقلت :

تفضل يا تاج راسي.. هذا الكيس لك..

طالعني.. وتعرفوا نظرة المتفاجئ..؟!! كان جذيه يناظرني وعقب سكوته قال:
لي أنا..؟!!

طالعته وقلت : هيه يا عمي خذه تراه لك.. وأسمحلي على القصور..

مد وأخذ الكيس عقب ما طلع روحي علشان يقبل به.. وقال والدموع تلمع بعينه: الله يعوضك خير يالطيب..

والله لو أخبركم.. أني حسيت دعوة عمي علي لي.. فتحت أبواب بحياتي أنا كنت غافل عنها.. طالعته وقلت وأنا ابتسم :

هيه يا عمي.. كثر من الدعاء.. تراني هذا اللي أحتايه..
ابتسم وهو ماسك الكيس.. مثل اللي يقول .. معقول.. حد يابلي شي..؟!!

ولفيت بويهي صوب عمي سالم وقلت :
أما أنت يابو.. نورة البنورة.. خذ هالكيس اللي أطلب من الله يعجبك..؟!! ومديت إيدي وعطيته..

وأخذ مني هالكيس وقال: والله لو كان عندي ولد ماكان عاملني شرات ماتعاملوني.. أنت وأخوك..

طبعاً اللي قطع هالكلام الحلو.. كان أخوي سالم وهو يقول:
عمي علي.. هذا الكيس لك.. وأنت يا عم سالم.. هذا لك..

ووقف وعطى كل واحد منهم مقسومه.. ورد ييلس مكانه.. طبعاً تم عمي علي.. يشكر بسالم وقال:
والله ما كنت أتمنى أني أكلف عليكم.. بس الله يجازيكم ما يجازي به عباده المسلمين..

رد عليه سالم وقال :
ياعمي.. ترانا عيالك.. حتى ولو رد أبنك من السفر.. بعدنا عيالك.. تراني من اللحين أحذرك..؟!! لا تسوي مثل المثل اللي يقول: من لقى أحبابه نسى أصحابه..؟!!

ولف سالم ويهه صوب عمي سالم وأخذوا يضحكون ويضحكون.. أما أنا طالعت على عمي علي.. اللي ذرفت عيونه دموع وقال:
مرد المقفي يلفي.. ياسالم.. مرده..وأنا عمك..

ويوم أنتبهوا على عمي أن عيونه يالسه تفضفض على الحريجة اللي ابها يسكن القلب..

قال سالم وهو يعتذر : أنا آسف يا عمي.. بس والله ما كان قصدي أكدرك.. بس..

طالعه عمي علي وهو يأشر بدينه لا ماعليك..

حبيت أرطب الجو أو بالأصح أنقذ الموقف اللي انجرح فيه عمي علي وقلت لأخوي سالم : ونورة البنورة.. ما يبتلها شي..؟!!

طالعني وهو يقول بعيونه.. ما كان قصدي أكدره..

وقمزت له بعيوني رد على كلامي فجاوبني وقال : لا يبتلها شي تحبه.. بس عقب بعطيها يوم بنسير عالبيت..

طالعه عمي سالم وقال : أشكرك على ذوقك يا سالم..بس.. ماعندي غير أقول الله لا يحرمني منكم ياعيالي..

سرقت النظر بإتجاه عمي علي.. ولقيته يمسح هالدموع محاول أنه يوقفهن..

عقب شوي.. طقت نورة الباب .. وظهر لها عمي سالم وعقب شوي قال:
تفضلوا وياي على الغرفة الثانية العشا ياهز..

وقفنا كلنا رباعه.. ومشيت صوب عمي علي وحاوطه بذراعي وقلت : كل واحد يمشي مع عمه ..

ضحكوا وهم يمشوا صوب الغرفة اللي محطوط فيها العشا وغسلنا إيدينا وقدمنا وتعشينا من أطيب الطبخات اللي أطبختها نورة.. البنورة..

وأول ما خلصنا الأكل وردينا الميلس.. أخذ عمي سالم وعمي علي.. يتكلمون عن زمان مقارنينه باللحين.. وطبعاً أنا وسالم ندافع عن هالجيل.. وأما أعمامي.. تموا يتمدحوا عن زمانهم..

والوقت أخذ يسرق أحلى لحظات أتمنى أنها تعود.. آآآآه لو تعود.. وبتشوفوا معاي.. عقب ليش أتمناها تعود..؟!!

أستودعناهم وتوجهنا للبيت أنا وسالم.. وأول ما وصلنا.. إلا اتجهت غرفتي بدون ماطالع سالم ..

****************************** ****************

اكمـــل وقـت ثانـي

بإنتظار رايكم =>

[خزنه بنت مايكل]

^

^


لآ هنتي ... خل آخلص قصتّي و آعود على ذي بعد ما تنزلين آجزآئها كملها .. آكره ما عندي القصة المقّطعة



الله يعطيش العافية

[ملكة الجوري]

لا هنتي قصه رائعه

[şσ ί Ļόve]

المشاركة الأصلية كتبت بواسطة خزنه بنت مايكل

^
^
لآ هنتي ... خل آخلص قصتّي و آعود على ذي بعد ما تنزلين آجزآئها كملها .. آكره ما عندي القصة المقّطعة

الله يعطيش العافية

حـزن زن ..

ولانتـي .. بس لحـد يسحب ع القصـه اوبي رايـك ..

اوكـي هي عندي كامله وابشري بنزلها

المشاركة الأصلية كتبت بواسطة ملكة الجوري

لا هنتي قصه رائعه

ارحبـي ..

ولانتـي .. ومروركـ الروعـَه