الصبح شعشع واقبل النور بـالنور=والليل الاسود مايجيب الصراحه
ماني بضايق لكن القلب مقهور=مثلي تساوت ضيقته وإنشراحه
آمنت باللي ثبّت اطويق والطور=عساه يلهمني ثبوت وفصاحه
واضح واحب اقابل الناس مسرور=مخلوق من بين الرضا والسماحه
اكتب قصيدي همي إسعاد جمهور=ماهمني فوضه وصوره وساحه
موجٍ تلاطم من ورى سبعة ابحور=حروف شعري للمخاليق راحه
يامبتليني ؟ بالحكي اسمع الشور=لا تحسبنّك عايش بوسط واحه
اللي خلقنا ميّز الحق والزور=الفرق واضح كالسما والبراحه
الطب يبغاله من الناس دكتور=والهندسه تبغى ارتفاع ومساحه
ياللي تقول اني من الناس مغرور=ميّز هماج الما وميّز قراحه
لامن كبر راسي مع الطيش معذور=لكن غرور الشخص سبة مطاحه
نسعى بـهالدنيا نبي الحال مستور=والمجتهد همه وغمه نجاحه
ياصاحبي ؟ لا تقعد اتلّف واتدور=الطير وشهو ؟ لو كسرنا جناحه
منت بمعي يابن الاجاويد مجبور=من راح مني سمّح الله مراحه
ناصر بن دهيم الغييثي الدوسري
العرض الشجري