ضيــدان ....... علمو اللي يحسبن ضيدان واني .!!!!!!

[رفيـــع الشــان]

السلام عليكم ورحمة الله وبركاته
اخترت لكم قصيده اعجبتني كثيراً وهي لشاعر غني عن التعريف
وهو الشاعر المبدع ضيدان بن قضعان
اترككم مع القصيده واتمنى ان تنال اعجابكم ورضاكم :
بقول :

الله الواحد ولا الله ثانــي=وحده عبد سجد قلب وعقيده
مومن يصبر ليا جار الزماني =في رجا اللي مدته تغني عبيده
وان تحداني زماني و احتداني=للدروب العوج والكف الزهيده
شمت عن باقي حياتي في ثواني=والجسد لابد ما للدنيا تبيده
ما خلقت اعيشها عيشة هواني=يا عسى روحي وروح ابي شهيده
ولا ياما روح الليل وسراني =و كم سريته غي و احلامي سعيده
و كم خذا مني الزمان و كم عطاني=و كم قصر يمناي عن شي اريده
ما سألته لو بعد جار و خذاني=الا عن عمر غدا وشلون اعيده
لي على الدنيا ثلاثين وكفاني=منها العشر الاخيرات الشديده
علمتني كيف اوقف ولا دهاني=ما دهى سعــدون فعقاب وعضـيده
علمتنني كيف لا ماتوا اخواني=و مات ابي و الكف ما تصفق وحيده
كيف اوقف و اتشهد في مكاني=و اثبت بيوم عسى الله ما يعيده
يوم لحق العلم الاول علم ثاني=والحق والحظ...الفقيده بالفقيده
آه من شي على قلبي كواني=لين وقف دم قلبي في وريده
والشجاع الي وطاه اللي وطاني=عزتي له لو بني عمي عبيده
يابني عمي عريبين المجاني=ياهل الوقفات والارياء السديدة
يا سلايل من يروون السناني=لا قدح حد الحديدة فالحديده
علموا السبع عن سهيل اليماني=الفريد اللي مطاليعه فريده
وعلمو اللي يحسبن ضيدان واني=يا عوينه كان ذا حده وجيده
وقولوا اني فالرفاع من الطماني=وكل درس من حياتي مستفيده
ان ثقل حمله فانا الهرش العماني=وان تربق فالقيود افك قيده
و علموا اللي لاصفت الايام جاني=وفالرخا يسوى ثلاثميه بديده
وان قست الايام شفته ما يداني=مترف ماله على الرمضا كببيده
وعلموا اللي يوم زانت له نساني=لا يحسب اني ليا من صحت ميده
يوم اصيح ...اصيح للي لا غشاني=نفحه منه تذكرت القصيده
وان تناوشت القلم والليل داني=ماغدا لي من شرايدها شريده
والله ان اغلى القصايد في كياني=فالمــــلك عبدالعزيز ...وفي حفيده
الكــــريم اكرم كريمين اليماني=الشجــاع اللي له امجــــاد تليده
الفعل هو عنــــتره والغيهباني=والكــــــرم هو حــاتمه وابن مهيــــده
ابلج من دون سياه الحساني=رايته عليــا ونظراته بعيده
أذكره لا لفني الوقت وطــواني=واعـــــتزيت وكل قلب صار حيده
واتذكر لا قسى الوقـــت و رماني=في دروب التهلكه والدرب سيــده
اتذكر بسمته و العمر فاني=وجـــــــــود كفيه ومساعيه الحميده
ذاك ابو عبدالعــــزيز اللي كساني=بالجمايل من قديمات و جـــــديده
أشهد انه قصـــرنا زين المباني=من حداه الوقت شوفه يوم عــــيده
درعنا اللي فوق الامتان امتحاني=ضافي هجل مقاضيبه جويده
وسبفنا اللي لا تولى الضد لاني=في نهار ياقف الضد لضديده
عدنا هداج لا اجدب كل ساني=كن مورادنا على جاله تزيده
الفخر للفــيصلي ريف العواني=خــــــــالد اللي يكسب الطالات بيده
ياهل الـــــــــتاريخ جزلين المعاني=يـــالرجال اللي مصادركم وكيده
انشدوا منهو الحصان ابن الحصـــــــــاني=ومن زعـــيم الطيب ولا من عميده
عن حفــــــــــــيد موحد الدوله وباني=مجدنا اللي باربــــــــــعينه مستعيده
اشهد ان الجد شرف يوم باني=واشهد ان العود عقب له وليده
ياطويل العمر وقف لي تراني=كان ما وقفت لي طحت النضيده
موقفك ما هوب لفلان الفلاني=وعن مقام الذيب ما يغني وليده
بيض الله وجه من وقف عشاني=ساعه كل طرف بشته قعيده
والا انا لـــــــله شكري وامتناني=ثم ملكنــــــــــا ثم حكومتنا الرشيده
سيدي يا سيدي لو كان اعاني=ما درت الاذن القريبه والبعيده
وان وصل صوتي لصقهان الاذاني=كيف اصب العلم فقلوب بليده ؟؟؟
في كتاب الاصفهاني للاغاني=خير مما في المجلة والجريده
و الشعر لو تحاكيته حكاني=موهبه من واحد يصدق وعيده
ان بغيت ادلعه قمت و زهاني=و ان بغيت أطوعه عمه و سيده
وان بغيت يقال : صح الله لساني= سعد من خالد على الدنيا رصيده

وسلامتكم ............