السلااااااااام عليكم
أسعد الله أوقاتكم جميعاٌ
ثلاث كلمات مابي منك اسمعها=بحروفها اللي على الاعذار مستنه
لا اغلطت لك غلطه وودك ترقعها=تقول : مدري .. واحسبنه ..ويمكنه
مدري واحسبه ويمكن .. عني إقلعها=مخي خلاياه من ذا اللفظ .. منجنه
دور لغيري .. وسولف له .. ووزعها=دوّر لمنهو يحنّك كذب .. وتحنه
ياللي توزّع علومك..قبل تجمعها=لاصن صاحبكّ فإلعب وايته بصنه
واترك طبوعٍ بلا داعي .. تطبعها=وارجع على (اصلك) بلا شكر وبلا منه
لا تخلف الهقوه اللي فيك مطمعها=ماعاد ينفع معك (لكن) و(لكنه)
شف موقعك ..والعرب وشلون موقعها=والناس نظراتها سكين منسنه
ما فيه كلمه تنزلها ... وترفعها=لا تخلط الصوت بين ..البح والخنه
والمعركه لاجهَلك اللي .. مولعها=شف برقها لاح ..والرعاد له دنه
ان كان عندك علومٍ خافيه .. ذعها=ما فيه تكتيم دام الحرب منشنه
وان غشتك صنعةٍ كلٍ تصنعها=ماتوك الا عذاب القلب والونه
وان غرتك لقمةٍ في البطن تبلعها=بذكرك في كلام (الشرع والسنه)
(الركعه اللي على الانظار .. تركعها=هي تدخل النار والا تدخل الجنه.!!؟؟)
خل الدعاوي لشاريها .. وبايعها=كلٍ على مهنته ويكيّفه فنه
والفزعه اللي نويت العام .. تفزعها=لا تحسب انها بوسط الصدر .. منكنه
انا عزومي تشجعني .. واشجعها=واشجع اللي يجي ظني على ظنه
وانت انتبه من علومٍ .. ماتوقعها=ولسانك افطن لهرجٍ ينطلق منه
ثلاث كلمات مابي منه .. اسمعها=كلمات : مدري .. واحسبنه .. ويمكنه
للشاعر/ مبارك ال خليفه
11-08-2006, 11:18 PM
العرض الشجري