يا نايف..

[كحيـــــــلان]

يانايف اسمع في كلامي تعاليل=اقرب فديتك ثم تعلل معايا
الخشف روّح والليالي المقابيل=زادت عيار الشوق صوب المنايا
اشوف زوله في نزول الهماليل=واشوف زوله وسط كل المرايا
واذكر كلامه بين حشد الرياجيل=واون ونه ... ثم اهل البكايا
واروح للمشفى واسوي تحاليل=ابغي ادّور عن علاج ودوايا
ابغي علاج ٍ شافي ٍ للغرابيل=قالو رجوعه هو دواي وشفايا
ماينفعك كثر الدوا والمحاليل=ادواك عند الله رب البرايا
لكن علاجك دون شك ٍ وتضليل=في رجعة المقفي ودمح الخطايا
ايسّت من طبي وانا كني اخيل=الموت يشّر لي ويقدم تحايا
صديت من ربعي وصفر المعاميل=ماعاد لي بالوقت حلم ونوايا
والحين انا ضايع مابين المهابيل=احد ٍ يقول انساه وارمه ورايا
واحد ٍ يقول الحب جيل ٍ بعد جيل=دّور على غيره وتلقا رعايا
مايدري ان له في ضلوعي تماثيل=ماتنهدم مهما غزوها سرايا
البعد وصّل في دماري مواصيل=فجّر بي العله وطشّر شظايا
ثم اقبلت ذكرى العيون المظاليل=زادت ضحايا ً فوق ذيك الضحايا
((يا نايف .. اسمع في كلامي تعاليل ))=شطر ٍ كتبته ثم صارت سوايا
كتبتها من باب ضحك ومخابيل=واثره قلب حالي وبيّح خفايا