ياما حلا المقناص ياسميح الذيب....

راكان اليامي · #1 25-10-2004, 06:45 PM

ياما حلا المقنـاص ياسميـح الذيـب=يبعد عماس القلب واقسـى الغرابيـل

من عصر اوايلنا وهو فيـه ترغيـب=كل حكـى بـه بالشعـر و التماثيـل

واحلى القنص من دون شك ولاريـب=يـوم انـه برفقـة قـروم مشاكيـل

ربع يعرفـون السنـع و المواجيـب=نفـوس خفيفـات ولاعنـك تفضيـل

لابانـت الصيـده نطقنـا التراحيـب=وليـا كسبناهـا نسينـا العراقـيـل

لحم القنص مطلب وحنـا خطاطيـب=وكلـش حلـو وقتـه بنكهـة السيـل

نصيـد ماصدنـا بكـل الاسالـيـب=نرمي ونلحق في الوعـر والغراميـل

وليـا انتهينـا واقنعتنـا المكاسـيـب=ناقـف نعـد ارباحنـا والمحاصيـل

نختـار منـزال عديـم العـذاريـب=كف ورفاع مارعت بأرضـه الخيـل

نبـدأ نعـد الجلسـه بكـل ترتـيـب=ونذكر دعا المنـزل مـع زود تهليـل

احد خذا سلاح القنـص بالمقاضيـب=فـرغ حشاهـا لليـالـي المقابـيـل

وواحد يشب اللي لها ريحـة الطيـب=نـار تقابـس تنتـظـر للمعامـيـل

في حرها البـرد وكيـف وتطريـب=عطر المكان بحضرة الشمس والليـل

وان جا غروب الشمس ننسى اللواهيب=شي يشـد العيـن مـن دون تهويـل

يطـرد نهـار ليـل مثـل الدواليـب=والرابح اللـي فـاز يـوم التهاويـل

وعقب الصلاة ندير سـود العراقيـب=تلقى بهـا المسمـار والبـن والهيـل

ومعها تمر من خير جلـب الجلاليـب=تسمع على وقت الغـروب الفناجيـل

مـع كـل فنجـال يمـر اللغابـيـب=كنك تشوف اللـي رموشـه مظاليـل

ثـم بعـد راحـه تزيـد المطاليـب=وين العشى وين الدسـم يالرجاجيـل

نفـزع نجيـب اقدورنـا والمراكيـب=وان ماحصل قمـرا نشـب القناديـل

كل علـى ماقـال مرسـال ويجيـب=سعة صـدر مابـه تكلـف وتمثيـل

ويصلـح الشاهـي ويقفـاه تسريـب=اللـون داكـن والحـلا فيـه تدبيـل

نأكل من المقسوم واصفى المشاريـب=ونحمد ولي الكـون عقـب التساهيـل

يالله يالمعـبـود ياعـالـم الغـيـب=تكتب لنا مع رفقـة الخيـر تطويـل

مانفترق مهما مضى الوقت والشيـب=وارجيـك تهدينـا لبيـض المداهيـل

واختامها صلو على مجنـب العيـب=على النبـي تعـداد قطـر المهاليـل

__________________