السلام عليكم ورحمة الله وبركاته
عبدالله بن عمارة
صوت شعري قوي , يمتلك ناصية الابداع بتمكن , قصيدته مليئه بالشعر , مزدحمه بالحياة , شرسه أحيانا ورقيقه احيانا اخرى.
لكنها في كل الأوقات مضيئه ونافذه في الروح , يأتي مقدما شعره بكل زهو وحتما سيكون له شأن كبير في قلوبكم.
يوم قالوا: يا (جحا) وش له تصيح؟!=قال : أصيح وخايف من الإنقلابه
وأشهد أني صحت ولساني فصيح=بس أنا ماني جحا ذاك (الزلابه)
جيت أبشرب من قراحٍ فيه ريح=والدوا والداء في ظهر الذبابه
أستخرت وقمت والطايح, يطيح=والبحر مايروي الظامي شرابه
لو يجور الخوف ما أجي له طريح=ماعلى الدنيا خلود وكيف أهابه؟
هادم اللذات ماجاله ضريح= كم شجاعٍ في اللقا يقصف شبابه
قالها بن عون ولا بن صبيح=والجواهر في معانيها تشابه
اقدر ألعب وادفن المعنى شريح= وآتحدى كل هيئات الرقابه
مايصيدون النصع حتى يبيح=أكشف مغطاه وينفّض ترابه
بس ماتغبى على رب المسيح=الرقيب الله وانا خايف عقابه
دنية العشاق يا دنيا الذبيح=للبشر قانونها قانون غابه
القوي يسمي وبأطرافه مليح=والضعيف أخلج على جر الربابه!
ياغناتي هاتي العلم الصريح=كافيٍ زينش عن هروج الذرابه
ليه في ليلٍ مضى مدش شحيح؟= ويوم قفيتي وعانقني ضبابه:
قام كحلش من هدب عينش يسيح=لين صار الكون في عينش هبابه
كان قلبش من عنا الحاصل جريح=السبب منش ولا فيها غرابه
طلة محياش فيني تستبيح=في ضلوعي سيفها دقر نصابه
قولي لقلبش بعد مايستريح=فك باب العشق عجّل فك بابه
أدري ان فكرش على صح وصحيح=دون عمرش ولا انا قلبي صوابه
لدّ فيه ومد بأسلوبٍ قبيح=لين سود فاله وشمر ثيابه
يتبعش لو صار في ضلوعه فحيح=من جنوبي نجد لي شرق الـ ...؟
أسمعي يابنت حوى من نصيح=بعتذر لش من خطاش ابلا أرتكابه
في يديني عقد ماس وعقد شيح=جبتها لش من خفوقي بالنيابه
أشبحي وأختاري اللي له مديح=لاتردين بسؤال أبغي الإجابه
سلهمت وأستلهمت كلمة (يا ويح)!=رمشها يامر على زيزوم لابه
قالت: أشبح وش تقصد بالشبيح؟=قلت: بعيد المثل وأحسب حسابه
يوم قالوا : يا (جحا) وش له تصيح؟!=قال : اصيح وخايف من الإنقلابه
21-08-2006, 01:51 AM
العرض الشجري