رديّه..

[موج الأحزان]

السلام عليكم..
وأسمحولي على أني كتبت هالموضوع بالمنتدى العام بس صارلي مثل مشاعر حالمه مالقيت قسم للرديات..
المهم اتمنى أنها تعجبكم..

هاذي رديه بيني وبين واحدمن الربع وكان يحب يضايقني من باب الغشمره ويقول لاماتكتب فيني عشان أرد عليك وقلت له:

أقولها لك واللي مثلك تجي له..
كلمة (تلابز) تعني الصمت بالحال..

ماني من اللي يقطع الحكي حيله..
وماني من اللي يعشق القيل والقال..

أبلشتني وقت الرخا والمخيله..
ودك تغير وقتنا كل ماطال..

يرحل نهارك ثم يعجل بليله..
ثم تضهر اسكونك على كل منوال..

خذ النصيحه وأحذف اللي تشيله..
من فوق راسك والشياطين تنشال..

يمكن كلامي يحرقك بالفشيله..
ويمكن تلاقي من عنا الوقت الأهوال..

هذا كلامي وأرفعه بألف شيله..
أما اتغير ولا مالك من اعدال.

.
@@@
ردعلي:

اهلا هلا ياللي تجيب الجزيله
اسمع رددها وولم الحين بالحال

حطيت ايدينك عند راس الفتيله
يمكن غشامه او بعد كثرة اهبال

ياويل منهو يعترضنا ياويله
لو كان فيه امن العقل كان ماعال

مانت بردي لكن بعقلك ثميله
وكل اعربن فيهم خلفه وعقال

وانت اظنك من خبول القبيله
لو كنت عاقل ماتعرضت رجال

@@
رديت عليه وقلت:

ياطيب من هو مايعرف الرذيله
وياطيب من هو ماقنا حبص واشفال

وياطيب من هو مايعاند مثيله
ويبقى على طيب الرجا كل مانال

ومااقول إنك ناقصن! فيك ميله
بإنك تعاند والخطا من همال

تعرف دروب المرجله وكل شيله
وتعرف بعد وش هوجرى منك بالحال

لكن فقع كبدي الحكي منك سيله
سيلن جرف كلما لمع منك رجال

شين الحكي لازاااد! شينه بطيله
شينه بعد لاسنده فيك عذال

وأنت الذي تعرف وتعطي الجزيله
والمشكله حكيك طمن فيك منزال

وأنا ترى ماعادلي فيك حيله
ودي أداري خوتك دوم بإعقال

ولا ترى بركب ذلولي الجميله
وأرحل مع عسف الصعب فوق الجبال

وأترك لك البلوى ومن هي ثقيله
وأرقد وأناصافي الذهن وأنت في حال

أما تجيني بالسنع بعد ليله
ولا ترى وقت الرخا اليوم ينطال

@@
بعدها دق علي وقال السموحه يابومحمد وفكنا من القصيد