(( اللـقـيـا الأخـيـر ))

[غيام]

المشاركة الأصلية كتبت بواسطة سعود بن مهدي

السلام عليكم ورحمة الله وبركاته

اتمنى من اخواني المشرفين استثاء هذه القصيده في المنتدى العام وللجميع جزيل الشكر

_____

مرت علي شهور بغيابك ولامرت بخير = ومشاعري ماحركت ساكن .. رغم طول سهدي

عز الله ان ( فرقاك واقع ) وان ( واقعها مرير ) = ماهي بلحية ( ازمه تعدي ) ولا ( بساط احمدي )

وقع الوداع أقسى على الرجال .. من وقع الشطير = وانا رجل .. عندي رباطة جاش مع قلب اجودي

تصدق ! اني كنت في غيبوبة الجرح الكبير = في مرحلة .. لاوعي ! لا ادراك ! ماني مهتدي

اقوى عهود الود .. مابين الفرزدق مع جرير = واضعف عهود الود .. مابيني ومابين اوعدي

دامي غني من عز نفسي .. ودامني لله فقير = لو الزمان يخصني بالظيم ؟ ماقل جهدي

قالو لي : جدك مات لـه مده ولـك مده كسير = لكن ؟ نشوفك مارثيته ؟ .. وانت ! بأشعارك مدي

قصايدك !! .. يا اما غزل في بنت ! ولا مدح امير ! = يالشاعر اللي لا انته مخضرم .. ولا انت بمبتدي

قلت : ان رثيته خايف استوعب فراقه واستنير = لني اعرف اني بعيف العمر دونه وآغدي

أثـر ( السكاكين كثرت ) من عقب ( ماطاح البعير ) = وآنا اتهرب ( مـنـه _ لـه ) .. واساير الحزن لغدي

هذاااك !! .. كان بأحترام الخلق بخصاله جدير = هذاااك !! .. لو الطيب غيمه ماطره ؟ كان بردي

هذاااك !! .. كان اللي يقوم الليل بالثلث الأخير = هذاااك !! .. كان اللي ليا شفته تباشرت سعدي

هذاااك !! .. كانت ضحكته , تعني لي الشي الكثير = هذاااك !! .. كان يضمني بيديه وآنا بمهدي

هذاااك !! سمٌـوه سمـا , هذاااك !! عن الغير غير = هذاااك !! عـُدي وسندي , هذاااك ( جد أب ولدي )

كنت اتهرب من صدى ذكراه .. بأوهام الغرير = ماودي اشعر في الم فرقاه .. وآعيش وحدي

غسلته بدمعي ويدي ترجف من (( اللقيا الأخير )) = وصليت للمولى عليه .. وموقفي هز جسدي

احس مـاهو ميت !! لو نعشه مع الجمع الغفير ! = واشوف نفسي فيه !! .. يومني دفنته في يدي

حتى وانا بيوم العزا ؟ ظليت في صمتي أسير = والعالم تعزي وانا ؟ ماني لصوابي مهتدي

اجامل اللي جا يوسع خاطري .. ببسمة صغير = وليا ضحكت ؟ اهوجس بضيقه .. وأحس اني ردي !

ليت السما فيها مقابر .. والغيوم بها غدير = والد عيني للسما .. واشوف قبره بالجدي

بكيت .. لكن ؟ ماقدرت أبكيك .. بالدمع الغزير = رثيت .. لكن ؟ ماقدرت أرثيك .. يا سعود مهدي

سعود اولا صح لسانك وصدقني ما راح اجاملك او تعتبر مروري شي ثاني

قصيده قريتها مرااااات نعم صدقني مراااات وكل مره اكتشف جماليات القصيده

هنا قصائد المفكرين والقصائد التي لا تتكرر
هنا جعلتني اعرف معنى " حرث الفكر"
هنا جعلتني اغير جلستي واضم حواجبي
هنا جعلتني اكتم انفاسي عند كل بيت
هنا تدفق الكثير من الدم لرأسي لكي أتفهم هذه الحاله
سعود صح لسانك لو انها كلمه تقليديه لكني اعني صح لسانك بكل ماتحمل من معنى
قصيده ستنحت على الكثير من العقول
اعذرني ان خانني التعبير
اسف على الاطاله