لحظة الفرقا ... !!

[محمد أبو زيد]

والله العظيم إنك تحرجني ياناصر



الله يرفع شانك وجعل شيبانك فالجنه



لاخلا ولاعدم

[محمد أبو زيد]

العرجاني صح الله بدنك والله يطول عمرك

[محمد أبو زيد]

مرحبا ومسهلا يابندر


مرورك عليها من فتره لــ فتره يعطرها وينومس شاعرها لاعدمتك

[مـحـمـد آل جـويـعـد]

الله الله يابو ناصر


صح الله لسانك ولاهنت يالجزل



تقبل كل الاحترام والتقدير

[فهيد بن عصيدان]

فوق

[البليهي]

المشاركة الأصلية كتبت بواسطة محمد أبو زيد

السلام عليكم ورحمة الله وبركاته

متواضعه بكل المقاييس .... عساها ترتقي لذائقتكم .

ولّ يايوم المفارق لعلّك ماتعود = فيك لحظه تِخضع الرجل للذلّ إجهرى


لحظةٍ يفتر بها الحيل ، وتضيع الجهود = وترخص دموع البنادم .. وتلحقه الزرى


بان مكنون الخفايا ، وباحنّ السدود = وفرّحت بي كلّ شمّات .. والعاذل درى


ضاق بي ثوبي .. وضاقت بي وساع الحدود = وإمتلا جاشي من الغيض .. والجيب إنفرى


لين سجن الحزن جيته مكبّل بالقيود = والله مايفتكّني جاه لابه وومرى


كود فزعة والي العرش .. ذو اللطف الودود = رحمةٍ من ربّ طيبه .. وربّ أم القرى


ماهقيت الخاتمه .. بين نكران وصدود = وماهقيت يصير ما لا يصير وما طرى


كنّ قلبي دلو .. واليه ميّاح العدود = يلتطم فالجال .. ويِتلّ من وثق العرى


ألتوي من حرّ ما أونست .. والعالم رقود = والطواري ذاك يغبش عليّ ، وذا سرى


ياوجودي وجد عودٍ .. مجرّب ومحمود = لو تسيّره الليالي ! .. يعيش مخيّرى


كل مازادوا هل الطيب ، والطاله يزود = للمسيّر مرحباني .،. وللجالي ذرى


ممسيٍ ،، والذود ممسي فمان وفي ركود = وقبل لاينساب نور الصباح ويسفرى


صبّحوه إخوان شمّا ، حشودٍ من حشود = وإنثنى من دونها بالرهيف الأبترى


إحتما الميقاف ، والعود ماهوب الشرود = لكن الحبّاي وينه ؟ ووين اللي جرى !


ماش ماويّه .. وسوّوبه سوات اليهود = إكعموه .. وساقوا الذود وعيونه ترى


وإلتفت في عجّة الكون صوب أمّ القعود = يعتذر عن قلّة الحيل ،، والحال إنبرى


من قهره يرصّ صدره على حدب الحيود = فيه غبن وينتظر كسر ساقه يجبرى


إيتوعّد بالمثاري .. وكثّر بالوعود = والمنيّه جاته ومات .. ماردّ البرى


من فراق اللي حطبني ووقّدني وقود = ثمّ عرضني هبوب الرياح ودبّرى


أفخر الأصناف صنفه .. ونادر فالوجود = بالجمال اليوسفي ، باع الأرواح وشرى


ضامر السرجوف ، ناعس طرف ، ريّان عود = خشف ريمٍ من مضحّاه طاش مذيّرى


ضلع حبّه فالحشى .. مايزعزعه الحسود = أثبت من طويق ، والنّير ، وأطول من كرى


حافظه حفظي لوجهي ، وتاريخ الجدود = وصاينه عن كل زلّه ، وضيم ، ومنكرى


جاريه ذكراك فالبال ياظبي النفود = مثل مجرى الدمّ وسط الوريد الأبهرى


ياعسى دربٍ تخطّاه يفرش لك ورود = وياعساك تعيش عيشة حشيم موقّرى


وألا أنا لي مذبل الحال .. فجّاج الكبود = جرح لو يضمده دكتور ( لندن ) مابرى

بو زيد صح لسانك

جزله جزله جزله


احترت اختار منها بيت


لاهنت على هذي القصيده الفاخره جدا


.

[فــلاح]

ياسلام ياسلام


صـح ألســانك يابوزيــد وانت مبــدع في كل المقااييس


لاهنـــت عز الله جزلـه من رأس جــزل


وشهــادتي فيك مجـروحـه

[DUNHILL]

والله انك مبدع في كل المقاييس
وصح لسانك يبوزيد

[محمد بن دسمه]

ياسلام ..

صح الله لسانك يابوناصر ..

لاهنت يالشيخ .

استمتعت بقرائتها .

[حسن علي الهاجري]

وألا أنا لي مذبل الحال .. فجّاج الكبود
جرح لو يضمده دكتور ( لندن ) مابرى





ابوووزيد صح لساااانك

ولاهنت على القصيده الوافيه من راس وافي


وننتظر جديدك