الـــعــــــــــــــــــانس

[عاااااااااادل]

عانس تعيش الحياه بضل عزلتها=مطويه بدارها والهم طاويها
الله يجبر عزاها في مصيبتها=ماغيره احدن يخفف من بلاويها
لا شي من حولها يدعم عزيمتها=من شان تقدر تحقق بعض امانيها
فراغها اكبر من الدنيا ومساحتها=لا زوج لا عيال لا شي(ن)يسليها
تفرح ولاحدن يشاركها بفرحتها=تزعل ولا عندها شخصن يواسيها
بدينها حطمت مصدر سعادتها=متعلمه عاقله والجهل معميها
مافكرت يومها في حلو زهرتها = ان الزهور الزمن لاطال يفنيها
تذبل زهور العمر وتروح نكهتها=والزهره الذابله محدن يدانيها
كم انطرق باب اهلها لجل خطبتها=لكنها ترفض الخطبه وطاريها
ومحدن وقف عايق(ن)في درب قسمتها=بالعكس كان امرها في عهده ايديها
لكن حياه التغطرس ذي نهايتها=عشرين قسمه تجي وتقول مابيها
كان تعذر تبي تنهي دراستها=تبغا شهاده من النكبات تحميها
يوم اقبلت وانتهت وانهت رسالتها=متفوقه بالدراسه من يضاهيها؟
دقت من الفرحه تبشر رفيقتها=قالوا تلاقينها في بيت واليها
تلاشت الفرحه وضاعت حلاوتها=وحست بمعنى كلام اللي يحاكيها
اللي بمثل عمرها هي ربه اسرتها=في بيت ابو عيالها والله مهنيها
وهي اقعدت عند ابوها مع شهادتها=على امل فارس الاحلام يأتيها
ماتدري ان البشر راحت وخلتها=كلن رمته اليالي في مراميها
ثم ادركت وقتها وش كبر غلطتها=وقامت تحسر على ماضي لياليها
لكن خلاص انتها ماتفيد حسرتها= لو جت تبا تعوض الماضي مايمديها
يوم اقعدت مره مقابل مرايتها=تتهندم شوي والقذله تسويها
شافت لها خصلتن بيضا بقذلتها=قد اانبتت من سنين وما درت فيها
وايضا تجاعيد تحت العين شافتها=ثم افطنت لسنين وجت تحصيها
ولما احسبتهن بكت من فرط ضيقتها=متندمه والندم ماعاد يغنيها
صارن شهاداتها ثمن عنوستها=واللي اخذ شي من دنياه يعطيها
شهايد(ن)علقتها بوسط غرفتها =مره تصبح بها ومره تمسيها
تمشي مع الناس محتاره بدمعتها=وتحاول بقد ماتقدر تخفيها
تكتم وتتظاهر بقوه ارادتها=تتصنع القوه وتظهر تحديها
والحزن في جوفها قطع حشاشتها=وادنات كلمه اذا اوحتها تبكيها
واليا اعترض طفلن اصغير بسكتها=ينتابها احساس صوب الطفل يدعيها
راحت تضمه وتبديله بشاشتها=تبغاه في كلمه (الماما)يناديها
ماهو غلا لكن اتحاول بحيلتها =تعويض نقص(ن)مدمرها ومضنيها
كم جرعتها اليالي من مرارتها =والحاضر اللي تعيش يسب ماضيها
والمجتمع ينبذ اللي مثل حالتها=من حزنها الارض ضاقت ماتكفيها
هذى هي العانس وهذى نهايتها=ويالعنبو عيشتن هذى تواليها

[فيصل بن حجرف]

صح لسانك اخوي عادل

ولكن اتوقع هذا شي قسمه ونصيب والدراسه ماله شغل فيه

ولو انها احد العوامل مثل مابينت في القصيده

الله يعطيك العافيه على كل حال

تحياتي

[cool]

السلاااام عليكم ورحمة الله وبركاااته

تفرح ولاحـدن يشاركهـا بفرحتهـا
تزعل ولا عندها شخصـن يواسيهـا

وش الحزن يا عااااادل

او كل اللي صاار علشااان الدرااسه والمستقبل

كلمااات قووويه وحقيقه عند ناااس كثاار يذوقوون طعمهاااا بعد ماخلصو الدراسه

ندعي الله يوفقهم ويرزقهم بالنصيب .

صح لسااانك على رااائعتك .

الله يعطيك العااافيه ولا هنت .

كـووول

[أبــيـــار]

يعطيك العافيه على هالقصيد


بس كنها قويه شوي ومكبره المسأله وهي مثل ماقال العجمان قسمه ونصيب


والله لو الله مو كاتبلها نصيب لو يجيها ميلون خاطب ماتتزوج لان مالها نصيب بالعرس في الدينا

وانا اشوف كلمة العانس مو حلوه بعد

ومافيها شي اذا الوحده ما تزوجت


وفي شباب واجد رافضين الزواج

والرجل يلقب بعانس وليس المرأه فقط


وآسفه على الاطاله


وتسلم اخوي عااااااادل


تحياتي

أبيـــــــــار

[كويتي]

صـــــــح لســـانك اخوي العزيز عادل والله لا يهينك على
هذى القصيده ..
وبنتظـــار جديدك ..

تحيـــــــاتي لــك كويتي

[قبلةالعجمان]

قصيــــــــــــــــــــــــــــدة رائعه جدا

[عاااااااااادل]

شكرا للجميع على المرور

وابداء الرأي


ومن نظرتي لاسباب العنوسه السبب الرئيسي هو التعليم
لان البنات لما تجي ترفض شاب مستقيم جاي لخطبتها ماعندها عذر غير انها تقول بكمل دراستي .

[كويتيه]

يعطيك العافيه قصيده حلوه.. بس جنهاا متحامله على التعليم..

بس والله صدقني مو بس التعليم.. اعرف وحده مارضت تتزوج عشان جمالهاا من كثر ما اهياا حلوه .. كل مره احد يجيي يخطبهاا تقول لا مايستاهلني تبي واحد احسن.. ليماا طق عمرهاا ال 40 .. والحين محد لا يبيهاا ولا يبي جمالهاا.....

غير انه في حريم كبريائهم يمنعهم من الازواج ماتبي احد يكون له سلطه عليهاا...

يعطيك العافيه عادل