ودي بها حب ما أبغيها بدرب الحرام

بـوح · #1 10-01-2013, 04:00 AM

سلام من قلبي اللي ذايبن بالغرام ** لخلي اللي فؤادي ساكنـن نونها

من عادني ورع باقي قبل سن الفطام ** شربت حبه من أعلاها ليا دونها

عندي قضيـه و أبطرحها لكم يا كرام ** أهل القلوب المحبه ويش هو عونها

أحبابها ما تبادلهم عرى الإحترام ** وأوعودهم بالهوى والله ما يوفونهــا

هروجهم مثل سماً فوق حد الحسام ** وأهروجهــم يا كثـر ما هم بيلوونهــا

يا شوق خذني لها قلبي لها اليوم هام ** كم لي سنه ودي إبها بس ينهونها

ودي بها حب ما أبغيها بدرب الحرام ** رجلي تخاف الدروب المظلمـه لونها

قلبي معذب ويسهـر دايمـن ما ينام ** والناس ما تـرحمـه زادته بأطعونها

قالوا : حبيبك ترى ما هو بقد المقام ** وقلت ما في المحبه ناس يسوونها

القلب عاشق ولا ظني بيسمع كلام ** ناسـاً تحب الفتن بالمال يشرونهـا

يا كم منافق شرى بالحب قلباً وسام ** ويا كم قلوباً وفت لكن يكوونهـا

الله يجعلك يا خلي لـ / قلبي وسـام ** رغم الأنوف التي ما هم يفيدونها

بـ / قلمي : بوح "