ياصامته بين المواجع والأماني والكلام........

[بعيدات مراميسه]

ياصامته بين المواجع والأماني والكلام =تكلمي دامك على شط المواجع تسكنين
ماعاد ينفع فالزمن كثر التشره والملام =دام الوفا ياغاليه في مجتمعنا مايبين
وإن كان حلم البارحه راود عيونك فالمنام =خليه يسهر في محاجرها ..معه لاتسهرين
نامي ويحرسك الآله اللي عيونه ماتنام =يحرسك من شر الطغاة الحاقدين الحاسدين
هم مادرو إن الله المولى عزيزٍ ذو أنتقام =.اللي بأمره كل شيء يصير رب العالمين
وأنتي ليا جيتي على حدود الحميا فالزحام =ملفاك قلبٍ دون عزك يالعزيزه مايلين
الله رفع شأنك لأنك يالكريمه من أكرام =لا لا تردين النظر لنازلين التافهين
لا تشغلي بالك وقلبك في خفافيش الظلام =وأنتي على رأسك سمو العز تاج ونجمتين
شفتك على مد النظر وأطلقتلك سرب الحمام =وأشتقتلك شوق العرب على بلاد الرافدين
أرسلتلك جيش الوفا وأرسلتلك جيش الغرام =وأنتي على درب ( التردد) تقربين وتبعدين
أما تعالي في رحاب القلب لك قدر ومقام =وإلا على ناي الغلى ياغاليه لا تعزفين
ترى الزعيمه ماتليق إلا مع إرجالٍ أعظام =وأنتي على عرش الزعامه تحكمين وتامرين